Pažyłoha narviežskaha turysta Daha Viviestada zatrymali ŭ Breście paśla bojki ź niejkimi maładzionami. Narviežca zakryli ŭ SIZA i vystavili jamu abvinavačvańnie ŭ seksualnym hvałcie nad 10-hadovaj dziaŭčynkaj.
Padrabiaznaści raspaviała plamieńnica Viviestada, Kamiła. Pa jaje słovach, 71-hadovy Dah Viviestad — były buchhałtar, jaki siońnia na piensii. Jon, pa jaje słovach, vielmi cikaviŭsia historyjaj i asabliva Druhoj suśvietnaj vajnoj, tamu apošnim časam padarožničaŭ pa miescach, źviazanych z padziejami vajny.
Raniej Dah užo byŭ u Biełarusi razam z žonkaj. A ŭ vieraśni 2019 hoda pryjechaŭ jašče raz, ciapier užo ź siabram. Razam jany naviedali Brest.
«29 vieraśnia moj dziadźka i jaho siabar nakiroŭvalisia ŭ hatel z restarana, u jakim jany tolki što paviačerali, bo viedali, što kala hatela jość stancyja taksi. Kali jany prybyli ŭ kalidor hatela, u faje ich sustreła maleńkaja dziaŭčynka i dva jaje małodšyja braty. Jany pryjšli ź viasiella, jakoje adbyvałasia ŭ adnym z restaranaŭ. Moj dziadźka byŭ ździŭleny, što dziaŭčynka va ŭzroście 10 hadoŭ havaryła pa-anhielsku, i jon prosta chacieŭ zaklikać jaje praciahvać dobruju pracu, praciahvać vučycca i praktykavać. Razmova pamiž imi doŭžyłasia kala dźviuch chvilin. Kali moj dziadźka raźvitaŭsia, hrupa mužčyn ź viasiella padyšła da majho dziadźki dy jaho siabra i pačała ich źbivać. Nieŭzabavie paśla hetaha pryjšła palicyja i ŭziała majho dziadźku i jaho siabra pad vartu», — paviedamiła Kamiła.
Pa jaje słovach, Viviestada pakinuli pad vartaj, jaho siabra adpuścili. Nieŭzabavie siabar viarnuŭsia ŭ Osła. Kamiłła śćviardžaje, što ŭ mužčyny paśla źbićcia pačaŭsia «ŭnutrany kryvaciok u mozhu», i pa prybyćci ŭ aeraport u Osła jaho adrazu ž adpravili ŭ balnicu i praapieravali.
Ale ž Dah Viviestad zastaŭsia pad vartaj. Jaho źmiaścili ŭ SIZA, dzie jon znachodzicca i pa siońnia. 71-hadovamu narviežcu tolki niadaŭna ahučyli abvinavačvańni, śćviardžajuć jaho svajaki. A abvinavačvańni surjoznyja: śledčyja ličać, što Viviestad datykaŭsia da intymnych miescaŭ dziaŭčynki. Heta rasceńvajecca jak abvinavačvańnie ŭ hvałtoŭnych dziejańniach seksualnaha charaktaru ŭ adnosinach małaletniaj asoby. Pakarańnie žorstkaje: ad 8 da 15 hadoŭ.
Ale ž čamu hetuju historyju ahučyli tolki zaraz?
«Tema vielmi tonkaja. Siamja nie chacieła, kab imia Daha było źviazanaje z temaj seksualnaha hvałtu nad dziećmi, — raspaviała Kamiła «Našaj Nivie». — Ale ja rastłumačyła svajakam, što nam pryjdziecca padniać temu publična. Inšaha varyjanta paŭpłyvać na toje, kab jaho adpuścili, prosta niama. Jaho try miesiacy trymajuć pad vartaj, choć dokazy jaho nievinavataści mocnyja. Ale heta nikoha nie cikavić».
Śledčy kamitet paćvierdziŭ, što rasśledavaŭ spravu hramadzianina Narviehii, ale prakamientavać jaje nie moža, bo dakumienty ŭžo pieradali ŭ prakuraturu.
Jak stała viadoma «Našaj Nivie» z prakuratury, dakumienty ŭžo pastupili ŭ sud Maskoŭskaha rajona Bresta. Data pasiadžeńnia budzie pryznačanaja prykładna praz tydzień. Ale viadoma, što praces budzie zakrytym.
Kamientary