Źjaŭlajucca pieršyja ličby hałasavańnia na parłamienckich vybarach. Na vybarčaj akruzie ŭ Stoŭbcach Minskaj vobłaści na peŭnych učastkach pieramoha dastajecca kandydatu ad apazicyi — Mikałaju Łysionkavu.
Jon aktyvist «Havary praŭdu», a vyłučany ad Biełaruskaj sacyjał-demakratyčnaj Hramady. Łysionkavu 39 hadoŭ. Jon skončyŭ BDATU. Papracavaŭ namieśnikam načalnika adździeła sielskaj haspadarki Staŭbcoŭskaha rajvykankama, dyrektaram kałhasa «Žoŭty bierah», načalnikam adździełu ŭ «Minskchlebpramie».
U 2017 staŭ aktyvistam «Havary praŭdu». «Staŭ šukać apazicyju, zahuhliŭ, znajšoŭ «Havary praŭdu», jany samyja aktyŭnyja, mnie padabajecca ź imi supracoŭničać», — kaža Łysionkaŭ.
Ciapier jon pracuje indyvidualnym pradprymalnikam, maje kramu pa prodažy karmoŭ dla žyvioł u Stoŭbcach. «Mianie ŭ horadzie ŭsie viedajuć. Spytajcie luboha. Heta Mamajka [načalnik miascovaj milicyi, kandydat u deputaty — «NN»] na ludzi nie vychodziŭ, tolki ŭ kabinietach siadzieŭ, a ja zaŭsiody ź ludźmi», — raskazvaje kandydat.
Łysionkaŭ byŭ u svoj čas deputatam rajonnaha savieta. «Viedajecie, jak heta adbyvajecca? Da mianie pryjšli i spytali, ci chaču ja być deputatam. Adkazaŭ, što chaču, praz paru miesiacaŭ staŭ. Ja ničoha dla hetaha tady nie rabiŭ».
Mikałaj Łysionkaŭ aficyjna pieramoh u vioscy Stary Śvieržań. Tam za jaho addali hałasy 394 čałavieki, a za Mamajku — 291. Pieramahaje Łysionkaŭ i padčas hałasavańnia ŭ asnoŭny dzień pa Stoŭbcach, asabliva pa tych akruhach, dzie było nazirańnie, ale ŭ cełym pieramohu pišuć Ivanu Mamajku, jaki, padobna, i stanie deputatam.
Raniej deputatam ad Staŭbcoŭskaj akruhi była staršynia Tavarystva Biełaruskaj movy Alena Anisim.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»24
Kamientary