Na volu vyjšaŭ hamialčuk Ihar Kraŭčanka, jakomu sud Savieckaha rajona Homiela prysudziŭ 30 sutak administracyjnaha aryštu pa narodnym artykule 23.34. Usiaho jon adsiedzieŭ u IČU Buda-Kašalova 28 sutak. Vialikuju zaniepakojenaść u nieabyjakavych biełarusaŭ vyklikała pratesnaja haładoŭka Ihara, jakuju jon pačaŭ jašče ŭ pieršy dzień znachodžańnia ŭ źniavoleńni. Fłahštok daviedaŭsia ŭ hamialčanina, jak jon trapiŭ u IČU i čamu pačaŭ haładoŭku.
Ihar Kraŭčanka raniej užo traplaŭ u IČU ŭ kancy žniŭnia 2020 hoda za ŭdzieł u mirnym prateście.
«Bolš za ŭsio milicyju ŭzvarjavała fatahrafija kala jalinki 5-ha mikrarajona, zroblenaja 1 studzienia. Ja stajaŭ na fonie jalinki ź bieł-čyrvona-biełym ściaham. U milicyi kryčali: «Ty adziny vyjšaŭ!» Patrabavali, kab ja addaŭ ściah 5-ha mikrarajona. I prosta viazali kožny epizod. Ja adkazvaŭ, što heta nie ja, pakažycie, dzie na fota jość ja. Biezvynikova — prosta pisali pratakoły. Heta nikoha nie cikaviła. Tym bolš sudździa byŭ Mocharaŭ.
Tam cikava ŭ rašeńni suda było. Jany zmahli prypleści, što ja parušyŭ Kanviencyju AAN pa pravach čałavieka. Usie ŭžo śmiajalisia. Ja bačyŭ sotni rašeńniaŭ suda, ale ja bačyŭ pieršy raz, kab jany spasyłalisia na Kanviencyju AAN pa pravach čałavieka», — kaža mužčyna.
Mužčyna skazaŭ, što ličyć zatrymańnie i zaklučeńnie pad vartu niezakonnymi i palityčna matyvavanym.
«Adzinaj formaj pratestu ŭ hetych umovach mahła być haładoŭka. I ź pieršaha dnia (aryštu) abviaściŭ haładoŭku. Całkam haładaŭ usie 28 dzion znachodžańnia ŭ IČU. Pieršyja 13 dzion była tolki vada, potym źjavilisia čaj i cukar. I jašče mnie pieradali pasyłku, tam byŭ litr soku», — skazaŭ jon.
Kamientary