Art-śviet uzrušany: francuzski miljarder kuplaje «Sotbiz» za $2,7 miljarda
Franka-izrailski miljarder Patryk Drai kuplaje aŭkcyjonny dom «Sotbiz» za 2,7 miljarda dalaraŭ. 31 apošni hod «Sotbiz» isnavaŭ u formie adkrytaha akcyjaniernaha tavarystva.
Drai — apantany kalekcyjanier mastactva. Akramia taho, jon vałodaje vialikaj telekamunikacyjnaj impieryjaj, u jakuju ŭvachodziać kampanii roznych kantynientaŭ.
Drai zapłacić pa $57 za kožnuju akcyju — heta z 61-pracentavaj premijaj za košt akcyi pa stanie na minułuju piatnicu. Jon układaje $1,5 młrd ułasnych hrošaj, a reštu apłacić pazyčanymi hrašyma, paviedamlaje vydańnie «Uoł-stryt džornał».
«Sotbiz» — heta adzin z dvuch najbolšych aŭkcyjonnych damoŭ śvietu. Jon pradaje tvory mastactva, abjekty nieruchomaści, juvielirnyja vyraby, kalekcyjnaje vino dy inšyja rečy.
Letaś abjom prodažaŭ Sotheby's skłaŭ $6,4 młrd, u kankurentaŭ z Christie's jon byŭ $7 młrd.
Sotheby's pačaŭ svajo isnavańnie ŭ 1744 hodzie. Jon isnavaŭ u formie akcyjaniernaj kampanii z 1977 da 1983 hoda. Paśla jaho vykupiŭ biznesoviec Alfred Taŭbman, ale ŭ 1988 hodzie jana znoŭ stała akcyjaniernaj kampanijaj. A Taŭbmana ŭ 2001 hodzie asudzili za cenavuju zmovu z kankurentami z Christie's.
Abjomy rynku mastactva imkliva raśli ciaham apošnich dziesiacihodździaŭ. Košt tvoraŭ dasiahaje časam astranamičnych sum. Naprykład, «Aholenuju» Madyljani na Sotheby's u 2018 hodzie pradali za $157 młn dalaraŭ. Papiaredni ŭłaśnik kupiŭ jaje ŭ 2003 hodzie za 26,9 młn.
Kamientary