Mienski kaścioł Śviatoha Rocha na Załatoj Horcy viernuty viernikam

5 lipienia 2006 h. adbyłasia histaryčnaja padzieja, jakoj minskija kataliki čakali piatnaccać hadoŭ. U adpaviednaści z rasparadžeńniem Prezidenta Respubliki Biełaruś ad 5 maja hetaha hoda, budynak kaścioła Najśviaciejšaj Trojcy (śviatoha Rocha) na Załatoj Horcy ŭ Minsku byŭ pieradadzieny starejšaj katalickaj parafii stalicy. Akt ab pieradačy byŭ začytany ŭ sakrystyi kaścioła ŭ prysutnaści Apostalskaha Administratara Minska-Mahiloŭskaj archidyjacezii biskupa Antonija Dziamjanki, kanclera Minska-Mahiloŭskaj archidyjacezijalnaj kuryi ks. Juryja Kasabuckaha, probašča parafii ks. Michała Sapiela, dyrektara Biełaruskaj dziaržaŭnaj fiłarmonii A. V. Harbara, pradstaŭnikoŭ Ministerstva kultury RB i členaŭ kampietentnaj kamisii.

Ryma-katalickaja parafija Najśviaciejšaj Trojcy (śviatoha Rocha) na Załatoj Horcy ŭ Minsku była zasnavanaja ŭ XIV st. karalom Jahajłam. Heta samaja staražytnaja katalickaja supolnaść u horadzie, pra jakuju zachavalisia dakumientalnyja źviestki. Pieršapačatkova parafijalny kaścioł znachodziŭsia na Trajeckaj Hary, pryblizna tam, dzie ciapier mieściacca karpusy 2-ha kliničnaha špitala. U pačatku XIX st. parafijalnaj śviatyniaj byŭ draŭlany kaścioł na Załatahorskich mohiłkach u pradmieściach Minska.

U 1861–1864 hh. byŭ pabudavany muravany kaścioł u nieahatyčnym styli, jaki zachavaŭsia da siońniašniaha času. Admietny toj fakt, što achviaravańni na jaho pabudovu źbirali nie tolki minskija kataliki, ale taksama pravasłaŭnyja i judei ŭ znak padziaki śviatomu Rochu, jaki vyratavaŭ horad ad strašnaj epidemii chalery. Kaścioł byŭ bahata azdobleny ŭnutry. Na pačesnym miescy ŭ pravym bakavym ałtary znachodziłasia cudatvornaja fihura śviatoha Rocha – apiekuna horada Minska. U kaściole byli cudoŭnyja arhany i navat dziejničała škoła arhanistaŭ. Akramia taho, parafija mieła vialikuju majomaść u horadzie i pradmieściach.

Nasyčanaje parafijalnaje žyćcio było hvałtoŭna pierapyniena ŭ 30-ja hh. XX st. u vyniku pieraśledu relihii z boku savieckaj ułady. Da vajny nabaženstvy ŭ kaściole adbyvalisia nierehularna, bo ŭ toj čas šmat śviataroŭ byli aryštavanyja abo vymušana vyjechali na vyhnańnie. Padčas vajny nabaženstvy na peŭny čas uznavilisia. U chodzie bajoŭ za Minsk budynak kaścioła byŭ značna paškodžany, što vidać na archiŭnych fotazdymkach. Pa śviedčańniach vidavočcaŭ, viernikam udałosia sabrać srodki i samim adnavić źniščany dach śviatyni. Adnak paśla vajny nabaženstvy ŭ kaściole na Załatoj Horcy ŭžo bolš nie adbyvalisia; było razrabavana, źniščana ci biasśledna vyvieziena ŭsio, što jašče zastavałasia ad unutranaha ŭbrańnia.

U paślavajenny pieryjad budynak kaścioła doŭhi čas vykarystoŭvaŭsia jak knihaschovišča, a Załatahorskija mohiłki – samy vialiki i znakamity katalicki niekropal u horadzie – byli źniščany. U 1976 h. kaścioł byŭ adrestaŭravany i častkova adremantavany, paśla čaho ŭ im raźmiaściłasia fiłarmaničnaja zała kamiernaj muzyki i byli ŭstalavanyja novyja arhany češskaj firmy «Riegerkloss».

U 1991 h. była adnoŭlena parafija Najśviaciejšaj Trojcy (śviatoha Rocha), i pa damoŭlenaści ź fiłarmonijaj u kaściole iznoŭ pačali adbyvacca nabaženstvy. Na srodki viernikaŭ kaściołu było viernuta abličča śviatyni. Z samaha pačatku adnaŭleńnia dziejnaści parafii vierniki damahalisia poŭnaha viartańnia śviatyni. Ad ich imia probašč parafii ksiondz Michał Sapiel niaspynna źviartaŭsia da ŭładaŭ z prośbami ab pieradačy kaścioła parafii, a vierniki ŭvieś čas malilisia za heta. Kožnuju sieradu parafijalnaja moładź pravodziła adaracyju Najśviaciejšaha Sakramentu, padčas jakoj maliłasia ab viartańni Załatahorskaj śviatyni, a adpaviednaja malitva stała nieadmiennym dadatkam da nabaženstva da śviatoha Rocha. I voś, narešcie, malitvy byli vysłuchany, a prośby viernikaŭ pačutyja, i 5 lipienia 2006 h. zaviaršylisia ŭsie farmalnaści, źviazanyja ź pieradačaj kaścioła na bałans parafii.

Adnak biaźmiežnaja radaść viernikaŭ i ich probašča krychu azmročana tym, što kaścioł pieradajecca ŭ vielmi zaniadbanym stanie – budynku i ŭsim kamunikacyjam patrebny nieadkładny kapitalny remont, na jaki spatrebiacca vielmi vialikija srodki, a ich parafija pakul nie maje. Miž tym, treščyny, što, niby pavucińnie, abłytali sklapieńni i ścieny kaścioła, dzie-nidzie ŭžo dasiahajuć taŭščyni ŭ santymietr, i z kožnym hodam usio pavialičvajucca. Kali nie pryniać nieadkładnych mieraŭ, biełaruskaja stalica moža zastacca biez adnaho z najpryhažejšych svaich pomnikaŭ architektury, jakich u Minsku i biez taho zachavałasia katastrafična mała. Tamu vierniki parafii źviartajucca da ŭsich ludziej dobraj voli z prośbaj ab dapamozie. Biezumoŭna, parafii patrebna nie tolki finansavyja srodki i prafiesijnaja dapamoha śpiecyjalistaŭ. Samaja pieršaja i važnaja dapamoha – heta malitva, i ŭ skarbonku malitvy svoj uniosak moža zrabić kožny viernik.

Catholic.By

• 0
• 0
• 0
• 0
• 0
• 0
• 0
• 0