Staršynia Pałaty pradstaŭnikoŭ: 60% biełarusaŭ suprać śmiarotnaha pakarańnia
Padčas sustrečy z pasłom Aŭstryi ŭ Biełarusi Ałaizaj Vierhieter kiraŭnik Pałaty pradstaŭnikoŭ Uładzimir Andrejčanka vykazaŭ dumku, što pravodzić referendum ab admienie śmiarotnaha pakarańnia dačasna, piša Radyjo Svaboda.
Pavodle jahonych źviestak, kala 60% nasielnictva krainy hatovyja vykazacca suprać skasavańnia najvyšejšaj miery.
Jak zajaviŭ Andrejčanka, adrozna ad jeŭrapiejskich krain, jakija prajavili ŭ hetym pytańni palityčnuju volu, Biełaruś tak zrabić nie moža. Jon abhruntavaŭ svaju pazicyju tym, što ŭ svoj čas na patrabavańnie Rady Jeŭropy biełaruskaje kiraŭnictva inicyjavała refierendum, pa vynikach jakoha kala 80% udzielnikaŭ vykazalisia za zachavańnie śmiarotnaj kary.
«Adpaviedna, my nie možam pryniać niejki zakon ci ŭkaz, tym samym skasavaŭšy śmiarotnaje pakarańnie, nie paraiŭšysia ź ludźmi», — skazaŭ Andrejčanka, padkreśliŭšy, što apošnim časam u Biełarusi na hety kont pravodzicca vialiki abjom tłumačalnaj pracy. Tamu projdzie čas — i pytańnie budzie vyrašanaje, ličyć jon.
Pytańnie pravoŭ čałavieka i admieny śmiarotnaha pakarańnia ŭźnikła z padačy aŭstryjskaj ambasadarki. Jana adznačyła, što Aŭstryja atrymlivaje stanoŭčuju infarmacyju ab pieraŭtvareńniach u Biełarusi. Adnak Aŭstryju tryvožyć toje, što Biełaruś jak apošniaja kraina Jeŭropy nie prymaje nijakich zachadaŭ dla abviaščeńnia maratoryju na najvyšejšuju mieru pakarańnia.
Uładzimir Andrejčanka na heta adkazaŭ, što peŭnyja kroki robiacca. U pryvatnaści, zaćvierdžany nacyjanalny płan ab harantavańni pravoŭ čałavieka i abmiarkoŭvajecca miechanizm źmienaŭ u vybarčym zakanadaŭstvie.
«Adnak u lubym pytańni my nie budziem unosić revalucyjnyja źmieny, — dadaŭ Andrejčanka. — Bo najpierš nia chočam stracić samaje hałoŭnaje, što jość u Biełarusi, — stabilnaść».
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary