Što rabić, kali miažu znoŭ raptam zakryjuć? Biełarusy abmiarkoŭvajuć, jak płanavać pajezdku ŭ novych realijach

«Što, kali zachraśnieš na miažy ŭ dzień zakančeńnia vizy?»

Daviedacca zahadzia, ci nie budzie zakryta miaža, niemahčyma, pakolki heta zaležyć ad taho, ci buduć znoŭ masava lacieć u Litvu mieteazondy z cyharetami.

Žančyna, jakaja źbirajecca viartacca ŭ Biełaruś u dzień zaviaršeńnia terminu dziejańnia vizy, chvalujecca ŭ čacie.

«Padkažycie, što budzie, kali zachraśnieš na miažy ŭ dzień zakančeńnia vizy? Kali voś tak miažu zakryjuć, a ŭ ciabie ŭ momant stajańnia skončycca viza. U mianie prosta viza zakančvajecca roŭna ŭ dzień adbyćcia, ale pa płanie pavinna prajści nie paźniej za 13:00 u dzień zakančeńnia vizy na rejsavym aŭtobusie».

Pavialičyć

Adzin z karystalnikaŭ adkazaŭ žančynie, što ŭ vypadku praterminavańnia vizy joj pahražaje departacyja i zabarona na ŭjezd u Šenhienskuju zonu terminam ad 6 miesiacaŭ.

Inšyja tłumačać, što prablema tut nie ŭ litoŭskim baku, a ŭ tym, što jana sama nie zakłała ryzyki, pakolki pahraničniki hladziać na rečy pa fakcie.

«Jany nie buduć raźbiracca ŭ pryčynna-vynikovaj suviazi. Jość prymaŭka: «Prablemy indziejca šeryfa nie chvalujuć», — žartujuć.

Pavialičyć

Inšaja karystalnica raicca ŭ čacie, što joj rabić, kali jana maje kvitki na 1 listapada na 22:00 ź Minska ŭ aeraport Vilni, adkul z małym synam lacić na samalocie ŭ Bierlin.

Pavialičyć

Žančynie paraili vyjechać zahadzia i zanočyć u haścinicy ŭ Litvie. Maŭlaŭ, fizična budzie lahčej praciahvać pajezdku paśla adpačynku dy i ryzyka prapuścić samalot budzie mienšaj.

Jak i abiacaŭ litoŭski bok, ruch na miažy byŭ adnoŭleny a 12‑j hadzinie suboty, paśla 14 hadzin ad momantu zakryćcia. 

Za hety čas čarha na vyjezd ź Biełarusi praz «Kamienny Łoh» vyrasła z 10 da 90 mašyn. Pierad adnaŭleńnie ruchu taksama sabrałasia čarha z 15 aŭtobusaŭ.

Pavialičyć

Čarha na vyjezd ź Litvy ŭ Biełaruś praz hadzinu paśla adnaŭleńnia pracy «Kamiennaha Łohu» raściahnułasia na 1,2 kiłamietra.

Pavialičyć

U «Bieniakoniach» situacyja amal nie źmianiłasia, čarha vyrasła ŭsiaho na 20 mašyn. Čarhi z aŭtobusaŭ tam nie było.

Čarha na vyjezd ź Litvy — kala 500 mietraŭ.

Jakija jość alternatyŭnyja varyjanty?

Alternatyŭnych varyjantaŭ, jak terminova trapić u Litvu abo vyjechać ź jaje na aŭto, kali miažu zakryvajuć, nie šmat.

Najbližejšy punkt propusku ad litoŭskich «Miednikaŭ» i «Šalčaninkaj» znachodzicca ŭ Łatvii. Ad Vilni da «Paternijekaŭ» — kala 270 kiłamietraŭ.

Ale chutka vyjechać ź ES praz Łatviju nie atrymajecca. Pa-pieršaje, z 1 vieraśnia dziejničajuć novyja praviły ŭjezdu ŭ Łatviju. Zamiežnik abaviazany zapoŭnić ankietu nie paźniej jak za 48 hadzin da pierasiačeńnia miažy. Kali ankiety nie budzie — moža čakać štraf da $2000 jeŭra i departacyja. Heta datyčycca ŭ tym liku tranzitu pa terytoryi Łatvii pry zajeździe z Estonii i Litvy.

Pa-druhoje, z 15 listapada na vyjezd z Łatvii dziejničaje elektronnaja čarha. Bližejšyja volnyja daty jość nie raniej čym praz tydzień.

Kab vyjechać ź Biełarusi ŭ Łatviju, treba taksama zahadzia (za 48 hadzin) zapoŭnić admysłovuju ankietu i nie zabyvać, što Łatvija ŭ adroźnieńnie ad Litvy całkam zabaraniła prajezd pa svajoj terytoryi na mašynach ź biełaruskimi numarami.

Ad Vilni da polskaha «Tarespala» kala 550 kiłamietraŭ, ale mienavita hety doŭhi maršrut u teoryi moža stać adzinym alternatyŭnym šlacham dla tych, kaho zakryćcio miažy zastała ŭ čarzie abo ŭ darozie.

U Polščy niama ni zabarony na prajezd na aŭto ź biełaruskimi numarami, ni ankiet, jakija treba zapaŭniać zahadzia, ni elektronnaj čarhi.

Aŭtobusam alternatyva tolki ŭ abjezd praz Polšču. Daroha z Varšavy da Vilni zajmaje 7,5—8,5 hadziny.

Bolš składanyja i darahija varyjanty — samalotam u Kalininhrad ci ŭ Stambuł, a adtul užo ŭ Jeŭropu. I znoŭ ža — takija kvitki treba kuplać zahadzia, u vypadku raptoŭnaha zakryćcia miažy takija maršruty nie nadta vyručać.

• 0
• 1
• 1
• 2
• 0
• 0
• 0
• 0