Maci kinuła syna, kali jamu było čatyry hady. A praź dziesiać hod zachacieła viarnuć
Zaviaršyŭsia razhlad pytańnia ab tym, z kim zastaniecca padletak — babulaj abo maci. Rašeńnie suda zadavoliła isk prakurora Maładziečanskaha rajona pa spravie pazbaŭleńnia baćkoŭskich pravoŭ 37-hadovaj žančyny na jaje 14-hadovaha syna, piša Rehijanalnaja hazieta.
Maci budavała novuju siamju
Ad čatyroch hadoŭ chłopčyk žyŭ z babulaj u Maładziečnie. Pry hetym zarehistravany byŭ u minskim internacie pa miescy prapiski maci. Bolš čym dziesiać hod dahladała dzicia babula. Jana kłapaciłasia pra ŭsiebakovaje raźvićcio, udzielničała ŭ žyćci i vychavańni, razam z mužam zabiaśpiečvała materyjalnyja ŭmovy.
Maci ŭ spravie vystupaje adkazčykam. Na sudzie žančyna patłumačyła, što nie była ŭ šlubie z baćkam chłopčyka.
Kali synu było čatyry hady, dobraachvotna addała jaho svajoj maci. Tak skłalisia abstaviny, patłumačyła jana. Praz hod abstaviny źmianilisia, naładziła asabistaje žyćcio. Ale syna tak i nie zabrała.
Praz dva hady, u 2011 hodzie, jana naradziła jašče adno dzicia ŭ novych adnosinach. Z novym mužčynam jana nie ŭ šlubie, ale para žyvie vosiem hadoŭ razam ź dziciem u minskaj kvatery maci sužytnika.
Dzicia niepatrebnaje
Orhany apieki sprabavali viarnuć starejšaha syna maci. Joj prapanoŭvali zabrać dzicia ŭ Minsk abo vychoŭvać jaho ŭ Maładziečnie, naładzić dziciača-baćkoŭskija adnosiny. Adkazčyk nie vykazvała žadańnia naładzić adnosiny z synam, nie chacieła zabirać jaho ŭ novuju siamju.
U 2017 hodzie na pasiedžańni kamisii pa spravach niepaŭnahadovych u Minsku patłumačyła, što zabrać syna nie dazvalajuć žyllovyja ŭmovy.
Pradstaŭnik upraŭleńnia pa adukacyi, sportu i turyzmu Maładziečanskaha rajvykankama raspaviała, što ŭ 2018 hodzie padčas hutarki skłałasia ŭražańnie, što dzicia žančynie niepatrebnaje.
Adnosiny pamiž synam i maci stračanyja
11 hod z 14 chłopčyka vychoŭvała babula, jana i była jaho siamjoj. Ad 2008 hoda, z taho času, jak jaho addali, sustrečy z rodnaj maci byli chutkija i epizadyčnyja. Bolš za dziesiać hod žančyna nie prymała i nie chacieła prymać udzieł u vychavańni syna.
Žančyna nie złoŭžyvaje śpirtnym, nie źjaŭlajecca asacyjalnaj asobaj. Na sudzie jaje zapytalisia, kali jana płanavała pačać hadavać syna. Adkazała: «Ad hetaha hoda ja vyrašyła».
Psichołah pravioŭ dyjahnostyku dziciača-baćkoŭskich adnosinaŭ. Pravierka pakazała, što pamiž chłopčykam i jaho maci niama emacyjnaha kantakta.
Chłopčyk adšturchoŭvaje maci, uzajemaadnosiny pamiž imi stračanyja.
Na sudzie adkazčyk isk nie pryznała i była suprać pazbaŭleńnia baćkoŭskich pravoŭ. Abskardziła rašeńnie suda Maładziečanskaha rajona ab pazbaŭleńni baćkoŭskich pravoŭ. Sudovaja kalehija pa hramadzianskich spravach Minskaha abłasnoha suda pakinuła rašeńnie ŭ sile.
Kamientary