Adpačynak za 500 dalaraŭ

Napiaredadni siezona adpačynkaŭ my adkažam na pytańnie: «Dzie sioleta možna pravieści adpačynak, zapłaciŭšy za jaho maksimum 500 dalaraŭ?» Mienavita stolki hrošaj pažadała vykłaści za svoj adčynak bolšaść apytanych na sajcie haziety «Turizm i otdych».

Viadoma ž, doma

«U biełaruskim sanatoryi z poŭnym, 4‑razovym, charčavańniem i kursam pracedur za hetyja hrošy možna śmieła adpačyvać 12 dzion. I jašče zastaniecca», — kaža ekśpiert haziety «Turizm i Otdych» Iryna Špakoŭskaja. Krychu nie chopić adpačyć u sanatoryi 21 dzień: ceny na 3‑tydniovyja pucioŭki kaštujuć pačynajučy ad 1 młn 600 tys. Ale! Najlepšyja sanatoryi krainy zazvyčaj užo zareziervavanyja da pačatka vosieni.

Jašče tanny varyjant u Biełarusi — usiudyisnyja bazy adpačynku: 7 dzion biez charčavańnia buduć kaštavać ad 87 tys. rubloŭ.

Treci ajčynny ekanom‑varyjant — ahrasiadziby. Za asałodu pažyć u viaskovaj chacie, ale jak praviła z usimi haradskimi vyhodami ŭnutry, vy zapłacicie ad 12 dalaraŭ na čałavieka na dzień (biez charčavańnia). Z charčavańniem - ad 30 dalaraŭ na čałavieka.

Ukraina

Va ŭkrainskich sanatoryjach (naprykład u Truskaŭcy) sutki kaštujuć ad $20. Cikava, što ŭ rasijskich zdraŭnicach padobnaha kštałtu (naprykład, u Kisłavodsku) ceny značna vyšejšyja. Va Ukrainie charčavańnie zaležyć ad jakaści numara: prosty numar — dyjetyčny stoł, daražejšy numar — asobnaje, z dalikatesami, charčavańnie. Jašče adzin ukrainski plusik: časta, kali ŭ siamji dvoje darosłych, dziciaci dazvolać adpačyvać biaspłatna.

Čornaje mora: u Adesie možna znajści miesca ŭ hateli pačynajučy ad $8 za sutki (biez charčavańnia).

Turcyja

Z $500 u krainie dvuch kantynientaŭ biełaruskamu turystu sioleta rabić niama čaho. Kurorty, niahledziačy na kryzis, istotna padaraželi. Frazy kštałtu «Turcyja ad $310», u rekłamnych abviestkach, datyčać marš‑kidkoŭ na 3—4 dni, nie bolš. Paŭnavartasny adpačynak tam budzie kaštavać sioleta ad 800 dalaraŭ na dva tydni. Istotny plus Turcyi — usio ŭklučana. Raz zapłaciŭšy za pucioŭku ŭ Minsku, u Turcyi vy na pražytak amal ničoha nie vydatkujecie.

Jehipiet

Jašče adna pryjaznaja, biaźvizavaja dla biełaruskaha turysta kraina. Tut $500 na doŭhi adpačynak taksama nie chopić. Chiba možna złavić šaniec i za tanna źjechać pa «haračaj pucioŭcy» ź Minska, Kijeva i Maskvy. Treba adno siadzieć na čamadanach i, skanujučy internet i turystyčnyja abviestki ŭ hazietach, čakać nahody. Ale ci budzie hety siezon «hareć» (ci budzie sioleta šmat prapanovaŭ z pucioŭkami ŭ apošniuju chvilinu) — nieviadoma.

U Jehipcie turahienty nie rekamiendujuć hnacca za tannym žytłom i sialicca ŭ hatelach, nižejšych za trochzorkavyja. Jehipieckija haścinicy nie daciahvajuć da jeŭrapiejskich: dźvie zorki ŭ Jehipcie i Bałharyi — heta dva roznyja ŭzroŭni.

Jeŭropa

Sioleta amataraŭ niedarahoha paciešyć adpačynak u Rumynii. Tury tudy ŭ pačatku siezona kaštujuć ŭsiaho 150 jeŭra bieź vizy, jakaja stanie ŭ 5 dalaraŭ. U razhar leta standartny tur u Rumyniju budzie kaštavać 300 jeŭra. Istotny minus: daroha. 28-hadzinnaje padarožža na aŭtobusie (a ŭ Rumyniju biełaruskija adpačyvalnki zbolšaha dabirajucca naziemnym transpartam) nie kožnamu pad siłu.

Bałharyja: Nielha skazać, što Bałharyja samaja tannaja, ale cudoŭny varyjant dla siamiejnaha adpačynku z małymi dziećmi. Bazavy košt dvuchtydniovaha paŭpansijonu (uklučanyja tolki śniadanki): 250—300 jeŭra + viza koštam 60 jeŭra + patreba abiedać i viačerać za svoj košt. Darahavata, ale pakolki dzicia adpačyvaje biaspłatna, dyk majem žadanyja $500 na čałavieka.

Ale heta pačatak siezonu, a voś u siaredzinie za miesca ŭ dźviuchzorkavym hateli vy zapłacicie ad 420 jeŭra. Plusy: u Bałharyi niedarahija restarany.

Litva. U Pałanzie možna zaarandavać pakoj z kuchniaj ad 32 jeŭra za sutki. Ale nie zabyvajemsia na vizu ŭ 60 jeŭra.

Pryjemnaja nam taksama kraina Čarnahoryja: u pačatak i kaniec siezonu pucioŭka tudy kaštuje kali 270 jeŭra. Viza nie treba, ale jedučy aŭtobusam, daviadziecca prydbać tranzitnuju vizu za 70 jeŭra. Nie škadujcie — tranzitny šenhien maje svaje plusy: možna koratkaterminova naviedać prylehłyja Prahu, Vienu i Budapiešt.

• 0
• 0
• 0
• 0
• 0
• 0
• 0
• 0