Partyja «Spraviadlivy śviet» u sacyjalnych sietkach abvieściła ab nabory ludziej u inicyjatyŭnuju hrupu kandydata ad partyi na prezidenckija vybary. Praŭda, jak kaža lidar apazicyjnych kamunistaŭ, kančatkovaje rašeńnie, ci vystaŭlać ułasnaha kandydata, jašče nie pryniali.
«Rašeńnie budzie prymacca ŭ krasaviku na źjeździe «Spraviadlivaha śvietu». Spačatku abvieścim nabor u hrupu, a pa vynikach pahladzim, ci varta ŭpisvacca ŭ kampaniju. Razumieju, što na siońnia źbirać podpisy vielmi-vielmi składana. Kab sabrać 100 tysiač podpisaŭ, patrebnaja inicyjatyŭnaja hrupa na 5000 čałaviek, kažu jak kiraŭnik štaba Alaksandra Milinkieviča na vybarach-2006», — havoryć lidar «Spraviadlivaha śvietu» Siarhiej Kalakin.
«Žadańnia iści na prezidenckija vybary niama ni ŭ kaho. Treba być nieadkvatnym, kab takoje žadańnie było. Navat pry ŭmovie taho, što my źbiarom 100 tysiač podpisaŭ, heta ničoha nie aznačaje pry ciapierašnim padliku hałasoŭ, kali nichto nie viedaje, jak realna hałasujuć ludzi. Tym nie mienš ja razumieju, što ŭdzielničać u vybarach varta», — praciahvaje lidar kamunistaŭ.
Siarhiej Kalakin havoryć pra toje, što zusim nie abiaviazkova mienavita jon stanie kandydatam ad partyi. «U nas jość maładyja siabry, jakija dakładna nie buduć horš za tych kandydataŭ, jakija zaraz udzielničajuć u prajmieryz ad pravacentrystaŭ.
Heta i Alaksandr Vinahradaŭ [doktar ź Viciebska — «NN»], i Alaksiej Jelisiejeŭ [historyk ź Minska — «NN»], i Viktar Michalčyk [biznesmien z Hrodna — «NN»]».
Palityk nie škaduje ab tym, što jahonaja partyja nie ŭdzielničaje ŭ kampanii prajmieryz. «Varjackaja ideja, nielha ździekavacca ź ludziej! Takija abjadnańni viaduć da taho, što prahrama kandydata stanovicca bolš kampramisnaj, a hetaj nie dadaje novych prychilnikaŭ, zatoje adymaje starych». U jakaści prykładu jon zhadvaje historyju, kali PKB [staraja nazva «Spraviadlivaha śvietu»] padtrymała na vybarach Milinkieviča.
«Nie samaje lepšaje było rašeńnie: častku prychilnikaŭ my tady stracili. Pahladzim, što budzie z hetymi vybarami, moža, ludzi hatovyja padtrymać nas i zapišucca ŭ inicyjatyŭnuju hrupu. A moža, budzie takaja ž abyjakavaść, jak u 2015-m, a my tolki hvałtujem ludziej, jakim ničoha nie patrebna», — skančvaje kiraŭnik «Spraviadlivaha śvietu».
Ciapier čytajuć
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j10
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Kamientary