«Łukašenka prosta paŭtaraje za Rasijaj». Čamu ŭłady stali padtrymlivać talibaŭ, jakija znachodziacca ŭ śpisie terarystaŭ
«Zachodniaja prapahanda doŭhija hady malavała talibaŭ tolki čornaj farbaj. Heta prosta demanizacyja ruchu», — zajaviŭ Aleh Ivanoŭ, pasoł Biełarusi ŭ Tadžykistanie. Miž tym «Taliban» pryznany terarystyčnym i ekstremisckim ŭ dziaržavach-členach ADKB, kudy ŭvachodzić i Biełaruś. Ekśpiert Jahor Lebiadok patłumačyŭ «Našaj Nivie», kali i jak źmianiłasia staŭleńnie Rasii i Biełarusi da talibaŭ.
«Naša Niva»: Taliby dahetul ličacca ŭ Rasii terarystyčnaj arhanizacyjaj. Čamu ŭłady hetaj krainy stali rezka źmianiać tanalnaść? Sioleta z pradstaŭnikami ruchu sustrakalisia ŭ rasijskim MZS.
Jahor Lebiadok: Źmiena tanalnaści zusim nie rezkaja. Farmalna ŭ ŚMI dahetul pišuć, što «Taliban» źjaŭlajecca terarystyčnaj arhanizacyjaj. Ale
aktyŭny kantakt z talibami idzie, jak minimum, apošnija paŭtary hady — jak prama, tak i ŭskosna.
NN: Čamu?
JAŁ: Zrazumieła, što rasijanie zaŭždy kantaktavali z tymi, chto znachodzicca ŭ kanfrantacyi z amierykancami. Taksama jany chočuć atrymać palityčnyja vyhady ŭ tym rehijonie, u pieramovach z ZŠA pa inšych pytańniach.
Ale pakrysie stanaviłasia ŭsio bolš zrazumieła, što hety ruch pryjdzie da ŭłady. Pytańnie było tolki ŭ časie. Jak my bačym, usio adbyłosia nadta chutka. Navat dla samich talibaŭ. Ale takija zakulisnyja pieramovy viaduć usie krainy (naprykład, kitajcy). Ničoha dziŭnaha tut niama.
NN: Talibaŭ pryznajuć aficyjna?
JAŁ: Zaraz jany pryjšli da ŭłady, i ź imi dakładna treba ŭzajemadziejničać.
De-fakta talibaŭ pryznali ŭsie — i Rasija, i Kitaj, i ZŠA. Ale de-jure ŭsie chočuć dziejničać pa mižnarodnych normach. Tamu ŭsie znachodziacca ŭ pazicyi čakańnia. Spadziajucca, što «Taliban» pryznaje niejkaja kraina abo Saviet biaśpieki AAN. Tady budzie nahoda, kab prybrać ich sa śpisa terarystaŭ.
Ja ź cikavaściu naziraŭ za rasijskimi vajennymi telehram-kanałami. Kali taliby zajmali tyja abo inšyja pravincyi, u kanałach aśviatlałasia ich chutkaje prasoŭvańnie pa Afhanistanu. Potym pieraklučylisia na nieprafiesijnuju evakuacyju ZŠA.
Standartnaja psichałahičnaja linija: tyja, chto pryjšli, nie nadta drennyja, usio z-za amierykancaŭ.
Takaja rytoryka śviedčyć, što talibaŭ chutka pryznajuć abo, prynamsi, chutka buduć ź imi kantaktavać.
NN: Jak być z paŭstancami ŭ pravincyi Pandžer? Na ich baku vice-prezident Afhanistana, pradstaŭnik zakonnaj ułady.
JAŁ: Farmalna tak, jon pradstaŭnik zakonnaj ułady. Ale kamu zaraz cikavyja hetyja farmalnaści? Syn Achmad-Šacha Masuda, jaki zajaviŭ pra supraciŭ, kaža, što nibyta ŭtrymlivaje pravincyju.
Pakul jaho zajava bolš vyhladaje jak palityčnaja, bo za imi niama surjoznaj bajavoj siły. Nichto nie płanuje jaho padtrymlivać, prynamsi, adkryta. Ni ZŠA, ni Rasija, ni Kitaj. Mahčyma, Mansur spadziajecca atrymać aŭtanomiju dla Panšera.
Pakul niama padstaŭ kazać, što heta siła.
NN: Pasoł Biełarusi ŭ Tadžykistanie nie zhadziŭsia z tym, što taliby abaviazkova niasuć zło, razbureńni, narkatrafik i kazaŭ pra demanizacyju ruchu. «Nie mohuć demany na praciahu dvuch-troch tydniaŭ zabrać 30-miljonnuju krainu», — zajaviŭ jon. Jak heta razumieć?
Jał: Kali pasłuchać jaho, atrymlivajecca, što heta zachodniaja prapahanda paŭpłyvała na rašeńnie kiraŭnictva Rasii pryznać talibaŭ terarystami (śmiajecca). Naturalna, žartuju.
Kali surjozna, to ŭsie vykazvańni Biełarusi — heta faktyčna vykazvańni Rasii. Łukašenka stanovicca havoračaj hałavoj Rasii. A jaho pazicyja paŭtarajecca pa ŭsioj viertykali — ad MZS da pryŭładnych palitołahaŭ.
U Rasii panuje rytoryka, što Zachad — heta vorah, z-za jaho ŭsio drennaje, a ŭ talibaŭ, umoŭna kažučy, jość svaje plusy i ź imi daviadziecca mieć spravu Biełarusy paŭtarajuć hetyja dumki.
Akramia źniešniaj palityki jość jašče i ekanamičny faktar.
U nas vielmi dobry ekspart u Afhanistan. Z pačatku hoda ŭžo kala 115 miljonaŭ dalaraŭ. Kali ekstrapalavać hetyja dadzienyja na nastupnyja piać miesiacaŭ, možna naličyć jašče kala 90 młn.
Heta niemałyja hrošy, asabliva va ŭmovach sankcyj.
NN: Kali Rasija pryznaje talibaŭ, Biełaruś pastupić hetak ža?
JAŁ: Lidary ruchu ŭklučanyja ŭ śpis KDB, jak asoby, jakija datyčnyja da terarystyčnaj dziejnaści. Ale siońnia jany tam jość, zaŭtra ich niama. Tamu dapuskaju, što Biełaruś moža pryznać talibaŭ uśled za Rasijaj.
NN: Ci budzie Biełaruś pradprymać niejkija dziejańni pa linii ADKB?
JAŁ: Miarkuju, temu ADKB praźmierna razduli. Užo daŭno byli zapłanavanyja vučeńni sił hetaj arhanizacyi, u jakich ad Biełarusi prymie ŭdzieł padraździaleńnie 103-j pavietrana-desantnaj bryhady. Paśla ich zaviaršeńnia nijakaha praciahu nie budzie:
Rasija nie zacikaŭlenaja ni ŭ jakim kanflikcie. Ź biežancami raźbiarucca Tadžykistan i Uźbiekistan. Kali raptam uźniknie vajskovaje pytańnie, u hetym rehijonie znachodzicca rasijskaja baza.
Što tyčycca Biełarusi, dyk Łukašenka kazaŭ, što nam patrebnaja ŭzhodnienaja palityka pa Afhanistanu. Jon staviŭ pierad saboj metu pakazać značnaść ADKB. Ale heta dastatkova farmalnaja, simvaličnaja arhanizacyja.
Vyklučeńnie — pastaŭki zbroi pa źnižanym koštam (naprykład, z Rasii ŭ Biełaruś), a taksama zmahańnie z narkotykami i narkatrafikam. Adnak u apošnim vypadku chutčej dziejničała Rasija i miascovyja krainy, čym ADKB jak niejkaja struktura. Hetak sama budzie i ŭ dačynieńni da Afhanistana.
Ciapier čytajuć
Minski haradski sud nie vytrymlivaje nahruzki — nie paśpiavajuć sudzić palitviaźniaŭ3
Kamientary