U SBU zdaŭsia jašče adzin ukrainiec, zajaviŭšy, što jaho zavierbavali ŭ Biełarusi

Hramadzianin Ukrainy, uradženiec pamiežnaha ź Biełaruśsiu Repkinskaha rajonu Čarnihaŭskaj vobłaści, zajaviŭ, što ŭ žniŭni 2014 hodu byŭ zaverbavany biełaruskimi pamiežnikami dla zboru sakretnaj infarmacyi pra achovu ŭkrainskaj miažy, piša «Radyjo Svaboda».

Jak vynikaje z materyjałaŭ sudovaj spravy, biespracoŭny ŭkrainiec, jaki maje bazavuju siaredniuju adukacyju, u žniŭni 2014 hodu ŭ «hrupie ź inšymi asobami» pierasiek miažu ź Biełaruśsiu pa-za miežami punktu propusku. Jon nakiroŭvaŭsia da baćkoŭ, jakija žyvuć u vioscy na Homielščynie.

Pavodle ŭkrainca, verbavańnie adbyłosia ŭ adździele pamiežnaj bierahavoj achovy Homielskaj vobłaści, kudy jaho dastavili pamiežniki paśla zatrymańnia. Jon pahadziŭsia na supracu, kab paźbiehnuć štrafu za niezakonnaje pierasiačeńnie miažy, mahčymaj departacyi i dalejšaj zabarony na ŭjezd u Biełaruś.

Jon zajaviŭ SBU, što padpisaŭ piśmovuju zhodu na niehałosnuju supracu ź biełaruskimi pamiežnikami, a paźniej atrymaŭ zadańnie źbirać infarmacyju pra inžynernyja zbudavańni, asabovy skład, hrafiki dziažurstvaŭ, uzbrajeńnie, vajskovuju techniku adździełu «Zadziarejeŭka» Čarnihaŭskaha pamiežnaha atradu.

Słužba biaśpieki Ŭkrainy kvalifikavała piśmovuju zhodu ŭkrainca jak dziaržaŭnuju zdradu — hetaje złačynstva karajecca pazbaŭleńniem voli na termin ad 12 da 15 hadoŭ. Ale ad pakarańnia hramadzianin Ukrainy byŭ vyzvaleny, bo dobraachvotna paviedamiŭ pra verbavańnie.

Z adpaviednaj zajavaj ukrainiec źviarnuŭsia ŭ specsłužbu ŭžo paśla taho, jak jon sabraŭ sakretnuju infarmacyju, ale admoviŭsia jaje pieradavać biełaruskim pamiežnikam. Nibyta za hetuju admovu ŭletku 2016 hodu jaho departavali ź Biełarusi i zabaranili na adzin hod ujezd na biełaruskuju terytoryju.

Kaho jašče verbavali?

Z 2016 hodu stała viadoma sama mieniej pra šeść zajavaŭ ab verbavańni ŭkraincaŭ biełaruskimi specsłužbami i jašče pra niekalki — rasiejskimi i polskimi orhanami vyviedki. U adnym z vypadkaŭ zaverbavany ŭ Biełarusi hramadzianin Ukrainy navat nazvaŭ imia svajho biełaruskaha kuratara.

Paśla pieršych analahičnych historyj u presavym centry Słužby biaśpieki Ŭkrainy «Svabodzie» zajaŭlali, što takija fakty fiksujucca «amal systematyčna». Što praŭda, pra ich nikoli nie paviedamlajuć aficyjna — usie jany stali viadomyja paśla publikacyi sudovych rašeńniaŭ ab zakryćci kryminalnych spraŭ suprać ukraincaŭ, jakija dobraachvotna paviedamili SBU pra svajo verbavańnie.

U studzieni 2020 hodu stała viadoma, što va Ŭkrainie ŭpieršyniu zaviali kryminalnuju spravu suprać supracoŭnika aperatyŭna-vyšukovaha adździełu Pinskaha pamiežnaha atradu Dziaržaŭnaha pamiežnaha kamitetu Biełarusi, jaki nibyta zajmaŭsia verbavańniem ukrainskich hramadzian.

• 0
• 0
• 0
• 0
• 0
• 0
• 0
• 0