«Karty biełarusa zamiežža» nie budzie, bo jość precedenty z «kartaj palaka»
Jašče ŭ sakaviku minułaha hoda ZBS «Baćkaŭščyna» na prośbu Nacyjanalnaha centra zakanadaŭstva i pravavych daśledavańniaŭ Biełarusi padrychtavała i nakiravała dakumient z prapanovami pa karekciroŭcy zakanadaŭstva krainy ŭ śfiery adnosin ź biełarusami zamiežža. Prapanovy zaniali ažno 13 staronak i tyčylisia nie tolki zakona «Ab biełarusach zamiežža», ale i zakonaŭ «Ab srodkach masavaj infarmacyi», «Ab hramadzianstvie», statut Nacyjanalnaj akademii navuk Biełarusi i kodeksy Respubliki Biełaruś «Ab kultury» i «Ab adukacyi».
Prapanovy byli skiravanyja na pašyreńnie supracoŭnictva ź biełaruskim zamiežžam u samych roznych śfierach, pryciahnieńniu ekanamičnaha i intelektualnaha patencyjału biełarusaŭ zamiežža dla ŭzbahačeńnia nacyjanalnaj ekanomiki, navuki, kultury i sacyjalnaj śfiery, bo siońniašniaja praktyka stasunkaŭ vielmi časta abmiažoŭvajecca ŭsiaho tolki zadavalnieńniem kulturnickich patreb dyjaspary, i toje, davoli ścipła.
Dniami ZBS «Baćkaŭščyna» atrymała adkaz z Nacyjanalnaha centra zakanadaŭstva i pravavych daśledavańniaŭ, ź jakoha vynikaje, što:
-
prapanovy Zhurtavańnia pa źmianieńni Zakona Respubliki «Ab hramadzianstvie Respubliki Biełaruś» buduć razhledžany na pasiadžeńni rabočaj hrupy pa padrychtoŭcy prajekta Zakona Respubliki Biełaruś «Ab źmianieńni Zakona Respubliki Biełaruś «Ab hramadzianstvie Respubliki Biełaruś»;
-
prapanovy pa karekciroŭcy Kodeksa Respubliki Biełaruś «Ab kultury» i zakona «Ab srodkach masavaj infarmacyi» buduć razhledžany pry nastupnym kompleksnym źmianieńni hetych zakanadaŭčych aktaŭ.
Što datyčyć pierśpiektyvaŭ uviadzieńnia va ŭžytak paśviedčańnia «biełarusa zamiežža», dakumienta, jaki moh by, da prykładu, dazvalać trymalniku karystacca pravam biaźvizavaha ŭjezdu ŭ Biełaruś, sproščanaj praceduraj rehistracyi, atrymlivać ilhotny kredyt dla apłaty vyšejšaj adukacyi i da t.p., Nacyjanalny centr zakanadaŭstva i pravavych daśledavańniaŭ ličyć metazhodnym dadatkova vyvučyć mierkavańni kampietentnych orhanaŭ adnosna mahčymaści ŭviadzieńnia takoha dakumienta.
Heta źviazana z pazicyjaj Kanstytucyjnaha Suda Respubliki Biełaruś u dačynieńni da zakonu Respubliki Polšča «Ab Karcie palaka». Pavodle jaje pradstaŭleńnie ilhot i pryvilejaŭ zamiežnym hramadzianam — uładalnikam «karty palaka» supiarečyć pałažeńniam šerahu mižnarodnych dahavoraŭ i ahulnapryznanym pryncypam mižnarodnaha prava.
Admietna, što, pavodle adkazu Nacyjanalnaha centra zakanadaŭstva i pravavych daśledavańniaŭ, z 23-ch dziaržaŭnych orhanaŭ i inšych arhanizacyj Respubliki Biełaruś pieravažnaja bolšaść adrasataŭ, u tym liku MZS, paviedamili ab adsutnaści prapanoŭ pa źmianieńni Zakonu, i asnoŭnaja masa zaŭvahaŭ pa karekciroŭcy zakanadaŭstva pastupiła ad «Baćkaŭščyny».
Kamientary