Chronika represij i supracivu 6–13 červienia

4 červienia: zatrymańnie ŭ Salihorsku

U Salihorsku padčas raspaŭsiudu hazety «Tovariŝ» zatrymany niepaŭnaletni moładzievy aktyvist Alaksiej Jankovič.

5 červienia: aryšt brata Kazulina

Na 5 sutak u Miensku aryštavany Ŭładzimier Kazulin, brat eks-kandydata ŭ prezydenty. Sud adbyŭsia zavočna, pra prysud U.Kazulin daviedaŭsia praź miesiac paśla jaho vyniasieńnia.

Na pastara carkvy «Novaje žyćcio» Viačasłava Hančarenku skłali pratakoł za bohasłužeńnie biez dazvołu ŭłady ŭ nieprystasavanym pamiaškańni.

6 červienia: papiaredžańnie baćku haładoŭnikaŭ

Uładzimieru Šyłu z Salihorsku, baćku haładoŭnikaŭ Ivana dy Illi, prakuratura vyniesła papiaredžańnie z pryčyny ŭdziełu synoŭ u haładoŭcy.

Žurnalist «Komsomolskoj pravdy» Aleh Ulevič atrymaŭ z Hałoŭnaha ŭpraŭleńnia ŭnutranych spravaŭ Mienharvykankamu paviedamleńnie, što kryminalnaja sprava pa jahonym źbićci 2 sakavika prypynienaja «ŭ suviazi ź nievyśviatleńniem asoby, jakuju naležyć pryciahnuć u jakaści abvinavačanaha».

Redakcyja i zasnavalnik niedziaržaŭnaha histaryčna-litaraturnaha časopisu «Lidski letapisiec» atrymali papiaredžańni ad Ministerstva infarmacyi za źmienu peryjadyčnaści vychadu vydańnia, adsutnaść svoječasovaj abaviazkovaj rassyłki j niepraŭdzivyja daty vychadu ŭ śviet u niekalkich numaroch. Abodva papiaredžańni padpisała 31 traŭnia namieśnica ministra Lilija Ananič.

Horacki rajonny sud pakaraŭ štrafam u 20 bazavych vieličyniaŭ pradprymalnika Dziamjana Frankoŭskaha, jaki raspaŭsiudžvaje niedziaržaŭnyja vydańni. Farmalnaj padstavaj stała pravierka jaho handlovaj kropki padatkovaj inspekcyjaj.

U Horadni 6 červienia na dopyt u prakuraturu ŭ spravie «Maładoha frontu» vyklikany moładzievy aktyvist Źmicier Cieślanok. Dopyt doŭžyŭsia 3 hadziny.

8 červienia: kanfiskacyja majomaści Sajuzu biełaruskich piśmieńnikaŭ

U Miensku sudovyja vykanaŭcy pačali «pierapis» majomaści HA «Sajuz biełaruskich piśmieńnikaŭ»: pavodle rašeńnia sudu za pazyki SBP maje spłacić Hałoŭnamu haspadarčamu ŭpraŭleńniu Kiraŭnictva spravaŭ prezydenta 55,5 młn rub.

Ź Biełarusi departavali hramadzianina Ŭkrainy Artema Čyściakova, zatrymanaha 5 červienia pierad pačatkam pikietu suprać prymusovaj departacyi ź Biełarusi ŭ časie i paśla prezydenckich vybaraŭ zamiežnych hramadzian. Usich zatrymanych, aprača Artema, vypuścili praź niekalki hadzinaŭ, a jaho advieźli ŭ turmu na Akreścina.

Prakuratura Biełarusi vystaviła abvinavačańnie redaktaru hazety «Zhoda» Alaksandru Źdźvižkovu ŭ kryminalnaj spravie pa pieradrukoŭcy karykaturaŭ na praroka Mahameta. Adpaviednaja pastanova źjaviłasia jašče ŭ sakaviku, nieŭzabavie spravu mohuć pieradać u sud.

Druhoje aficyjnaje papiaredžańnie ad Prakuratury Biełarusi atrymaŭ Aleh Manajeŭ, dyrektar Niezaležnaha instytutu sacyjalna-ekanamičnych i palityčnych daśledavańniaŭ, zarehistravanaha ŭ Vilni. Navukoŭcu prapanavali spynić raspaŭsiud źviestak pra vyniki hałasavańnia na prezydenckich vybarach i nie pravodzić sacyjalna-palityčnyja daśledavańni, «što parušajuć patrabavańni zakanadaŭstva». Papiaredžańnie padpisaŭ namieśnik hienprakurora Mikałaj Kupryjanaŭ.

U Žłobinie adbyŭsia zaklučny dopyt moładzievaha aktyvista Eduarda Zielankova, abvinavačanaha va ŭdziele ŭ niezarehistravanaj arhanizacyi «Małady front».

Śledčy ŭ spravie Alaksandra Kazulina admoviŭ u spatkańni z palitviaźniem jahonaj dačce Julii j rodnaj siastry Alenie.

Bieraściejski abłasny sud skasavaŭ pastanovu sudu Leninskaha rajonu Bieraścia ab pakarańni za niecenzurnuju łajanku Źmitra Šymanskaha, kiraŭnika abłasnoha štabu Milinkieviča na vybarach. Precedent, pra jaki idzie havorka, adbyŭsia 24 sakavika, kali Šymanski vychodziŭ ź izalataru časovaha ŭtrymańnia: milicyjanty M.Łosič i A.Bliźniuk chłuśliva abvinavacili jaho ŭ łajancy. Asudzili jaho 5 traŭnia zavočna na 1 b.v. Ciapier sud skasavaŭ raniejšuju pastanovu j adpraviŭ spravu na paŭtorny razhlad.

9 červienia: haładoŭnik straciŭ prytomnaść

U Žodzinie haładoŭnik Siaržuk Hudzilin straciŭ prytomnaść, daktary pastavili jamu kropielnicu z hlukozaj. U Miensku chutkuju dapamohu vymušany byŭ vyklikać Źmicier Chviedaruk, jakomu zrabili niekalki ŭkołaŭ. Jon, Jaŭhien Skrabutan (Horadnia), Ihar Ščekarevič (Łucak, Ukraina), Siaržuk Čajka (Lida) praz kiepskaje samačućcie spynili haładoŭku.

Mikałaj Aŭtuchovič u adkaz na prośby siabroŭ i kaleh spynić haładoŭku daŭ zhodu pić vadu.

Moładzievaha aktyvista ź Miensku, haładoŭnika Źmitra Daškieviča vyklikali ŭ prakuraturu dla pakazańniaŭ u kryminalnaj spravie «Maładoha frontu».

Irynu Kazulinu, žonku eks-kandydata ŭ prezydenty, zatrymlivali ŭ aeraporcie pry vylecie ź Biełarusi: u samalot joj udałosia trapić za 7 chvilinaŭ da adlotu.

Kiraŭnictva Svabodnaha prafsajuzu Biełaruskaha atrymała list ad Minjustu z patrabavańniem u miesiačny termin padać u Połacki harvykankam dakumenty, jakija paćviardžajuć najaŭnaść juradrasu prafsajuznaj supołki na AAT «Połacak-Škłovałakno». Administracyja pradpryjemstva admoviła supołcy ŭ padaŭžeńni arendnaj damovy jašče ŭ listapadzie 2005 h.

U Biełaruś nie puścili 60 udzielnikaŭ chrosnaha chodu z Adesy ŭ padmaskoŭny Sierhijeŭ Pasad: ad ich patrabavali dazvoł ad miascovych uładaŭ i błasłavieńnie ad Biełaruskaj Pravasłaŭnaj Carkvy.

11 červienia: fłeš-mob na Kastryčnickaj

Paśla fłeš-mobu ŭ pamiać namiotavaha miastečka – udzielniki stavili na płoščy biełyja i čyrvonyja papiarovyja namiociki – zatrymanyja moładzievyja aktyvisty Alaksiej Kazulin i Ivan Burykin.

12 červienia: deputat Zarambiuk dałučyŭsia da haładoŭki

Suprać inspektara milicyi I.Šabłova raspačataje dyscyplinarnaje raśśledavańnie: padstavaj stała skarha Valerja Ščukina, jakoha milicyjant niezakonna zatrymaŭ padčas prezydenckaj vybarčaj kampanii.

Da haładoŭki moładzievych aktyvistaŭ dałučyŭsia deputat Mastoŭskaha rajsavietu Aleś Zarambiuk.

Artur Fińkievič atrymaŭ pazoŭ u adździeł vykanańnia pakarańniaŭ Zavodzkaha rajonu Miensku na 15 červienia: jamu musiać nazvać miesca, dzie jon budzie adbyvać pakarańnie.

AŠ

• 0
• 0
• 0
• 0
• 0
• 0
• 0
• 0