Rasijski navukoŭca, jakoha zapadozryli ŭ dziaržaŭnaj zdradzie, abaraniaŭ Ziamlu ad asteroidaŭ
Supracoŭnik Centralnaha navukova-daśledčaha instytuta mašynabudavańnia Siarhiej Mieščarakoŭ, jakoha zapadozryli ŭ dziaržaŭnaj zdradzie, pracavaŭ nad prajektam, źviazanym z abaronaj Ziamli ad asteroidaŭ. Pra heta ŭ paniadziełak, 15 lipienia, «Interfaksu» raspavioŭ Jarasłaŭ Kudraŭcaŭ, syn inšaha fihuranta spravy pra dziaržaŭnuju zdradu Viktara Kudraŭcava.
Pavodle jaho słoŭ, raniej Jeŭrasajuz vyłučyŭ try hranty ŭ ramkach adnoj prahramy FP7-SPACE, i CNDImaš udzielničaŭ u ich ad Rasii. Pieršy raspracoŭvaŭsia pa hipierhukavych aparatach, druhi i treci — pa palotach na Mars i pa abaronie Ziamli ad asteroidaŭ.
Nad apošnim pracavaŭ Mieščarakoŭ u pieryjad z 2012 pa 2015 hod. Prajekt kuryravaŭ Niamiecki aerakaśmičny centr u Kiolnie. U raspracoŭcy ŭdzielničali mnohija pradpryjemstvy, u tym liku CNDImaš.
Raniej 15 lipienia Lefortaŭski sud Maskvy adpraviŭ pad chatni aryšt 77-hadovaha Mieščarakova. Materyjały kryminalnaj spravy pa artykule 275 («Dziaržaŭnaja zdrada») KK RF nie vydajucca z-za hryfa «sakretna».
5 červienia paviedamlałasia, što FSB zatrymała pa spravie ab dziaržzdradzie Ramana Kavalova, jaki ŭznačalvaŭ centr ciepłaabmienu i aerahazadynamiki (CTA) CNDImaš i byŭ načalnikam Viktara Kudraŭcava.
Kudraŭcava zatrymali ŭ lipieni minułaha hoda. FSB abvinavaciła jaho ŭ pieradačy sakretnych źviestak ab hipierhukavych technałohijach, jakija vykarystoŭvajucca ŭ bajavych rakietnych kompleksach «Kinžał» i «Avanhard». Jaho advakaty adznačajuć, što abmien infarmacyjaj išoŭ u ramkach sumiesnaha prajekta Minabarony i Fon Karmanaŭskaha instytuta hidradynamiki ŭ Bielhii. Vučony nie rasparadžaŭsia źviestkami, jakija źjaŭlalisia dziaržaŭnaj tajnaj.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1818
Kamientary