Praz dva hady paśla razburalnaha pažaru ŭ Notr-Damie płany rekanstrukcyi sabora vyklikajuć ažyjataž siarod achoŭnikaŭ pryrody.
Pažar u siarednieviakovym budynku, jaki zdaryŭsia dva hady tamu, uzrušyŭ uvieś śviet. Prezident Makron paabiacaŭ tady, što pomnik historyi i kultury budzie adnoŭleny za piać hadoŭ.
Spačatku lidar Francyi vystupaŭ za toje, kab zrabić novy špil sabora bolš sučasnym, ale ekśpierty nastojvali na zachavańni stylu Vijale-le-Dziuka, piša Deutsche Welle.
Adnak kab adnavić Notr-Dam z histaryčnaj dakładnaściu, patrebna dubovaja draŭnina. Pa damoŭlenaści, pałova nieabchodnych dla rekanstrukcyi drevaŭ pieradajecca lasnymi haspadarkami, što naležać dziaržavie, a druhaja pałova — pryvatnymi ŭładalnikami lasnych uhodździaŭ.
Hijom Łarjer, aficyjny pradstaŭnik Nacyjanalnaha kiraŭnictva lasnoj haspadarki Francyi, adznačaje, što stahadovyja duby ŭ lubym vypadku apynulisia b u śpisie drevaŭ, jakija naležyć vysiečy, kab vyzvalić prastoru dla maładych drevaŭ, jakim patrebna šmat śviatła.
Adnak vysiečka drevaŭ dziela Notr-Dama aburyła ekołahaŭ. Žaki Banmen, kiraŭnik pryrodaachoŭnaj arhanizacyi Robin des Bois, pierakanany, što rašeńnie adnavić sabor u jaho pieršapačatkovym vyhladzie sastarełaje.
Jaho dumku padtrymlivajuć 40 tysiač francuzaŭ, jakija padpisali pietycyju ab spynieńni vysiečki lasoŭ dziela sabora. Duby źjaŭlajucca domam dla vialikaj kolkaści ptušak i nasiakomych.
Bolš za toje, pieršapačatkovy špil sabora budavaŭsia z sumiesi draŭniny i śvincu. U vyniku pažaru adbyłosia maštabnaje zabrudžvańnie śvincom terytoryi vakoł sabora, što było paćvierdžana ekśpiertami. Tamu na dumku Banmena, padčas rekanstrukcyi Notr-Dama nieabchodna vykarystoŭvać bolš sučasnyja i bolš biaśpiečnyja budaŭničyja materyjały, naprykład, bieton.
Adnak ekśpierty zajaŭlajuć, što ŭ vypadku z Notr-Damam bieton nie padychodzić: kab budynak sabora zachoŭvaŭ stabilnaść, jaho špil musić mieć peŭnuju vahu, dasiahnuć jakoj možna z dapamohaj kambinacyi draŭniny i śvincu.
Tamu ŭžo raspačataja aktyŭnaja padrychtoŭka da adnaŭleńnia sabora. Rekanstrukcyju Notr-Dama płanujecca pačać u kancy 2021 — pačatku 2022 hoda, a skončyć da 2024.
Ciapier čytajuć
Jak vyhladaje stylovy dom novaj rektarki Akademii mastactvaŭ koštam paŭmiljona dalaraŭ18
Jak vyhladaje stylovy dom novaj rektarki Akademii mastactvaŭ koštam paŭmiljona dalaraŭ
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary