Pavieł Łatuška ŭ efiry «Biełsata» prakamientavaŭ mahčymaje ŭviadzieńnie novaha pakieta sankcyj ES i patłumačyŭ, chto ŭ ich, na jahonuju dumku, vinavaty.
— Hramadzianie Biełarusi patrabujuć, kab u Biełarusi znoŭ zapracavaŭ zakon. Biełarusy patrabujuć heta, vychodziačy na mirnyja akcyi pratestu. Ułada parušaje Kanstytucyju, usie mahčymyja zakanadaŭčyja akty, masava pieraśleduje i represuje svaich hramadzian.
Mižnarodnaja hramadskaść abaviazanaja reahavać, kali ŭ Jeŭropie masava parušajuć pravy čałavieka, — heta naturalna. Ale vinavataja ŭ hetaj reakcyi tolki nielehitymnaja ŭłada, jakaja nie choča vykonvać bazavyja mižnarodnyja pryncypy. Dy što tam, ułada nie vykonvaje navat pryncypy nacyjanalnaha zakanadaŭstva.
Sankcyi — heta miechanizm cisku z boku mižnarodnaj supolnaści, kab ułada pačała prytrymlivacca zakonaŭ. Kanviencyju suprać hvałtu Biełaruś padpisała ŭ 1984 hodzie. My pahadzilisia, što ŭ jaje ramkach mohuć vykarystoŭvacca mižnarodnyja miechanizmy adkaznaści: dzie b ni byŭ ździejśnieny hvałt, kryminalnaja sprava moža być raspačataja na terytoryi kožnaj krainy-ŭdzielnicy kanviencyi. Što my i bačym na prykładzie Litvy, što my, spadziajusia, pabačym u najbližejšy čas na prykładzie Polščy, Šviejcaryi i inšych dziaržaŭ.
U sankcyjach vinavataja sama ŭłada, jakaja nie choča vykonvać ułasnaje zakanadaŭstva. Ale novyja sankcyi mohuć być i nie ŭviedzienyja. Heta zaležyć ad nielehitymnaj biełaruskaj ułady.
Ja źviartajusia da spadara Makieja, ministra zamiežnych spraŭ: usio ŭ vašych rukach. Idzicie da Łukašenki i skažycie: davajcie zaviadziom usie kryminalnyja spravy za ŭsich zabitych, za ŭsie vypadki hvałtu, davajcie praviadziom novyja vybary — i nie budzie nijakich sankcyj, — skazaŭ Łatuška.
Kamientary