Pravaabaroncy pryznali padazravanych u masavych biesparadkach palitviaźniami

Sumiesnaja zajava pravaabarončych arhanizacyj Biełarusi.

U suviazi ź infarmacyjaj pra zatrymańni aktyvistaŭ vybarčaha štabu Viktara Babaryki — Lavona Chałatrana, Antona Bialinskaha, Ihara Bialinskaha, Andreja Paźniaka, Siarhieja Michajonka, Juryja Vaskrasienskaha, Artura Vaskrasienskaha, Ihara Jarmołava, Arcioma Moładava, Alaksandry Moładavaj i Uładzisłava Kareckaha, jakija byli zatrymanyja ŭ jakaści padazravanych u miežach uzbudžanaj kryminalnaj spravy pa art. 293 KK (masavyja biesparadki), my, pradstaŭniki biełaruskich pravaabarončych arhanizacyj, adznačajem nastupnaje:

Svaboda mirnych schodaŭ harantavanaja art 21 Mižnarodnaha Pakta ab hramadzianskich i palityčnych pravach. Dadzienaja svaboda nie padlahaje nijakim abmiežavańniam, akramia tych, što ŭstanoŭlenyja zakonam i nieabchodnyja ŭ demakratyčnych krainach u metach nacyjanalnaj i hramadskaj biaśpieki, hramadskaha paradku, achovy zdaroŭja i maralnaści nasielnictva ci abarony pravoŭ i svabod inšych asob.

Vystupy hramadzian nasili stychijny, samaarhanizavany charaktar i byli vyklikanyja niedavieram da vynikaŭ vybaraŭ Prezidenta Respubliki Biełaruś, jakija adbylisia 9 žniŭnia 2020 h. i prachodzili sa šmatlikimi parušeńniami i falsifikacyjami, nie byli pryznanyja mižnarodnaj supolnaściu jak demakratyčnyja, spraviadlivyja i svabodnyja[1].

Schody hramadzian nasili mirny charaktar i nie ŭjaŭlali pahrozy ni nacyjanalnaj, ni hramadskaj biaśpiecy. Niahledziačy na heta demanstranty byli atakavanyja śpiecpadraździaleńniami MUS ź niepraparcyjnym prymianieńniem fizyčnaj siły, śpiecsrodkaŭ i zbroi.

Upieršyniu ŭ historyi Biełarusi ŭ dačynieńni da mirnych demanstrantaŭ byli ŭžytyja humavyja kuli i vadamioty. Asabliva vialikaja kolkaść paškodžańniaŭ była atrymanaja ad vykarystańnia šumavych hranat.

U svajoj zajavie ad 10 žniŭnia 2020 h. biełaruskaja pravaabarončaja supolnaść asudziła dziejańni pravaachoŭnych orhanaŭ i ŭskłała ŭsiu adkaznaść za toje, što adbyłosia 9 i 10 žniŭnia na ŭłady Respubliki Biełaruś.

Taksama ličym nieabchodnym adznačyć, što demanstrantami nie ździajśnialisia dziejańni, jakija achoplivajucca dyspazycyjaj art. 293 KK i adpaviedna nie mohuć kvalifikavacca jak masavyja biesparadki. Udzielniki pratestaŭ nie ździajśniali padpałaŭ, pahromaŭ, nie źniščali majomaść i nie akazvali ŭzbrojenaha supracivu pravaachoŭnym orhanam.

Asobnyja vypadki hvałtoŭnych dziejańniaŭ u dačynieńni da supracoŭnikaŭ milicyi z boku demanstrantaŭ patrabujuć asobnaj pravavoj kvalifikacyi, z ulikam kantekstu i abstavinaŭ užyvańnia hvałtu, u tym liku ŭ kantekście samaabarony ad zaviedama niepraparcyjnych dziejańniaŭ supracoŭnikaŭ milicyi.

My aceńvajem pieraśled Lavona Chałatrana, Antona Bialinskaha, Ihara Bialinskaha, Andreja Paźniaka, Siarhieja Michajonka, Juryja Vaskrasienskaha, Artura Vaskrasienskaha, Ihara Jarmołava, Arcioma Moładava, Alaksandry Moładavaj i Uładzisłava Kareckaha, jakija byli zatrymanyja ŭ jakaści padazravanych pa art. 293 KK (masavyja biesparadki) jak palityčna matyvavany pieraśled u suviazi z realizacyjaj imi svabody mirnych schodaŭ i vykazvańnia svajho mierkavańnia adnosna abvieščanych vynikaŭ vybaraŭ prezidenta Respubliki Biełaruś i pryznajom ich palityčnymi źniavolenymi.

U suviazi z hetym my patrabujem ad uładaŭ Biełarusi:

1. Nieadkładna vyzvalić z-pad varty palitviaźniaŭ Lavona Chałatrana, Antona Bialinskaha, Ihara Bialinskaha, Andreja Paźniaka, Siarhieja Michajonka, Juryja Vaskrasienskaha, Artura Vaskrasienskaha, Ihara Jarmołava, Arcioma Moładava, Alaksandry Moładavaj i Uładzisłava Kareckaha i spynić ich kryminalny pieraśled.
2. Nieadkładna vyzvalić usich palityčnych źniavolenych, a taksama hramadzian, zatrymanych u suviazi z realizacyjaj svabody mirnych schodaŭ u postvybarčy pieryjad i spynić palityčnyja represii ŭ dačynieńni da hramadzian krainy.

Pravaabarončy centr «Viasna»;

RPHA «Biełaruski Chielsinkski Kamitet»;

RHA «Pravavaja inicyjatyva»;

Centr pravavoj transfarmacyi Lawtrend;

Biełaruski dom pravoŭ čałavieka imia Barysa Zvozskava;

Kansultacyjny centr pa aktualnych mižnarodnych praktykach i ich implemientacyi ŭ pravie «Chjuman Kanstanta»;

Prostaje tavarystva «Inicyjatyva FORB»;

Biełaruski PEN-centr;

Ofis pa pravach ludziej ź invalidnaściu;

• 0
• 0
• 0
• 0
• 0
• 0
• 0
• 0