Minadukacyi vyznačyła, što ŭ škołach rabić z mabilnymi telefonami i jakim tam budzie prapuskny režym

Ciapier supracoŭniki škoł, vučni i ich zakonnyja pradstaŭniki mohuć prychodzić va ŭstanovu adukacyi nie raniej čym za 30 chvilin da pačatku jaje pracy i sychodzić maksimum praz paŭhadziny. Taksama ŭ škołach mohuć źjavicca achoŭniki i namieśniki dyrektara pa biaśpiecy, piša Tut.by.

11 krasavika ministr adukacyi Ihar Karpienka padpisaŭ zahad. Jon zaćviardžaje prykładnuju instrukcyju ab arhanizacyi prapusknoha režymu i abmiažoŭvaje vykarystańnie mabilnych telefonaŭ padčas zaniatkaŭ i pierapynkaŭ. Niadaŭna jaho razasłali pa škołach Biełarusi.

Pavodle instrukcyi dostup u budynak škoły pačynajecca za 30 chvilin da pačatku zaniatkaŭ i zakančvajecca praz 30 chvilin paśla ich zakančeńnia. Heta tyčycca jak supracoŭnikaŭ, tak i vučniaŭ, i ich baćkoŭ.

U niepracoŭny čas supracoŭniki škoł zmohuć patrapić na pracoŭnaje miesca tolki na padstavie dakładnoj zapiski namieśnika dyrektara ŭstanovy adukacyi.

Kruhłasutačny dostup u budynak škoły dazvalajecca tolki kiraŭniku ŭstanovy adukacyi, jaho namieśniku pa haspadarčaj rabocie, vartaŭnikam i vachcioram, a taksama piersanału arhanizacyj, jakija absłuhoŭvajuć škołu ŭ avaryjnych situacyjach.

U instrukcyi havorycca pra toje, što ciapier naviedvalniki škoły abaviazkova pavinny pradjaŭlać dakumienty, jakija paćviardžajuć ich asobu. Paśla hetaha vartaŭnik abo vachcior abaviazkova rehistrujuć ich vizit i jaho metu.

Słužbovy transpart na terytoryju škoły prapuskajecca tolki paśla pradjaŭleńnia tavarnaj nakładnoj abo darožnaha lista. Asabisty transpart na terytoryju škoły nie prapuskajecca.

Taksama ŭ Ministerstvie adukacyi raspaviali, što pa mierkavańni administracyi škoł tam mohuć źjavicca achoŭniki i namieśniki dyrektara pa biaśpiecy.

U zahadzie jość asobny punkt, jaki tyčycca vykarystańnia mabilnych telefonaŭ.

Ustanovy siaredniaj adukacyi pavinny ŭnieści ŭ praviły ŭnutranaha rasparadku pałažeńnie ab tym, što padčas zaniatkaŭ i pierapynkaŭ vykarystańnie mabilnych telefonaŭ abmiežavana. Miarkujecca, što imi možna budzie karystacca da i paśla ŭsich zaniatkaŭ i padčas padoŭžanki. Dla telefonaŭ zrobiać śpiecyjalnyja miescy, u jakich buduć zachoŭvacca kaštoŭnyja rečy rabotnikaŭ i navučencaŭ.

Taksama ŭ instrukcyi prapisany pieralik rečaŭ i pradmietaŭ, jakija zabaroniena zachoŭvać i vykarystoŭvać u škole. Siarod ich — ałkahol, cyharety, u tym liku elektronnyja, ahniastrelnaja i hazavaja zbroja, bojeprypasy ci vybuchovyja rečyvy, a taksama ich mulažy, chałodnaja zbroja (i mulažy), chimičnyja i atrutnyja rečyvy, zapałki, zapalnički, narkatyčnyja srodki, pryłady dla azartnych hulniaŭ i inšyja.

• 0
• 0
• 0
• 0
• 0
• 0
• 0
• 0