«Jość navat hledačy ź Japonii». Na Jutubie źjaviŭsia biełaruskamoŭny kanał dla dzietak

Zapuścić jutub-kanał dla maleńkich žurnalistka Volha Čajčyc — mama Viery i Jana — źbirałasia daŭno: sama sutyknułasia z tym, što biełaruskamoŭnaha kantentu nie chapaje. Mulfilmy na rodnaj movie i prajekty dla dziaciej u ŚMI — heta vielmi mała.

Pavialičyć

Mahčyma, padšturchnuło i toje, što Jan i Viera redka razmaŭlajuć pa-biełarusku, choć i čujuć rodnuju movu ad baćkoŭ.

— My žyviom u Fanipali, i tut niama ni biełaruskamoŭnych sadkoŭ, ni škołaŭ. Vazić u Miensk prosta niama mahčymaści. U dziaciej usio asiarodździe ruskamoŭnaje, tamu jany iduć za bolšaściu. Choć doma my z mužam razmaŭlajem pa-biełarusku i prykładajem šmat namahańniaŭ, kab dzieci pierajmali hetu zvyčku. Ale kali my jedziem da siabroŭ, čyje dzieci biełaruskamoŭnyja, našy za imi adrazu paŭtarajuć.

Miesiac tamu, jak vyjšła ŭ adpačynak, Volha vyrašyła pasprabavać zrabić paru rolikaŭ — i zakruciłasia.

Kanał raźličany na daškolnikaŭ. U videa dzieci raźbirajuć cacki, staviać ekśpierymienty i vučać biełaruskim słovam (naprykład, nazvam koleraŭ i žyviołaŭ). Zapisvali taksama aŭdyjakazki, ale farmat aŭdytoryi nie zajšoŭ.

— Dzieciam zdymać roliki vielmi padabajecca. Asabliva radujecca małodšaja Viera. I plus, ja dumaju, heta karysna dla ich — pravodzić ekśpierymienty, šukać novyja idei. Kali ty robiš heta dla kanała, bolš uvahi nadaješ vyvučeńniu infarmacyi, staranna rychtuješsia.

Trochchvilinny rolik siamja zdymaje hadzinu.

— Ale ŭ mianie šmat času idzie na mantaž, bo ja tolki zaraz pačała vučycca hetamu i nie ŭsie funkcyi pakul viedaju, — dzielicca maładaja mama.

Pieršyja videa Volha padpisvała pa-rusku: dumała, što tak možna pryciahnuć i ruskamoŭnuju aŭdytoryi. Paźniej ad hetaha admoviłasia — niama sensu. Praŭda, zamiežnyja hledačy ŭ kanała ŭsio ž jość. Rolikami na rodnaj movie zacikavilisia biełarusy, jakija žyvuć u Kanadzie, ZŠA, Japonii.

Čamu dahetul u siecivie nie było biełaruskamoŭnaha dziciačaha kanała? Na dumku Volhi, pryčyna ŭ tym, što na takim kantencie ciažka zarabić i nabrać padpisčykaŭ.

— My bačyli tolki adzin taki dziciačy kanał — Stefanie and Family. Jany rabili niekalki biełaruskamoŭnych videa, ale ciapier ad ich admovilisia, bo było mała prahladaŭ. Na YouTube amal nichto nie šukaje biełaruskamoŭnaje videa, tamu što nie viedaje, što takoje jość. I, adpaviedna, kantent nie traplaje ŭ rekamiendavanaje. My razumiejem, što aŭdytoryja moža pryjści, tolki kali sami budziem prasoŭvać kanał praz sacyjalnyja sietki.

• 0
• 0
• 0
• 0
• 0
• 0
• 0
• 0