Navukoŭcy znajšli sposab pradkazać insult za 10 hadoŭ da taho, jak jon zdarycca
Sprava ŭ paharšeńni mientalnych pakazčykaŭ.
Pryznaki taho, što čałavieku pahražaje insult, možna vyjavić za šmat hadoŭ da nadychodu hetaha stanu. Pra heta śviedčyć novaja praca niderłandskich navukoŭcaŭ.
Ekśpierty ź miedycynskaha centra Univiersiteta Erazmus u Raterdamie nazirali za 14712 udzielnikami daśledavańnia, starejšymi za 45 hadoŭ, na praciahu ŭ siarednim 12,5 hadoŭ. U pačatku nazirańnia ŭdzielniki prajšli praz šerah testaŭ fizičnych i mientalnych zdolnaściej, kožnyja niekalki hadoŭ testy paŭtaralisia. Jany ŭklučali ŭ siabie pravierku pamiaci, maŭleńnia i chutkaści reakcyi, a taksama taho, jak udzielniki spraŭlajucca z bytavymi spravami nakštałt prybirańnia i kantrolu finansaŭ, piša Daily Mail.
Padčas nazirańnia 1662 udzielniki pieražyli pieršy ŭ ich žyćci insult, ich siaredni ŭzrost pry hetym skłaŭ 80 hadoŭ. Pry hetym vyniki testaŭ u hetych ludziej pačali horšać za šmat hadoŭ da chvaroby — u niekatorych vypadkach za dziesiać hadoŭ. Za dva-try hady da chvaroby ŭ budučych insultnych pacyjentaŭ taksama pačała źnižacca zdolnaść vykonvać bytavyja spravy.
Zhodna z daśledavańniem, bolš za ŭsio da insultu schilnyja pacyjenty žanočaha połu, a taksama ludzi ź nizkim uzroŭniem adukacyi i tyja, chto maje hien APOE — ličycca, što jon ihraje važnuju rolu ŭ raźvićci chvaroby Alchiejmiera. Taksama navukoŭcy ličać, što takija adchileńni ŭ pakazčykach śviedčać i pra najaŭnaść fizičnych paškodžańniaŭ mozha, naprykład, pra paškodžańni miełkich sasudaŭ, dehienieracyju niervovaj tkanki i zapaleńnie.
Vyniki pracy dazvolać miedykam prapanavać śpiecyjalnyja miery prafiłaktyki tym pacyjentam, chto ryzykuje atrymać insult. Razmova moža iści pra pierachod da bolš zdarovaha ładu žyćcia abo pra vyprabavańni novych lekaŭ.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam4
Kamientary