Žychary Pleščanicaŭ nie chočuć jeździć dadatkovyja 5 kiłamietraŭ i patrabujuć pabudavać raźviazku na M3
Sotni žycharoŭ miastečka Pleščanicaŭ, u jakim ahułam žyvuć kala 6500 čałaviek, padpisali kalektyŭny zvarot z prośbaj pabudavać jašče adnu raźviazku na trasie M3 Minsk — Viciebsk. Jany narakajuć, što inačaj kožnamu ź ich daviadziecca štodnia prajazdžać dadatkovyja piać kiłamietraŭ.
Z daŭnich časoŭ praź Pleščanicy pierpiendykularna prachodzili dźvie darohi, Minsk — Viciebsk i Barysaŭ — Ašmiany (R63). Paśla vakoł Pleščanicaŭ pabudavali abjaznuju darohu, kab trafik pa M3 nie išoŭ praz centr miastečka.
U vyniku na skryžavańni abjaznoj darohi i staroha prajezda da Pleščanicaŭ utvaryłasia avaryjnaje miesca. Tyja, chto jeduć ź Minska i zvaročvajuć naleva ŭ Pleščanicy, pavinny prapuskać sustrečny trafik, jaki rušyć ź Viciebska ŭ Minsk. I choć chutkaść abmiežavanaja 40 km/h, avaryi adbyvajucca pastajanna.
Ciapier M3 rekanstrujujuć. Miascovym žycharam spačatku paabiacali pabudavać nievialikuju raźviazku, kab mašyny raźjechalisia na roznych uzroŭniach. Ale ciapier płany ŭ metach ekanomii pierahledzieli. Na miescy ciapierašniaha skryžavańnia zamiest raźviazki zrobiać barjer. Levy pavarot prosta zabaroniać.
Tym, chto rušyć ź Minska ŭ Pleščanicy, prapanujuć prajechać niekalki kiłamietraŭ da nastupnaj raźviazki z R63, a paśla na joj paviarnuć u Pleščanicy. Atrymlivajecca dadatkovyja 5 kiłamietraŭ.
Nu a tyja, chto kirujecca ŭ Minsk, zmohuć jechać pa-staromu, bo kanfliktu levaha pavarotu dla ich niama.
Žychary pierakananyja, što ich ahulnyja straty praz dadatkovy prabieh buduć značna vyšej za košt budaŭnictva raźviazki, a tamu praciahvajuć pierapisku z čynoŭnikami.
Kamientary