Łukašenka zastupiŭsia za zabojcaŭ padpalščyka

6 lutaha prakuratura Homielskaj vobłaści źmianiła mieru strymańnia ŭ dačynieńni da troch žycharoŭ vioski Puchavičy Žytkavickaha rajona, jakija abvinavačvajucca ŭ zabojstvie adnaviaskoŭca‑padpalščyka.

Mužčyny adpuščany ź SIZA i ŭ supravadžeńni milicyi dastaŭleny ŭ rodnuju viosku. Da suda jany buduć znachodzicca pad damašnim aryštam.

Nahadajem, zabojstva adbyłosia 31 śniežnia 2008 hoda. U dačynieńni da zabitaha 1965 hoda naradžeńnia raniej była raspačata kryminalnaja sprava — jon padazravaŭsia va ŭčynieńni troch padpałaŭ u rodnaj vioscy ŭ listapadzie—śniežni 2008 hoda. Mužčyna byŭ šeść razoŭ sudzimy. Syn (1972 hoda naradžeńnia) adnoj z žančyn, majomaść jakoj była paškodžana pry padpale, i dva jaho znajomyja 1974 i 1980 hadoŭ naradžeńnia vyrašyli adpomścić padpalščyku — zabili jaho, a trup sprabavali spalić. Cieła znajšli 6 studzienia. Praz čatyry dni padazronyja byli zatrymany. U dačynieńni da ich raspačata sprava pa č. 1 art. 139 Kryminalnaha kodeksa (zabojstva).

Kryminalnaja sprava atrymała hramadski rezanans, žychary vioski Puchavičy zastupilisia za abvinavačvanych i nakiravali ŭ roznyja dziaržustanovy šerah skarhaŭ.

6 lutaha na naradzie pa pytańniach udaskanaleńnia kryminalnaha zakanadaŭstva Alaksandr Łukašenka źviarnuŭsia da ministra ŭnutranych spraŭ Uładzimira Navumava sa słovami:

«Kali łaska, zaŭtra vy ich adviazicie ŭ viosku, ja vas prašu, niachaj jany žyvuć u vioscy, a vy viadzicie svaju kryminalnuju spravu. Adviazicie ludziej u viosku, i niachaj pracujuć tam, znachodziacca ŭ svaich siemjach, a vy ich zaprašajcie i dapytvajcie, heta dla ich budzie lepš, čym siadzieć u śledčym izalatary».

A.Łukašenka, źviartajučysia da staršyni Viarchoŭnaha suda Valancina Sukały, skazaŭ: «Ja paprasiŭ by, kab vy łajalna viali hetu kryminalnuju spravu. I vielmi vas prašu, pastaŭciesia jak da svaich rodnych ludziej. Nu niahodnik jon, ludziej teraryzavaŭ, cełuju viosku. Kali ŭžo mužyki na heta pajšli, napeŭna, jany sapraŭdy aburanyja byli, i ŭsio ž prostyja ludzi na ich baku. Ja nie kažu, što heta treba zaachvočvać. Nie zaachvočvajučy, razumieć hetych ludziej, jakija pajšli na hetuju krajniuju mieru. Kali treba pryniać rašeńnie ŭ ramkach zakanadaŭstva, ja hatovy pryniać, ale mnie padajecca, vy bieź mianie tam prymiecie rašeńnie. Hetych ludziej treba adpuścić, vieści śledstva, niachaj heta śledstva idzie. I navat prašu publična, nie saromiejučysia, sud, kab vy vielmi ŭvažliva pastavilisia, i kali jość mahčymaść, padtrymali hetych ludziej. Nielha ich sadžać! Što heta — vialiki čałaviek zahinuŭ? Pa turmach tulaŭsia, pryjšoŭ i jašče teraryzuje cełuju viosku».

Adzin z abvinavačvanych, Andrej Pietručenia, paviedamiŭ BiełaPAN, što ŭ vioscy jaho vyzvaleńnie ŭspryniali stanoŭča, susiedzi i blizkija sustreli ich dobra. Pavodle jaho słoŭ, zabity pahražaŭ jaho maci, paliŭ stahi siena.

Heta nie pieršy vypadak samasudu ŭ vioskach biełaruskaha Paleśsia.

Alena Hiermanovič, BiełaPAN

• 0
• 0
• 0
• 0
• 0
• 0
• 0
• 0