Ryf na dnie, hleba, adpraŭka ŭ kosmas — u śviecie šyracca nietradycyjnyja sposaby pachavańnia

Fłarydskaja kampanija Eternal Reefs užo 23 hady pieratvaraje pareštki niadaŭna pamierłych u štučnyja ryfy na akijanskim dnie. Technałohija stvareńnia takich ryfaŭ prostaja — treba tolki dadać prach pamierłych u ekałahična biaśpiečnuju bietonnuju sumieś. Pa stanu na minuły hod kala bierahoŭ ZŠA raźmiaščalisia bolš za 2 tysiačy ryfaŭ kampanii, piša VVS.

Pavialičyć

Kali ž čałaviek žadaje, kab jaho pareštki zastalisia na sušy, jon moža źviarnucca da inšaj amierykanskaj kampanii, Recompose, što źmiaščajecca ŭ Sietle. Jaje ekśpierty raspracavali technałohiju, jakaja pieratvaraje cieły pamierłych u hlebu. Dla hetaha cieła źmiaščajuć u stalny cylindr, tudy ž dadajuć piłavińnie, sałomu i frahmienty raśliny lucerna. Cieła zastajecca ŭ cylindry na praciahu 30 dzion, pryčym supracoŭniki kampanii kantralujuć umovy ŭ cylindry, kab usio spryjała razmnažeńniu bakteryj. Praz 30 dzion cieła całkam pieratvarajecca ŭ hlebu, jakuju paźniej addajuć rodnym pamierłaha abo pieranosiać u śpiecyjalny les, za jakim dahladajuć supracoŭniki Recompose.

U hetym hodzie pamier suśvietnaha rynku rytualnych pasłuh aceńvajecca ŭ 110 miljardaŭ dalaraŭ, ale ekśpierty čakajuć, što da 2025 hoda hetaja ličba vyraście da 148 miljardaŭ. Pry hetym nie prosta pavialičvajecca kolkaść varyjantaŭ pachavańnia, ale i ŭzrastaje kolkaść kremacyj. To bok vidavočnaja tendencyja, što ŭsio bolš i bolš ludziej admaŭlajucca ad zvyčajnych pachavańniaŭ.

Pandemija taksama spryjaje rostu anłajn-tranślacyj z pachavańniaŭ, bo praz karancinnyja miery šmat dzie ŭ śviecie kolkaść ludziej na pachavańniach abmiažoŭvajecca. Hetym zajmajecca firma Tribucast z amierykanskaha štata Kanektykut. Jana była zasnavanaja jašče da pandemii, ale mienavita z pačatkam kavidnaj ery popyt na tranślacyi pachavańniaŭ vyras u šmat razoŭ. Tym nie mienš, i raniej trend na takuju pasłuhu byŭ vidavočny, chacia i nie nastolki. Dla prychilnikaŭ iŭdaizmu ci isłamu važna, kab pachavańnie adbyłosia na praciahu 24 hadzin z momantu śmierci, a hetaha času nie zaŭsiody chapaje, kab sabrać razam usich blizkich pamierłaha. U takim vypadku tranślacyi dapamahajuć choć niejak paŭdzielničać u pachavańni.

Narešcie, amierykanskaja kampanija Celestis dapamahaje transpartavać prach pamierłych u kosmas padčas zapłanavanych kaśmičnych misij. Dziakujučy raźvićciu kamiercyjnaha asvajeńnia kosmasu Celestis maje ŭ svaim rasparadžeńni dva-try kaśmičnyja zapuski na hod, i jość dobraja pierśpiektyva rostu jak minimum da palotaŭ raz na kvartał.

• 0
• 0
• 0
• 0
• 0
• 0
• 0
• 0