«Znajšli ŭ lesie pakunak sa ściaham — i nas zabraŭ AMAP». U Homieli sudzili muža i žonku pa 23.34
Sud Centralnaha rajonu Homla 4 lutaha razhledzieŭ administracyjnyja spravy pa artykule 23.34 KaAP (niesankcyjanavany pikiet) u dačynieńni da muža i žonki. Žycharka Homla śviedčyła ŭ sudzie, što znajšła ŭ lesie pakunak sa ściaham, a praź niekalki chvilin ich zatrymaŭ AMAP, piša Svaboda.
Administracyjnuju spravu ŭ dačynieńni da žycharki Homla, specyjalistki pa zakupkach Volhi razhladaŭ sudździa Viktar Kazačok.
Pavodle pratakołu milicyi, 24 studzienia Volha «pryniała aktyŭny ŭdzieł u niesankcyjanavanym pikiecie kala hrabnoha kanału na vulicy Łuhavoj». Jaje z mužam i siabroŭkaj zatrymaŭ AMAP i dastaviŭ u adździeł.
Žycharka Homla padrabiazna apisała «pikiet» u lasnym masivie za vulicaj Łuhavoj. Pavodle Volhi, jany z mužam i siabroŭkaj viaduć spartyŭny ład žyćcia. U toj dzień, 24 studzienia, jany ŭtroch pajechali za hrabny kanał, kab pravieryć — ci jość tam łyžnia.
«Pajechali ŭ raźviedku i zabłukali. Muž pajšoŭ pahladzieć, kudy my pryjechali. My ź siabroŭkaj zastalisia kala aŭtamabila. Ja ŭbačyła ŭ lesie pakunak i vyrašyła pahladzieć — što tam. Niejak my byli ŭ Ryzie, i ja znajšła pakunak, dzie byli viski i pradukty — tamu ja paŭz pakiety nie prachodžu, spakušajusia takim momantam. Tam byli dva ściahi. U nas takich niama doma, tamu ja paprasiła muža mianie sfatahrafavać ź imi. Fotki vyjšli nijakija, i ja ich vydaliła. Potym ja skłała ściahi nazad u pakunak. Muž skazaŭ, kab ja ich pakinuła ŭ lesie, ale ja vinavataja — nie pasłuchałasia i zabrała ich z saboj. Praz kolki chvilin, jak tolki my vyjechali na darohu — nas zatrymaŭ AMAP», — raskazała ŭ sudzie Volha.
Pavodle rapartu, u milicyju pastupiła ananimnaje paviedamleńnie, što ŭ lasnym masivie prachodzić pikiet. Tudy pajechali supracoŭniki AMAP.
«Ja adčuvaju siabie vinavataj, što padviała muža i siabroŭku. Vobrazna kažučy — nie pašancavała», — skazała na sudzie žycharka Homla.
Jana i muž atrymali štraf pa 10 bazavych vieličyń.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1414
Kamientary