Ułady Rasii chavajuć infarmacyju pra maštaby epidemii? Łukašenka: «Jak skazaŭ premjer Rasii, u ich pažar: nie ŭsio ŭ ŚMI davali»

Kiraŭnik Biełarusi padvierh kiraŭnictva Rasii krytycy za adnabakovaje rašeńnie pra zakryćcio miažy miž krainami dla pasažyrskaha ruchu.

Alaksandr Łukašenka adznačyŭ, što za im staić prychoŭvańnie realnaj situacyi ź virusam u Rasii, ale nazvaŭ reakcyju rasijskaha kiraŭnictva nieadpaviednaj.

«Jak učora skazaŭ premjer Rasii, u ich pažar: nie ŭsio ŭ ŚMI davali. U ich ciažkaja situacyja. Tak nam treba bajacca hetaj situacyi, vy čaho baiciesia Biełarusi? Prytym pry takim našym kantroli i staŭleńni da hetaj prablemy. Davajcie razam heta rabić — nie, zakryli. Što ž, heta ich sprava», — padsumavaŭ Alaksandr Łukašenka.

Jon padkreśliŭ, što ŭ situacyi, jakaja skłałasia, hałoŭnaje, kab nie paciarpieli ludzi i ekanomika. «A što dumaje ŭrad Rasii ŭ hetaj situacyi? Bo za hod 110 młn t hruzu pieramiaściłasia tranzitam. Jany što, praz Ukrainu damovilisia vazić? Tak Ukraina daŭno zakryłasia. Praz Prybałtyku? Jana taksama zakryłasia. Jak jany buduć naohuł hetyja hruzy pieramiaščać? Moža, nam padumać, a raptam virus u trubie z naftaj abo z pryrodnym hazam? 70 młn t nafty transpartujuć pa naftapravodzie «Družba». Voś što dumali ludzi, kali prymali takija rašeńnie?» — zadaŭsia pytańniami jon.

Taksama jon vykazaŭ nierazumieńnie, a što buduć rabić biełaruskija i rasijskija hramadzianie, jakija pracujuć abo vučacca ŭ inšaj krainie. «Jak možna prymać takija rašeńni? Nie paraiŭšysia, pastavić pierad faktam. Heta dla mianie niezrazumieła. I samaje cikavaje: kali ŭžo zakryvać miažu — heta, napeŭna, nie ŭrada sprava. Heta rašeńnie pavinien prymać prezident krainy», — zaŭvažyŭ Alaksandr Łukašenka. Jon raspavioŭ, što pakul nie źviazvaŭsia z rasijskim lidaram, ale telefonnaja razmova pamiž prezidentami zapłanavana. «Moža, jany ŭžo pa novaj Kanstytucyi žyvuć? Chto jaho viedaje», — iranizavaŭ kiraŭnik dziaržavy.

Alaksandr Łukašenka zaklikaŭ rasijski bok i žycharoŭ dźviuch krain nie stvarać paniku. «Nie treba lišnich ruchaŭ, jakija b ŭskładnili i tak niaprostyja na siońniašni dzień adnosiny pamiž dźviuma dziaržavami», — skazaŭ jon.

Jon pacikaviŭsia, što ŭ hetaj situacyi prapanujuć raspačać u Biełarusi. Jon adznačyŭ, što kali kraina pojdzie na miery ŭ adkaz, to «da Kramla fury buduć stajać u čarzie, a ludzi buduć u šalenstvie».

«Nam treba, zrabiŭšy vysnovy, dakładna vyznačycca, jak budziem dziejničać dalej. Adzinaje, paprašu (ja ŭčora i premjer-ministru daručyŭ): nie pavinny paciarpieć ludzi. Nam nie treba zakryvać ni ad palakaŭ, ni ad rasijanaŭ, ni ad ukraincaŭ. Jany chočuć — chaj zakryvajucca. Nam nie treba hetaha rabić, bo heta pustoje. Zakrycca ŭsio roŭna my nie zmožam, heta niemahčyma. Asabliva tam, dzie niama miažy z Rasijaj: tam ludzi stahodździami chadzili i buduć chadzić, i kali, nie daj boh, ŭžo niejkaja čuma, to my jaje terytaryjalna nie pieramožam. Treba dziejničać tak, jak my dziejničajem ciapier: niejkaje padazreńnie — my praviarajem čałavieka, treba na karancin — kali łaska, davajcie na karancin. ​​Mienavita kropkava, prafiesijna treba dziejničać, a nie terytaryjalna: pierakryli, zakryli», — pierakanany biełaruski kiraŭnik.

• 0
• 0
• 0
• 0
• 0
• 0
• 0
• 0