Papularny repier Bakiej źviarnuŭsia da padpisantaŭ: Kali, jak nie ciapier, nam abjadnoŭvacca i sprabavać štości źmianić?
Zvarot Uładzisłaŭ Bielmač, viadomy jak rep-vykanaŭca Bakiej, źmiaściŭ na svajoj staroncy ŭ instahramie.
«Maja tvorčaść nikoli nie była źviazanaja z palitykaj, ja nie pisaŭ palityčnyja teksty, niejkija palityčnyja temy nie ŭzdymaŭ, bo ja liču, što tvorčaść i muzyka — heta krychu inšaje, jano pavinna dapamahać, stvarać niejkija pazityŭnyja emocyi i pačućci ŭ ludziej, niejak matyvavać. A palityka — heta niejki brud, jaki znachodzicca niedzie pobač.
Ale zaraz z vami razmaŭlaje hramadzianin Respubliki Biełaruś Uładzisłaŭ Bielmač. Ja hetaksama, jak i vy, naziraju, čytaju naviny. Toje, što adbyvajecca, — heta poŭny žach, chaos. I, kali ščyra, pa adčuvańniach niejkaje siaredniaviečča, bo ludziej mohuć prosta ŭziać na vulicy i zaciahnuć u bus, pahražać, pryčym navat nie kankretnym ludziam, a ŭsiamu narodu. I pahrozy hetyja iduć ad dziejnaj ułady. Heta ŭsio pužaje i śmiašyć adnačasova, jak ludzi sprabujuć utrymacca na svaim nasiedžanym kreśle.
Ja taksama hladžu historyi svaich siabroŭ, taksama muzykantaŭ, i mnie vielmi pryjemna, što zaraz usie aktyvavalisia, usie chočuć prajavić svaju hramadzianskuju pazicyju, vykazacca. I heta cudoŭna, tamu što kali, jak nie ciapier, nam abjadnoŭvacca i sprabavać štości źmianić? Kaniečnie, nie fakt, što našy dziejańni pryviaduć da niejkaha stanoŭčaha vyniku, ale kali nie sprabavać, tady ničoha nie adbudziecca. Ja nie zaklikaju, ale prosta kažu vam, svaim ravieśnikam, chłopcam i dziaŭčatam, jakija maładziej za mianie: davajcie ŭsie razam zrobim heta i narešcie, mahčyma, štości źmienim. Tamu što być zaraz u baku i kazać, što mnie heta niecikava… Kali niecikavy los svajoj krainy, tady ja, napeŭna, niečaha nie razumieju.
Adpraŭnym punktam asabista dla mianie stała biaździejańnie ŭładaŭ, kali źjaviŭsia karanavirus. Tady ja adčuŭ poŭnuju abyjakavaść dziaržavy da svajho naroda. Nijakich mieraŭ nie było pryniata, niejkaje naplavalnickaje staŭleńnie, niejkija biazhłuzdyja vykazvańni. Heta było absurdna, i dla mianie heta stała adpraŭnym punktam. I ja razumieju, što pryjšoŭ čas niešta mianiać», — skazaŭ Bakiej.
Repieru 25 hod. Adzin z najbolš viadomych jaho trekaŭ — «Ja buntar». Klip, apublikavany letaś, sabraŭ na jutubie 430 000 prahladaŭ.
Aściarožna, u klipie jość niecenzurnaja leksika.
Raniej da svaich padpisantaŭ taksama źviarnułasia papularnaja śpiavačka Lera Jaskievič. Jana zaklikała hałasavać za pieramieny.
Kamientary