Ułady dapuskajuć źnižeńnie zołatavalutnych reziervaŭ za 2021 hod da 6 miljardaŭ dalaraŭ
Heta vynikaje z ukaza № 481 «Ab zaćviardžeńni Asnoŭnych napramkaŭ hrašova-kredytnaj palityki Respubliki Biełaruś na 2021 hod», jaki Alaksandr Łukašenka padpisaŭ 22 śniežnia.
«U metach pavyšeńnia ekanamičnaj biaśpieki krainy i zabieśpiačeńnia finansavaj stabilnaści Nacyjanalny bank sumiesna z uradam u 2021 hodzie praciahnie pracu pa padtrymańni ŭzroŭniu mižnarodnych reziervovych aktyvaŭ Respubliki Biełaruś i palapšeńni ich struktury ŭ častcy pamianšeńnia pazykovaha składnika», — havorycca va ŭkazie.
Mižnarodnyja reziervovyja aktyvy Biełarusi na 1 śniežnia 2020 hoda skłali 7,3 młrd dalaraŭ u ekvivalencie, źniziŭšysia za listapad na 109,2 młn dalaraŭ, adznačaje Tut.by.
Rejtynhavaje ahienctva Fitch prahnazuje źnižeńnie ZVR Biełarusi z 7,4 młrd dalaraŭ u 2020 hodzie da 6,2 młrd dalaraŭ u 2022 hodzie. Uzmacnieńnie palityčnych chvalavańniaŭ u Biełarusi moža abumović dadatkovy cisk na mižnarodnyja reziervy i vyklikać adtok depazitaŭ, što pavyšaje ryzyki dla makraekanamičnaj i finansavaj stabilnaści, havorycca ŭ pres-relizie da ahladu ahienctva «Palityčny kryzis u Biełarusi akazvaje cisk na rejtynhi». Adnak alternatyŭnyja krynicy finansavańnia i zapas hrašovych srodkaŭ zhładžvajuć ryzyki, źviazanyja ź finansavańniem, na bližejšy čas.
Zhodna z ukazam № 481, manietarnaja palityka ŭ 2021 hodzie budzie nakiravanaja na stabilizacyju inflacyi, jakaja vymiarajecca indeksam spažyvieckich cen, na ŭzroŭni nie bolš za 5%.
Zabieśpiačeńnie cenavaj stabilnaści budzie dasiahacca Nacyjanalnym bankam u režymie manietarnaha tarhietavańnia z dapamohaj kantrolu nad abjomam hrašovaj prapanovy. Rublovaja hrašovaja baza pavialičycca ŭ 2021 hodzie na 10-13%, havorycca ŭ dakumiencie.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja30
Kamientary