Rasstralajuć mužčynu, jaki pad Novy hod zabiŭ palenam dźviuch babulek
Viciebski abłasny sud prysudziŭ rasstreł 50-hadovamu Viktaru Paŭłavu. Pra heta «Našaj Nivie» paviedamiŭ miascovy pravaabaronca Leanid Śviecik.
Paŭłava abvinavačvajuć u tym, što ŭzimku jon zabiŭ dźviuch piensijanierak u vioscy Prysušyna.
1 studzienia svajaki adnoj z žančyn nie zmahli dazvanicca da jaje, kab pavinšavać z Novym hodam. Na nastupny dzień jany iznoŭ nie dazvanilisia. Tady vyrašyli, što moh złamacca telefon i pakinuli zajaŭku ramontnikam, kab tyja pravieryli.
Ale biada była nie z telefonam. Abiedźviuch žančyn znajšli miortvymi ŭ ich ułasnaj chacie. Adnoj było 78 hadoŭ, druhoj —76.
Susiedzi ŭzhadali, što ŭ piensijanierak byŭ pamahaty, jaki zajmaŭsia haspadarkaj, žychar susiedniaj vioski Słabada. Heta i byŭ toj Viktar Paŭłaŭ. Jaho zatrymali.
Zabojstva było ździejśnienaje 30 śniežnia, vyśvietliła śledstva, Paŭłaŭ pryjšoŭ u dom da siaścior-piensijanierak i mocna ich pabiŭ. U jakaści zbroi vykarystaŭ palena.
Pry hetym skraŭ hrošy i niekalki butelek vina — ahułam na 179 rubloŭ. Pieraapranuŭsia, štany, na jakich była kroŭ zabitych, pakłaŭ u miech i vykinuŭ. Paśla pajšoŭ pa kramach zakupacca pierad śviatam.
Na sudzie abvinavaŭca paličyŭ vinu Paŭłava dakazanaj. Dziejańni Paŭłava byli kvalifikavanyja prakuroram jak «asabliva niebiaśpiečny recydyŭ złačynstva», paviedamlaje «Viasna».
Sprava ŭ tym, što raniej mužčyna byŭ sudzimy — i taksama za zabojstva.
U svaju čarhu advakatka Paŭłava pierakonvała sud, što zabojstva adbyłosia ŭ vyniku sprečki i było spravakavana adnoj z žančyn, jakaja nibyta abražała abvinavačanaha, bo mieła pretenzii da jakaści pabudavanaha im chlava. Na dumku abaroncy, mety zabivać žančyn abvinavačany nie mieŭ — prosta pryjšoŭ kupić vina, jakim handlavali žančyny.
U svajoj pramovie advakatka taksama źviarnuła ŭvahu na źmiakčalnyja abstaviny: jaje padabaronny supracoŭničaŭ sa śledstvam, napisaŭ jaŭku z pavinnaj, raskajaŭsia. Abaronca prasiła sud dać mužčynie jašče adzin šaniec na vypraŭleńnie i nie prymianiać da jaho vyklučnuju mieru pakarańnia.
U apošnim słovie abvinavačany vykazaŭ škadavańnie i raskajańnie za ŭčynienaje, taksama paprasiŭ sud nie prymianiać da jaho najvyšejšuju mieru.
Ciapier čytajuć
Što zdaryłasia ź Mikitam Miełkazioravym, jaki raptoŭna pamior nočču?31
Kamientary