U Oršy zatrymali «smatračaha za horadam». Jon braŭ u pryzyŭnikoŭ chabary nibyta za adterminoŭku — i kidaŭ na hrošy
36-hadovy mužčyna, što raniej byŭ sudzimy za kradziež, uhon i chulihanstva, padazrajecca ŭ padbuchtorvańni da dačy chabaru i machlarstvie, paviedamlaje aficyjny pradstaŭnik MUS u svaim telehram-kanale.
Da hetaha mužčyny źviarnuŭsia svajak adnaho z pryzyŭnikoŭ. Jon paprasiŭ stanoŭča vyrašyć pytańnie ab adterminoŭcy vajennaj słužby. «Smatračy» pahadziŭsia dapamahčy i nazvaŭ košt pasłuhi: za 500 dalaraŭ rabotniki vajenkamata mohuć vydać chłopcu vajenny bilet. Małady čałaviek pieradaŭ hrošy, a zatym raspavioŭ jašče adnamu pryzyŭniku pra mahčymaść paźbiehnuć pryzyvu. Toj taksama «kupiŭ» adterminoŭku.
U chutkim časie chłopcaŭ pryzvali ŭ vojska. Jany zrazumieli, što ich padmanuli i źviarnulisia ŭ pravaachoŭnyja orhany. Vyśvietliłasia, što hrošy dla vajennych padazravany prysvoiŭ sabie.
Mužčynu złavili paśla atrymańnia čarhovaha chabaru za «rašeńnie» anałahičnaha pytańnia i aryštavali.
Zaraz pravaachoŭnyja orhany vyjaŭlajuć inšych asob, jakija mahli stać achviaraj padmanu. Prośba da hramadzian, jakim viadoma ab supraćpraŭnaj dziejnaści padślednaha, paviedamlać pra heta pa telefonach: 8-029-859-05-96; 8-0212-66-50-44. Kanfidencyjalnaść harantujecca!
Kamientary