«Čamu tady čarhu ŭ kramie nie nazyvajuć mitynham?» Što kazaŭ Cichanoŭski siońnia ŭ sudzie ŭ Homieli

Siońnia ŭ Homielskim abłasnym sudzie adbyłosia sudovaje pasiadžeńnie pa apielacyjnaj skarzie Siarhieja Cichanoŭskaha, jakuju jon padaŭ jašče ŭ mai, paśla adnaho z administracyjnych pracesaŭ, kali jamu dali čarhovyja 15 sutak aryštu. 10 červienia Cichanoŭski — užo abvinavačany pa kryminalnaj spravie — udzielničaŭ u pracesie pa videasuviazi ź SIZA. Na pasiadžeńnie ź Minska ŭ Homiel pryjechała jaho žonka Śviatłana, taksama, «kab choć vokam zirnuć na syna», pryjšła maci Safija Jafremaŭna. Adnak vielizarny televizar z tranślacyjaj byŭ raźviernuty ŭ bok sudździ — i Siarhieja z zały nichto nie ŭbačyŭ, piša Tut.by.

Pavialičyć

Nahadajem, 18 maja sud Savieckaha rajona Homiela za mitynhi 18 sakavika ŭ Oršy i 12 krasavika ŭ Breście asudziŭ błohiera na čarhovyja 15 sutak aryštu. Tady Siarhiej Cichanoŭski padaŭ apielacyjnuju skarhu ŭ sud vyšejšaj instancyi.

U apielacyi Cichanoŭski adznačyŭ, što nijakich supraćpraŭnych dziejańniaŭ nie ździajśniaŭ, a realizoŭvaŭ kanstytucyjnaje prava na svabodu praviadzieńnia masavych mierapryjemstvaŭ, što, na jaho dumku, sud niapravilna zrazumieŭ zakon i nie pryniaŭ da ŭvahi Kanstytucyju Biełarusi. I prasiŭ pastanovu suda Savieckaha rajona admianić.

Siońnia ŭ Homielskim abłasnym sudzie razhledzieli apielacyju. Pakolki sam Siarhiej zaraz znachodzicca ŭ minskim SIZA, praces vioŭsia z dapamohaj videasuviazi. Z sudździoj Alaksandram Sužajevym Cichanoŭski mieŭ znosiny praź vielizarny manitor televizara, jaki śpiecyjalna ŭstalavali ŭ zale pasiadžeńniaŭ.

Pavialičyć

Sudździa demanstruje Cichanoŭskamu materyjały spravy: važki albom, u im — mnostva kalarovych fatahrafij ź miescaŭ sustreč Cichanoŭskaha ź ludźmi. Sudździa kaža, što na fota — asoby z łozunhami i płakatami.

— U mianie nijakich łozunhaŭ i płakataŭ nie było. Heta byŭ nie mitynh, a intervju, — adkazvaje Cichanoŭski.

Sudździa začytvaje aznačeńnie paniaćcia «mitynh».

— Tam byli ludzi, płakaty, simvolika, vykazvańni — što jašče nieabchodna, pa-vašamu, kab heta pryznać mitynham?

Cichanoŭski nastojvaje: toje, za što jaho asudzili ŭ mai, nijakaha dačynieńnia da mitynhu nie maje.

— Ja zapisvaŭ intervju. Intervju! Padychodžu da čałavieka ź mikrafonam, pytajusia ŭ jaho: «Jak žyviecca ŭ Oršy?» — «Drenna». Pytajusia: «Jakaja zarpłata?» — «Vielmi maleńkaja». Nu i dalej abmiarkoŭvajem prablemy, jakija treba ŭsim vyrašyć, kab pabudavać krainu dla žyćcia. Jak heta možna nazvać mitynham? U mianie ŭ hałavie nie ŭkładvajecca. Čamu tady čarhu ŭ kramie, dzie ludzi stajać i taksama skardziacca na toje, jak drenna žyviecca ŭ krainie, nie nazyvajuć mitynham? — pytajecca ŭ adkaz Cichanoŭski.

Jon kaža, što aburany tym, što pratakoły pa artykule 23.34 KaAP za ŭdzieł u niesankcyjanavanym mierapryjemstvie składzienyja nie tolki na jaho — ale i na ŭsich tych, chto chacieŭ ź im sustrecca.

— Ludzi chacieli sa mnoj sustrecca, im cikavy ja jak miedyjnaja asoba, ale ja ŭ šoku, što hetych ludziej ciapier asudžajuć, dajuć im «sutki». Liču, usio heta robicca vyklučna pa palityčnych matyvach. Adbyvajecca zapałochvańnie ludziej.

Na hetym sudździa jaho pierapyniaje.

— Davajcie pa sutnaści. Pa hetych epizodach jość u vas jašče zaŭvahi?

— Ja prašu admianić rašeńnie suda Savieckaha rajona i vykanańnie spynić, — znoŭ źviartajecca da sudździ Cichanoŭski.

Sud pajšoŭ u daradčy pakoj, a praź piać chvilin vynies rašeńnie: pakinuć apielacyju Cichanoŭskaha biez zadavalnieńnia.

Pierad tym jak videasuviaź adklučyli, Siarhiej Cichanoŭski paśpieŭ kryknuć: «No pasaran!» — i na hetym sudovaje pasiadžeńnie skončyłasia.

• 0
• 0
• 0
• 0
• 0
• 0
• 0
• 0