25 lipienia ź Dźmitryjem Karakinym z hurta Litesound zdaryłasia dziŭnaja historyja.
«Ja jechaŭ pa vulicy Pryharadnaj, źviarnuŭ naprava na Haja. I tam stajali daišniki na skryžavańni. Ja prajechaŭ spakojna, jany za mnoju z majačkami. Paśla ja spyniŭsia na čyrvonaje — daišnaja mašyna za mnoj, ale majački vyklučyli. Nu ja padumaŭ, što nie pa maju dušu i spakojna pajechaŭ dalej, kali zapaliłasia zialonaje na śvietłafory. Ale ž nie: praz hučnahavaryciel mnie zahadali spynicca, — zhadvaje Dźmitryj. — Padyšoŭ inśpiektar, uziaŭ dakumienty. Pytajusia ŭ jaho: u čym prablema? Maŭčyć, prosta kałupajecca ŭ maich dakumientach, ničoha nie kaža».
Paśla daišnik zaŭvažyŭ, što ŭ Karakina niaprojdzieny techahlad i paprasiŭ prajści ź im u milicejskuju mašynu dla składańnia pratakoła.
«Ja admoviŭ, vietliva paprasiŭšy supracoŭnika skłaści samastojna pratakoł, jaki ja padpisaŭ by ŭ svajoj mašynie. Uličvajučy «składanuju epidemijałahičnuju situacyju», heta całkam łahičnaja prośba. Tady daišnik syšoŭ i viarnuŭsia ŭ supravadžeńni 120- kiłahramovaha majora, jaki pačaŭ razmovu adrazu ž na padvyšanych tanach: «U ciabie jość škło lišniaje?» Ja kažu: «U sensie?» Major: «Ja tvajo razabju škło, kab ty vyjšaŭ!» — zhadvaje Karakin. — Ja spytaŭ: «Vy mnie pahražajecie?» Tady daišnik schapiŭsia za ručku dźviarej, ale dźviery byli začynienyja znutry.
Paśla čaho adbyłosia toje, što ja navat čakać nie moh. Jon rezka schapiŭsia za kaburu, rasšpiliŭ jaje ź vidavočnym namieram dastać pistalet. Naturalna, ja adčyniŭ dźviery i vyjšaŭ, nie davodziačy situacyju da stralby».
Karakin kaža, što vielmi napałochaŭsia ŭ toj momant.
«U mianie ŭsio žyćcio pierad vačyma, ja realna abałdzieŭ… Było sapraŭdy strašna. Plus my adkryta vykazvalisia pra dziejańni ŭładaŭ, i ja padumaŭ: moža, situacyja źviazanaja z hetym i ciapier mianie prosta zatrymajuć. Tamu ja vyjšaŭ z aŭto i adrazu nabraŭ baćku, papiaredziŭ, što adbyvajecca i dzie ja znachodžusia.
U daišnaj mašynie ja padpisaŭ toj pratakoł, atrymaŭ štraf na 27 rubloŭ. Akramia taho, daišnik mnie pračytaŭ lekcyju: nibyta maje pavodziny možna było rascanić jak niepadparadkavańnie, — raspavioŭ Karakin. — Ale paśla my pačali raźbiracca.
Jość dakładny pieralik vypadkaŭ, kali vykarystoŭvajucca majački i pahonia za mašynaj. Pahroza prymianieńnia zbrojaj taksama mahčyma tolki ŭ pieraličanych zakonam vypadkach. Žadańnie kiroŭcy zastavacca ŭ svajoj mašynie nie źjaŭlajecca padstavaj dla hetaha. Patrabavańni pakinuć aŭtamabil dla składańnia pratakoła taksama źjaŭlajecca niezakonnym.
Tamu ciapier my budziem padavać skarhu na dziejańni daišnikaŭ».
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami12
Kamientary