«Hety nachabny valuntaryzm jeŭrabiurakratyi kaliści pavinien spynicca»: MZS zajaviŭ pra sankcyi ŭ adkaz dla ES

Minsk padrychtavaŭ miery ŭ adkaz na novyja sankcyi ES, niekatoryja ź ich davoli adčuvalnyja. Zajava pryvodzicca na sajcie MZS

Pavialičyć

— Zusim durnoje, niedalnabačnaje i va ŭsich adnosinach dzikaje rašeńnie, jakoje pryviadzie tolki da niehatyŭnych nastupstvaŭ, u tym liku i dla tych vysokich metaŭ i ideałaŭ, za jakija nibyta tak radzieje ES, — prakamientavaŭ uviadzieńnie sankcyj pres-sakratar MZS Biełarusi Anatol Hłaz.

«Taksama niama nijakich iluzij, što heta prymityŭny sastaŭny elemient šyrokamaštabnaj metanakiravanaj kampanii masiravanaha cisku na našu krainu. Zvyčajnaja sproba vonkavaha ŭmiašańnia va ŭnutranyja spravy niezaležnaj dziaržavy, ab padtrymcy suvierenitetu jakoj tak lubiać razmaŭlać našy jeŭrapiejskija partniory. Taksama ŭžo niama sumnievaŭ, što na spravie hetyja kroki nakiravanyja i suprać intaresaŭ prostych biełarusaŭ».

Pa słovach Hłaza, biełaruski bok padrychtavaŭ miery ŭ adkaz.

— Niekatoryja ź ich davoli adčuvalnyja. Chaj asobnyja jeŭrapiejskija apanienty potym nie dziviacca i nie sprabujuć pierakładać vinu. Usie hranična jasna.

U MZS raspaviali, što buduć pryniaty dziejańni pa abaronie pravoŭ i zakonnych intaresaŭ biełaruskich hramadzian i jurydyčnych asob.

— Usim budzie akazana sadziejničańnie. Bo pryniatyja rašeńni ŭ šerahu vypadkaŭ nie toje, što absurdnyja, ale, ja b skazaŭ, prosta dyskredytujuć zdarovy sens. Nu, u čym pravinilisia pierad Jeŭrasajuzam tysiačy rabočych pradpryjemstvaŭ, jakija trapili pad sankcyi? Raźličvajem, što nie tolki biełaruskija prafsajuzy, ale i Mižnarodnaja fiederacyja prafsajuzaŭ, a taksama inšyja profilnyja arhanizacyi źviernuć na heta pilnuju ŭvahu. Situacyja zusim vidavočnaja. Abo, naprykład, čym tak napałochaŭ ES biełaruski doktar, ankołah, jaki ŭsio žyćcio ratavaŭ žyćci ludziej, były ministr achovy zdaroŭja?

Heta pabočny ŭpłyŭ ad fantastyki, kali ŭ lubym dziejańni treba pryznačyć «doktara Zło»?

My adznačyli i dyskryminacyju biełaruskaha žurnalista tolki za toje, što jon ahučvaŭ mierkavańnie, jakoje nie padabajecca i adroźnivajecca ad pazicyi ES. Spadziajemsia, što mižnarodnyja žurnalisckija arhanizacyi i abjadnańni nie dzielać svaich kalehaŭ na drennych i dobrych, buduć pryncypovyja i taksama, jak i ŭ inšych vypadkach, ŭstupiacca ŭ jaho abaronu. Jość adpaviednyja instrumienty i ŭ nas, jany buduć zadziejničany.

Čym nie dahadziŭ Jeŭrasajuzu biełaruski IT-siektar taksama niezrazumieła.

Ale zrazumieła inšaje: inicyjatary padobnych rašeńniaŭ pavinny panieści adkaznaść za kankretnuju naniesienuju škodu, u tym liku ekanamičnuju. Hety nachabny valuntaryzm jeŭrabiurakratyi kaliści pavinien spynicca. My pastarajemsia zrabić tak, kab nie było jak u minuły raz — pastanovy pryznali niezakonnymi, ale adkaznych nie znajšli — skazana ŭ paviedamleńni MZS.

• 0
• 0
• 0
• 0
• 0
• 0
• 0
• 0