Što rasijskija ŚMI pišuć pra sustreču Pucina i Łukašenki 9 vieraśnia

Kommiersant': Pakiet z 28 intehracyjnych sajuznych prahram całkam hatovy da pryniaćcia

Pakiet z 28 rasijska-biełaruskich intehracyjnych sajuznych prahram całkam hatovy da pryniaćcia, śćviardžajuć surazmoŭcy «Kamiersanta» ŭ Maskvie i Minsku, znajomyja z chodam padrychtoŭki dakumienta.

Kiraŭniki ŭradaŭ dźviuch krain płanujuć padpisać ich na nastupnym tydni, ale abaviazkovymi da vykanańnia jany stanuć paśla zaćviardžeńnia Pucinym i Łukašenkam.

Choć prahramy datyčacca zbližeńnia ekanomik, ich uzhadnieńnie nazyvajuć hieapalityčnym pośpiecham i adznačajuć: ekanamičnaja intehracyja niepaźbiežna paciahnie za saboj palityčnuju.

Na 10 vieraśnia ŭ Minsku namiečana pasiadžeńnie Savieta Ministraŭ Sajuznaj dziaržavy. Jaho hałoŭnaja meta — padpisańnie 28 sajuznych prahram premjer-ministrami Michaiłam Mišuścinym i Ramanam Hałoŭčankam.

«Usio ŭ vysokaj stupieni hatoŭnaści. Supiarečnaściaŭ niama», — zapeŭniŭ «Kommiersant'» surazmoŭca ŭ biełaruskich dziaržstrukturach.

Padobnym čynam situacyju kamientujuć i z rasijskaha boku. Sa słoŭ infarmavanaha surazmoŭcy z rasijskaha boku, 9 vieraśnia Pucin i Łukašenka praviaduć finalnaje abmierkavańnie dakumienta i «dobrasłaviać» urady na padpisańnie.

Sajuznyja prahramy praduhledžvajuć intehracyju ekanomik dźviuch krain, uklučajučy stvareńnie adzinaha rynku nafty i hazu i ŭnifikacyju padatkovaj i mytnaj sistem.

Rasijski dypłamat nazyvaje ŭzhodnienyja prahramy praryŭnym i važnym prajektam:

«Heta pieršy dakumient, jaki pierakładaje rasijska-biełaruskija adnosiny z płoskaści dekłaracyj ab viečnym siabroŭstvie ŭ płoskaść kankretnych mier pa zbližeńni ekanomik našych krain».

Viadučy NTV raskazaŭ aniekdot ab drennym tancory

Televiadučy NTV Andrej Norkin pažartavaŭ ab tak zvanaj «šmatviektarnaj palitycy» Łukašenki, raskazaŭšy aniekdot pra tancora.

«Tut mierkavańni padzialilisia. Adny ličać, što my dajšli da finišnaj kropki, ciapier buduć padpisanyja ŭsie nieabchodnyja papiery i my budziem žyć u novych umovach. Inšyja ličać, što ničoha nie źmienicca i nijakaha prasoŭvańnia napierad nie budzie», — zajaviŭ Norkin.

Viadoŭca i inšyja ŭdzielniki efiru nahadali, što hałoŭnaj pieraškodaj dla realnaj intehracyi Rasii i Biełarusi zaŭsiody zastavałasia «šmatviektarnaja» palityka Łukašenki. Adnak padziei 2020 hoda z masavymi pratestami i źjaŭleńniem Śviatłany Cichanoŭskaj pakazali niebiaśpieku «staŭki na Zachad».

«Dumaju, što pieramiennaść pazicyi biełaruskaha lidara zaležyć ad cisku na jaho. Heta moža być niejki ŭnutrany cisk, moža być źniešni. I ŭ zaležnaści ad hetaha jon sapraŭdy źmianiaje svaju pazicyju. Dobra heta ci drenna, ja nie viedaju, ale heta adbyvajecca jak u znakamitym hazietnym zahałoŭku: «Vykonvajučy taniec z šablami, drenny tancor raptam staŭ dobrym»», — pažartavaŭ Norkin.

Pavialičyć

«Viestnik Kavkaza»: Tolki Rasija moža vyratavać Biełaruś ad kryzisu

«Dla prezidenta Pucina pytańnie ab uładzie nie staić, a voś dla Łukašenki, viadoma, pryncypovaje pytańnie — zachavać svaju ŭładu na terytoryi Respubliki Biełaruś u poŭnym abjomie. Nakolki Maskva moža harantavać ci nie harantavać heta, źjaŭlajecca pradmietam pieramovaŭ, jakija viaducca ŭ ramkach šmatlikich sustreč Pucina i Łukašenki», — skazaŭ u hutarcy z vydańniem «Viestnik Kavkaza» kandydat palityčnych navuk Stanisłaŭ Byšok.

Niezdarma Łukašenka ŭvieś čas zajaŭlaje pra toje, što Biełaruś nikoli nie budzie achviaravać svaim suvierenitetam i «nikoli nie ŭvojdzie ŭ skład Rasii». Pryčyna takich rezkich zajaŭ zaklučajecca nie tolki ŭ imknieńni zachavać uładu pry intehracyi z Rasijaj, ale i ŭ strachu pierad revalucyjaj, adznačaje vydańnie.

U toj ža čas, jon i nie moža siadzieć na dvuch kresłach, kali Jeŭropa, Brytanija i ZŠA zahnali Biełaruś pad žorstki režym sankcyj. Kab vyratavacca ad kryzisu i «zachodnich kalektaraŭ», Minsku patrebny sponsar. Hetym sponsaram moža vystupić tolki Rasija, ličyć «Viestnik Kavkaza».

«U ludziej, jakija nastrojenyja na intehracyju Biełarusi i Rasii ŭ ramkach Sajuznaj dziaržavy, jość aściarohi, što i hetaja sustreča nie pryniasie niejkich praryŭnych historyj, źviazanych z padpisańniem darožnych kart.

Darožnyja karty pa biełaruska-rasijskaj intehracyi stali ŭžo padobnyja na hulniu ŭ karty: raniej kazali, što jość 31 darožnaja karta, i ź ich 30 užo ŭzhodnienyja, a ciapier havorycca, što ŭzhodnienyja 28 z 28 darožnych kart — ale zusim niezrazumieła, što ŭ hetych kartach źmiaščajecca», — adznačyŭ Byšok.

Pa mytni, padatkach i enierhietycy intehracyja całkam realnaja, ličyć vydańnie. Dla Łukašenki tut samaje adčuvalnaje pytańnie — paliva. Paśla padatkovaha manieŭru ŭ Rasii ceny na impart nafty z Rasii ŭ Biełaruś stali daražejšyja.

Palitołah Suzdalcaŭ: Łukašenka jedzie nie pa sajuznyja prahramy, a pa hrošy

«Łukašenka moh padpisać darožnyja karty jašče ŭ 2019 hodzie, ale jamu nie patrebna intehracyja. Jamu patrebnyja tolki hrošy. Adsiul i ŭsie prablemy ŭ rasijska-biełaruskich adnosinach, — ličyć palitołah Andrej Suzdalcaŭ. — Hety vizit prachodzić u suviazi z vybarami ŭ Dziarždumu. Mabyć, Łukašenka pavinien adyhrać niejkuju pazityŭnuju rolu dla ŭradavaha łahiera. Adsiul, napeŭna, zajaŭlenaja sumiesnaja pres-kanfierencyja.

Łukašenka tydzień tamu abviaściŭ, što buduć abmiarkoŭvacca sajuznyja prahramy, jakija zamianili darožnyja karty. Ale padpisvacca jany, pa jaho dumku, pavinny nie raniej za śniežań.

Zrazumieła, što jon jedzie nie pa sajuznyja prahramy, a pa hrošy. Vystupajučy na svajoj pres-kanfierencyi miesiac tamu, jon abviaściŭ ab svaim žadańni atrymać ad Rasii kala 5 młrd dalaraŭ.

Heta hałoŭnaja jaho meta. Ja sumniavajusia, što jon atrymaje hetyja hrošy, tamu što ŭ nas niama intehracyi. My naohuł nie admaŭlajemsia padtrymać Biełaruś i Łukašenku, padčas padtrymki Łukašenki ŭ Sankt-Pieciarburhu ŭ siaredzinie lipienia abmiarkoŭvałasia navat pytańnie ab kredytach na apłatu rasijskaj nafty, ale heta ŭsio pavinna było iści ŭ ramkach intehracyi, jakoj pakul što niama.

Łukašenka moh padpisać darožnyja karty jašče ŭ 2019 hodzie, ale jamu nie patrebna intehracyja. Jamu patrebnyja tolki hrošy. Adsiul i ŭsie prablemy ŭ rasijska-biełaruskich stasunkach».

Pavialičyć

Svobodnaja priessa: Pucin i Łukašenka 9 vieraśnia pačnuć hałoŭny torh hoda

Zapłanavanuju sustreču palitykaŭ prakamientavaŭ vykładčyk Finansavaha ŭniviersiteta pry ŭradzie Rasii Stanisłaŭ Mitrachovič.

«Pytańnie ŭsio toje ž: ci hatovy Łukašenka nie na słovach, a na spravie pahadzicca na dadatkovy ŭzrovień intehracyi. Tamu što da siońniašniaha momantu jon sprabavaŭ usialak adchilicca ad hetaha pracesu i zryvaŭ hetuju intehracyju hadami.

Jon adkazny za toje, što ŭ nas da hetaha času nie źjaviłasia adzinaja valuta, niama adzinaha hramadzianskaha i padatkovaha kodeksaŭ. Biełaruskija pradpryjemstvy rasijskamu biznesu jon taksama pradavać admaŭlaŭsia. Pry hetym Alaksandr Ryhoravič uparta choča, kab ceny na haz, jaki pradajecca ŭ Biełaruś, byli takimi ž, jak u Smalenskaj vobłaści Rasii», — adznačaje ekśpiert.

«Ja ŭžo nie kažu, što jon admoviŭsia pryznavać Krym častkaj Rasii, i navat avijaznosiny z paŭvostravam admoviŭsia ŭstanavić. Paŭdniovuju Asieciju z Abchazijaj nie pryznaŭ. I nijakaj, navat simvaličnaj dapamohi ŭ Siryi, nie akazaŭ», — narakaje Mitrachovič.

Fiedieralnoje ahienstvo novostiej: Rasija i Biełaruś stvarajuć sacyjalna-ekanamičny padmurak Sajuznaj dziaržavy

Za minuły hod Maskva i Minsk prarabili ŭ dačynieńni da intehracyi kudy bolšy abjom rabot, čym za papiarednija dziesiać hadoŭ, miarkuje ahladalnik prapahandysckaha vydańnia.

«2020-y pakazaŭ, što čas sastupak z rasijskaha boku prajšoŭ. Čarhovy raz «horda braznuć dźviaryma» i «paviarnucca tvaram da Jeŭropy» ŭ Alaksandra Ryhoraviča nie atrymajecca — situacyja ŭžo nie taja. Vosień 2021 hoda pavinna stać u adnosinach Rasii i Biełarusi šmat u čym znakavaj», — piša vydańnie.

Praciahvać admachvacca ad intehracyi Łukašenki paśla padziej 2020-ha dazvolić sabie ŭžo nie moža.

«Z prajektaŭ prybranyja palityčnaja častka i radykalnyja sacyjalna-ekanamičnyja kroki ŭ vyhladzie adzinaj valuty abo bankaŭskaj sistemy. Takija rezkija ŭzrušeńni, jakija stanuć surjoznym abciažarańniem dla ajčynnaj ekanomiki, Rasii nie patrebnyja», — ličyć ahladalnik.

Jon adznačaje, što Rasija imkniecca zrabić handlovy praces ź Biełaruśsiu maksimalna prazrystym i lehalnym, vyvieŭšy jaho šeruju častku ŭ rehulavanaje, zakonnaje pole.

Za likvidacyju siehmienta kantrabandy biełaruskich i tranzitnych tavaraŭ Rasija hatovaja płacić handlovymi prefierencyjami i davać kredyty.

U vajskova-techničnaj intehracyi Rasija damahłasia ledź nie samych uražlivych vynikaŭ, piša vydańnie.

«Kali kazać biez akaličnaściaŭ, to my nazirajem stvareńnie Maskvoj i Minskam užo nie tolki adzinaj sistemy SPA, ale i samaj sapraŭdnaj adzinaj armii dźviuch dziaržaŭ», — havorycca ŭ artykule.

Rasija sistemna stvaraje hłybokuju asnovu ŭzajemnaj intehracyi, jakuju pierapynić niejkim palityčnym rašeńniem u Minsku budzie niemahčyma, robić vysnovu aŭtar.

EurAsia Daily: Nie varta čakać praryvu

Čakać ad majučaj adbycca sustrečy ŭ Maskvie Alaksandra Łukašenki i Uładzimira Pucina praryvu pa sajuznych prahramach nie varta, ličyć vydańnie. Havaryć ab padpisańni dakumientaŭ pa intehracyi, imavierna, usio jašče rana.

«Ni Maskva, ni Minsk, pajšoŭšy na sastupki adzin adnamu pa šerahu napramkaŭ, usio jašče nie hatovyja stračvać ekanamičnuju vyhadu ad dvuchbakovaha supracoŭnictva, na čym siońnia i trymajecca Sajuznaja dziaržava», — piša aŭtar.

Sajuznaja dziaržava ŭžo pieratvaryłasia ŭ svojeasablivy partniorski sajuz, dzie abodva baki hatovyja da zbližeńnia, ale pry zachavańni svaich nacyjanalnych intaresaŭ.

Tamu i sajuznyja prahramy, kali jany buduć kali-niebudź padpisanyja, naŭrad ci stanuć instrumientami realizacyi sajuznaj damovy 1999 hoda, bo ad bolšaści metaŭ i zadač, jakija byli ŭ im prapisanyja, baki ŭžo daŭno admovilisia.

«Viersija»: Usio ž abvieściać ab zaviaršeńni farmiravańnia Sajuznaj dziaržavy

Paśla sustrečy Pucina i Łukašenki budzie vialikaja pres-kanfierencyja, namiaknuli ŭ MZS Biełarusi. Vydańnie adznačaje, što apošni čas paśla sustreč palitykaŭ vychadaŭ da žurnalistaŭ nie było — nie ab čym było paviedamlać. Ale raz abiacajuć pres-kanfierencyju, značyć, rychtujecca niešta važnaje?

«Chutčej za ŭsio 9 vieraśnia ŭsio ž abvieściać ab zaviaršeńni farmiravańnia Sajuznaj dziaržavy, tolki heta nie stanie śviatočnaj dataj stvareńnia novaha sajuza, heta adbudziecca krychu paźniej. Važna, što narešcie zaviaršyłasia doŭhaja i nudnaja ekanamičnaja prycirka Sajuza, jana vyklikała bolš za ŭsio pytańniaŭ. Darečy, usie niadaŭnija infarmacyjnyja ataki na Siarhieja Hłaźjeva, architektara hetaha sajuza, byli źviazany mienavita z tym, što ekanamičnaja prycirka adbyvajecca zanadta ŭžo imkliva, nie ŭsie hetamu rady. Ale pytańniaŭ i nasamreč šmat. Ab sajuzie abvieściać, ale chto rastłumačyć vyrazna, jakim jon budzie i čaho ŭsim čakać?» — kaža palitołah Siarhiej Markaŭ.

Pradmiet nieŭrehulavanaj sprečki — rasijskaja vajskovaja prysutnaść u Biełarusi i pasady ŭ novaj kanfihuracyi Sajuznaj dziaržavy, piša «Viersija». Sprečnych momantaŭ chapaje, i ich našmat bolš, čym adna «darožnaja karta».

BFM.ru: Łukašenka dabivaje apazicyju

Ahladalnik vydańnia piša pra represii suprać biełaruskaj hramadzianskaj supolnaści ŭ kantekście sustrečy Łukašenki i Pucina.

Žurnalist ličyć, što padaŭleńnie biełaruskich pratestaŭ i apazicyi ŭ cełym raźvivajecca, pierš za ŭsio, zhodna z unutranaj palityčnaj łohikaj. Pry hetym, viadoma, Łukašenka i pierad tvaram Pucina choča vyhladać palitykam mocnym, jaki nie prahinajecca ni pierad apazicyjaj, ni pierad Zachadam.

Z boku Maskvy vidavočna nie było nijakich sprobaŭ pierakanać Minsk u tym, kab pajści na niejkija kampramisy i tym bolš dyjałoh z apazicyjaj. Razmaŭlać, ułasna, užo tam i niama z kim, piša rasijski ŚMI.

• 0
• 0
• 0
• 0
• 0
• 0
• 0
• 0