15 červienia ŭ Vierchnim Horadzie razhorniecca fest «Dzień Polščy ŭ Minsku». Arhanizatary prapanujuć roznyja imprezy i aktyŭnaści dla publiki roznych uzrostaŭ.
Na muzyčnaj placoŭcy la Ratušy na hałoŭnaj scenie vystupiać chedłajniery z Polščy — hurt «Golden Life», jaki prezientuje svaje najlepšyja chity na miažy pop i rok-muzyki, repa i kantry. Hurt vystupaŭ na adnoj scenie z «Radiohead», Džo Kokieram i «Rammstein».
Z kancertnaj prahramaj «Da 200-hodździa Stanisłava Maniuški» vystupiać simfaničny arkiestr «Capella Academia», Dziaržaŭny kamierny chor Respubliki Biełaruś, salisty Vialikaha teatra Biełarusi. Prahučać znakavyja tvory Stanisłava Maniuški: aryi z opier «Halka» i «Strašny dvor», uvierciura da opiery «Kazka» i charavyja tvory kampazitara, a taksama najlepšyja pieśni sa znakamitaha cykła kampazitara «Chatni śpieŭnik».
Falkłornyja kalektyvy pradstaviać polskuju narodnuju tvorčaść vakalnymi i tancavalnymi numarami. A da 80-hodździa lehiendy polskaj muzyki XX stahodździa Česłava Niemena kalektyŭ Ščučynskaha rajonnaha centra kultury i narodnaj tvorčaści vystupić z prezientacyjaj najlepšych tvoraŭ muzykanta.
Česłaŭ Niemen, hienij rok-muzyki, naradziŭsia ŭ Vasiliškach pad Lidaj, a tvaryŭ u Polščy.
Na fiestyvali buduć pracavać adnačasova niekalki nadzvyčaj cikavych vystavačnych placovak.
U «Halerei Minsk» buduć pracavać dźvie infarmacyjnyja vystavy. Vystava «15 hod Polščy ŭ Jeŭrasajuzie», padrychtavanaja admysłova da hetaj padziei, raskazvaje pra toje, što Polšča zdabyła z ustupleńniem u Jeŭrasajuz. Prytok novych technałohij i inavacyjnych rašeńniaŭ, likvidacyja miežaŭ, pavieličeńnie dynamiki inviestycyj, spažyvańnia i ekspartu — Polšča raźvivajecca nadzvyčaj imkliva.
Pra turystyčnyja atrakcyi Polščy možna daviedacca na stendavaj vystavie «Polšča. Vam tut rady!».
U halerei «Univiersitet kultury» adbudziecca mastackaja vystava «Sport u polskim płakacie» sa zboraŭ Dydo Poster Collection (Krakaŭ), pryśviečanaja II Jeŭrapiejskim hulniam.
Vuličnaja vystava «Krakaŭski Łajkonik» paznajomić z historyjaj adnaho ź simvałaŭ Krakava. Łajkonik — tatarski vieršnik va ŭschodnim stroi, śpičastym ciurbanie i z bułavoj u ruce. Jon nahadvaje pra vyzvaleńnie Krakava ad zachopnikaŭ, a taksama tancuje i zabaŭlaje hledačoŭ.
Ad dvoryka mastackaj halerei Michaiła Savickaha, dzie budzie ekspanavacca vystava, i pačnie svajo karnavalnaje šeście Krakaŭski Łajkonik. Źbihnieŭ Hlonek hraje Łajkonika ŭžo 31 hod, a da hetaha 17 hod chadziŭ u pracesii płytahonam. Jaho ŭbrańnie važyć 30 kh! Razam sa śvitaj i hurtam «Mlaskoty» šeście ŭračysta projdzie pa prylehłych da Vierchniaha horada vulicach i zatančyć na płoščy la haradskoj Ratušy. Ličycca, što ŭdar bułavoj Łajkonika spryjaje dabrabytu na ŭvieś nastupny hod.
Na zabaŭlalnuju placoŭku dzietak zaprosić «Kalarovy cyrk». Hledačoŭ čakaje cudoŭnaja interaktyŭnaja zabava ŭ vykanańni viasiołych kłoŭnaŭ i chadulnikaŭ. Prahrama praduhledžvaje vystup chadulnikaŭ, skački cieraz hihanckuju skakałku, akrabatyčnyja truki na bałans-bordzie, šou mylnych burbałak. Udzielniki majstar-kłasaŭ zmohuć avałodać roznymi cikavymi cyrkavymi i akrabatyčnymi ŭmieńniami.
Užo tradycyjna dla samych maleńkich haściej pracuje dziciačaja hulniavaja placoŭka ad fabryki cacak «Paleśsie».
Na teatralnaj placoŭcy vystupić krakaŭski vuličny teatr «Scena kalejdaskop». Heta mastackaja hrupa, jakuju zasnavaŭ u 1999 hodzie akcior i režysior Piotr Kulčyk. Kalektyŭ zajmajecca pastanoŭkaj teatralnych śpiektaklaŭ, a taksama vuličnych vystupleńniaŭ, spałučajučy cyrkavoje, baletnaje i aŭdyjovizualnaje mastactva. Minskaj publicy akciory pakažuć śpiektakl «Serca Don Žuana ŭ ahni». Zachaplalnaje teatralna-cyrkavoje vidovišča pa matyvach sumna viadomaj historyi Don Žuana — niaviernaha kachanka, jaki svaimi luboŭnymi pryhodami ździŭlaŭ, vyklikaŭ abureńnie i reŭnaść. U śpiektakli my bačym jaho jak poŭnaha zapału čałavieka, jaki znachodzicca ŭ pošukach sapraŭdnaha pačućcia. Vidovišča nasyčana śpiecefiektami: rukapašny boj, dymavaja zasłona, pachodni. U śpiektakli my zmožam ubačyć majsterstva chadulistaŭ. Pryhožaja kłasičnaja muzyka ad pieršaj da apošniaj siekundy praviadzie hledača praź pierypietyi žarści čałaviečaj dušy.
Ciaham dnia na moŭna-adukacyjnym kirmašy ŭsie, kaho cikavić vyvučeńnie polskaj movy, adukacyju i stažyroŭki ŭ Polščy, zmohuć atrymać infarmacyju pra kursy i adukacyjnyja prahramy ŭ Minsku. Svaje prapanovy pradstaviać studyja polskaj movy «Pan Profesor«, škoła zamiežnych moŭ «Streamline«, centr «Studyja-Movija». Biełaruskija partniory škoły zamiežnych moŭ «GLOSSA« (Krakaŭ) raspaviaduć pra anłajn-kursy pa polskaj movie i padručniki ź sieryi «POLSKI krok po kroku«, jakija taksama buduć dastupnyja dla nabyćcia. Naviedvalnikaŭ čakajuć cikavyja prezientacyi, moŭna-litaraturnyja konkursy i zabavy.
Kniharnia «Akademkniha» pradstavić šyroki śpiektr polskaj mastackaj litaratury roznych žanraŭ u pierakładzie na biełaruskuju i ruskuju movy.
Na litaraturnaj placoŭcy adbudziecca tvorčaja sustreča sa znakamitym polskim piśmieńnikam i navukoŭcam Janušam Leonam Višnieŭskim. Jaho debiutny raman «Adzinota ŭ siecivie» try hady nie źnikaŭ sa śpisaŭ biestsieleraŭ, byŭ pierakładzieny amal na ŭsie asnoŭnyja movy śvietu i prynios aŭtaru šyrokuju viadomaść.
Padčas sustrečy budzie iści razmova pra tvorčaść, najnoŭšyja tvory aŭtara i piśmieńnickija płany. Udzielniki sustrečy buduć mieć mahčymaść zadać pytańni piśmieńniku i atrymać aŭtohraf. Sustreču praviadzie paetka i televiadučaja Valaryna Kustava.
Na terytoryi fiestyvalu buduć pracavać infarmacyjnyja placoŭki Polskaha Instytuta ŭ Minsku, Polskaj turystyčnaj arhanizacyi (POT) i Nacyjanalnych instytutaŭ kultury Jeŭrapiejskaha Sajuza (EUNIC), a taksama fudkort.
Arhanizatary mierapryjemstva — Minharvykankam i pasolstva Polščy ŭ Biełarusi.
Uvachod volny.
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie55
Kamientary