Tolki žančyny. Top-10 biełaruskich hurtoŭ, jakija varta pačuć 

Eks-salistka Opiernaha i aktrysa dramatyčnaha teatra, rok-kniazioŭna i elektronnaja pryncesa, vakalny imidžmiejkier i paazierskaja rusałka. Na hetych vykanaŭcaŭ źviarnuŭ uvahu aŭtar prahramy Belsat Music Live Siarhiej Budkin, jaki skłaŭ rejtynh samych cikavych biełaruskich prajektaŭ roznych stylaŭ z žanočym vakałam dla TUT.BY.

Shuma

Zacikavić taho, chto słuchaje: Onuka, AIHJeŁ, atlantida project, Sevdaliza, Deep Forest, Kriwi, Kazalpin.

Prajekt, jaki źjaŭlajecca honaram biełaruskaj elektronnaj muzyki. Muzyki sumiaščajuć modnyja kirunki z staražytnymi narodnymi śpievami. Hołas prajekta — Rusia, raniej jana była vakalistkaj hurta Indiga i pryznavałasia «rok-kniazioŭnaju». Jana vystupaje z dydžejem Alaksiejem Budźko, na zapisach da jaje dałučajecca druhaja vakalistka — Nadzieja Čuhunova. Akramia «Šumy» Rusia, jakaja nazyvaje siabie «vakalnym imidžmiejkieram», vučyć achvočych, jak kiravać svaim hołasam pa svajoj unikalnaj mietodycy.

Što pasłuchać novaha: albom Me, Mother i klip Galochki.

Mustelide

Zacikavić taho, chto słuchaje: Björk, Baltra, Chromatics, Stereolab, Alpha-Beta, Linda, Monoconda, Ana Zhdanova, ayva.

Prajekt Natalli Kunickaj, jakaja była kłavišnicaj takich hurtoŭ, jak UlIS i «Sieriebrianaja svad́ba», a potym vyrašyła adpravicca ŭ volnaje płavańnie dy rabić elektronnuju tancavalnuju muzyku. Jaje albomy niaźmienna traplajuć u lik najlepšych u svaim styli, jak u Biełarusi, tak i Rasii. Z łajv-setami jana abjeździła ŭvieś śviet i pastajanna pryciahvaje ŭvahu svaimi ekśpierymientami. Apošni albom, naprykład, Nataša skanstrujavała z hukaŭ złamanych arkiestravych instrumientaŭ.

Što pasłuchać novaha: hety samy albom «Žienŝina-žieńšień», jaki vyjšaŭ na łejble Ivana Dorna, i klip na sumiesnuju z šamanam z Kienii pieśniu, źniaty ŭ ZŠA.

Kriwi

Zacikavić taho, chto słuchaje: Norah Jones, Cesaria Jevora, Manu Chao, Dakha Braha, «Pałac», Harotnica mix.

Lehiendarny hurt z etna-chvali siaredziny 1990-ch, jaki razam z «Troicaj» i «Pałacam» viarnuŭ intares biełarusaŭ da svajho falkłoru. Praź jaho prajšli takija muzyki, jak Jury Vydronak, Źmicier Vajciuškievič i Pit Paŭłaŭ. U apošnija 17 hod Kriwi vystupaje ŭ farmacie žanočaha tryo — razam ź niaźmiennaj vakalistkaj Vieranikaj Kruhłovaj śpiavajuć Nasta Chmiel i Valeryja Vaładźko, jakaja jašče dziaŭčynkaj uvajšła ŭ skład hurta. Valeryja, darečy, saliruje ŭ jašče adnym cikavym prajekcie — Harotnica mix.

Što pasłuchać jašče: niadaŭna vyjšaŭ mini-albom Kumački ź piaćciu novymi pieśniami - pieršy reliz hurta za siem hadoŭ.

Cherryvata

Zacikavić taho, chto słuchaje: Massive Attack, Morcheeba, Portishead, Hooverphonic, Jamala, Shuma.

Pijaniery biełaruskaj elektronnaj muzyki, jakija pieražyli niekalki reinkarnacyj. Pieršuju viadomaść hurtu prynieśli pieśni ŭ vykanańni Viery Novikavaj, potym Cherryvata na niejki čas staŭ bojz-bendam, paśla u im sprabavała svaje siły Rusia. Apošniaje ich viartańnie na scenu źviazanaje z uładalnicaj admietnaha vakała Kaciarynaj Štyrc, miž inšym byłoj vakalistkaj biełaruskaj opiery i piedahoha pa vakału. Ciapier hurt źbiraje srodki na zapis novaha studyjnaha alboma.

Što pasłuchać jašče: albom Daybreak, zapisany z Kaciarynaj Štyrc, i zusim novy sinhł Sputnik, zapisany z Aniaj Ždanavaj — taksama admietnaj vakalistkaj, jakaja maje svoj solny prajekt.

Dzivasil

Zacikavić taho, chto słuchaje: FKA Twigs, Nina Simone, King Nomfusi, Elsiane, Inna Žiełannaja, Irena Katvickaja, Shaman Jungle.

Biełaruski etna-embijent. Ich pieśni pasujuć dla miedytacyi, rozdumu dy rełaksu. Muzyki cpałučajuć u svajoj tvorčaści etničnuju i elektronnuju muzyku. Hołas kalektyvu — piedahoh pa vakale Ina Pierasieckaja-Małakovič, jakaja piaje niby pa toj bok realnaści, stvarajučy asablivuju futurystyčnuju atmaśfieru. Akramia ułasna kancertaŭ, hurt stvaryŭ muzyku dla śpiektaklaŭ, rekłamy i navat dla pakazu mod u Łondanie.

Što pasłuchać jašče: zapisy trya dastupnyja na ich kanale na Soundcloud, klip na pieśniu «Piaski času», kadry dla jakoha režysior Maks Siry źniaŭ u Siryi.

Irdorath

Zacikavić taho, chto słuchaje: Blackmore's Night, Tarja, Santiano, Corvus Corax, «Mielnica», «Kalevała», «Młyn Sonca», «Stary Olsa».

Folk-fentezi hurt, jaki prajšoŭ šlach ad vuličnych vystupaŭ u rodnaj Harodni da vialikich solnikaŭ i vystupaŭ na aŭtarytetnych zamiežnych festach. Jany stali pieršymi biełarusami, jakija vystupili na najbujniešym mietał-feście Jeŭropy Wacken Open Air, a letaś dali kancerty ŭ 12 krainach Jeŭropy. Natchniajucca muzyki muzykaj narodaŭ śvietu, tamu ŭ ich repiertuary možna pačuć makiedonskija i francuzskija śpievy, pieśni na łatyni, nu i apracoŭki biełaruskaha falkłoru samo saboj.

Što pasłuchać jašče: śviežy sinhł Serca raskolata i pryhožy klip na hetuju pieśniu.

Ilužan

Zacikavić taho, chto słuchaje: Nino Katamadzie, Dakh Daughters, Jamala, Melody Gardot, Diana Krall, BosaeSonca, Paulinn.

Bahaty nasyčany huk z vykarystańniem mnostva instrumientaŭ, pry hetym akustyčnych. Pryhožy pałynovy vakał. I miakkaja dalikatnaja muzyka. Usio heta robić etna-f́južn hurt «Ilužan» admietnym. Ich muzyka kranuła serca śpiavački Nino Katamadze, jakaja nie tolki ŭchvaliła ich biełaruskamoŭnuju viersiju Once in the Street, ale i zaprasiła vakalistku Kaciu Alichvier vykanać jaje na svaim solnym kancercie ŭ Minsku.

Što pasłuchać jašče: albomy hurta možna pasłuchać na ich staronkach u Bandcamp i Soundcloud.

Loudscage

Zacikavić tych, chto słuchaje: Korn, Linkin Park, Slipknot, System of A Down, Otep, Louna, Mauzer.

Hurt z ekstrym-vakałam Marho Davidovič — adkryćcio na biełaruskaj alternatyŭnaj scenie apošnich hod. Movaju svajoj liryki muzyki abrali anhlijskuju, ale nieŭzabavie paśla reliza da ich pryjšło razumieńnie, što bolš cikava i admietna jany hučać z tekstami na rodnaj movie. U vyniku jany pierakłali svaje pieśni, pierazapisali i pieravydali debiutny albom pa-biełarusku. Cikava, što ŭ hurcie jość jašče adna dziaŭčyna — bubnačka Inha Milistfier, jakaja pryjšła ŭ niu-mietał z džaz-benda.

Što pasłuchać jašče: EP «Nikoli-nazaŭždy» u dźviuch moŭnych viersijach — pa-biełarusku i pa-anhlijsku, plus śviežaje videa na pieśniu «Zabyćcio».

Naka

Zacikavić tych, chto słuchaje: Patti Smith, The Cranberries, Blondie, The Hardkiss, Barto, Diana Arbienina, Volski, Nizkiz.

Rok-prajekt akciorki Horkaŭskaha teatra Nasty Špakoŭskaj, jaki letaś adznačyŭ 15-hodździe dziejnaści. Złabadzionnyja teksty z zaklikam da dziejańnia, niervovy vakał, žorstkaja łamanaja muzyka — voś toje, što charaktaryzuje hety hurt, praź jaki prajšli samyja znakavyja biełaruskija instrumientalisty. Niaźmiennymi zastajucca tolki vakalistka Nasta Špakoŭskaja i kłavišnica Iryna Klimienka. U dziaŭčat taksama jość sajd-prajekt Naka Piano.

Što pasłuchać jašče: pieśnia «Ja budu žiť», zapisanaja razam z vakalistami Nizkiz i: B: N, novy studyjny trek «Niachaj tak» i śviažak pra nadzionnaje — «Pieśnia antyvirusnaha biełarusa».

Hanna Šarkunova

Zacikavić tych, chto słuchaje: Lady Gaga, «Vriemia i stiekło», Rihanna, Katy Perry, Selena Gomez, Nyusha, Nadia Dorofiejeva, VAL, D. Jaza.

Prykład dobraj i sučasnaj biełaruskaj pop-muzyki. Ania zrabiła sabie imia ŭ siaredzinie 2000-ch, kali pieśni «Proŝaj», «Sierdcie krasavicy», «Biełyj fłah» hučali adusiul. Uvieś hety čas jana praciahvaje trymać płanku jakaści i nie baicca ekśpierymientavać i pryjemna ździŭlać. Čaho vartyja tolki jaje nieadnaznačnaja interpretacyja «Voinov śvieta» i pryhožy duet sa Źmitrom Vajciuškievičam.

Što pasłuchać jašče: pieśnia «Rol vtoroho płana», jakaja całkam zasłužana nazvanaja najlepšaj pop-pieśniaj u Biełarusi ŭ 2019-m na «Pieśni hoda».

Dadadzim jašče dvuch vykanaŭcaŭ u jakaści bonusa.

Palina

Zacikavić tych, chto słuchaje: Regina Spektor, Alina Orlova, Pianoboy, Intelligency, Maryja Čajkoŭskaja, Dusia.

Try hady tamu dziaŭčyna-bard, jakuju za hod da paŭnalećcia nazvali hałoŭnym adkryćciom biełaruskaj muzyčnaj sceny, abnuliłasia — admoviłasia ad hurta, źmianiła stylistyku i navat sceničnaje imia. Palina Respublika stała padpisvacca Palina, akampanavać sabie sama, vykonvajučy letucienny indzi-pop. Jaje muzyčnyja pošuki ŭvasobilisia ŭ albomie «Hrustnyje pieśni», akramia taho biełaruskaja śpiavačka začaravała žury i hledačoŭ ukrainskaha šou «Ch-faktor».

Što pasłuchać jašče: liryk-videa na «Pinki», fit z Intelligency «Biełaruskaja pieśnia» i zusim novaja pieśnia «C2H5OH», u jakoj jana viartajecca da vytokaŭ - vobraza dziaŭčyny z hitaraj.

Śviatłana Bień (Bieńka)

Zacikavić tych, chto słuchaje: Liza Minnelli, The Tiger Lillies, The Dresden Dolls, Edith Piaf, «Umka i Bronievik», Viera Połozkova, Sounduk, BarRokka.

Cpiavačka, bieź jakoj taki rejtynh nie byŭ by poŭnym. I choć jaje hurt «Sieriebrianaja svad́ba» prypyniŭ isnavańnie bolš čym try hady tamu, Śviatłana zastajecca na scenie. Razam z režysioram Dźmitryjem Bahasłaŭskim jana pastaviła śpiektakl «Iz žiźni nasiekomych» na muzyku kampazitara Valeryja Voranava i vieršy paeta 1930-ch Mikałaja Alejnikava. I vykanała ŭsie vakalnyja partyi. Śpiektakl užo niekalki hod z pośpiecham demanstrujecca na roznych placoŭkach u Minsku i za miažoj.

• 0
• 0
• 0
• 0
• 0
• 0
• 0
• 0