«Hałoŭnaje — ja jedu dadomu». Historyja taty čatyroch dziaciej z Oršy, jaki vyjšaŭ pa pamiłavańni

Błoh «Otražienije» pahavaryŭ z hetym čałaviekam.

Pavialičyć

Maksim — tata čatyroch dziaciej. Da zatrymańnia pracavaŭ pradaŭcom u adnym z mahazinaŭ elektratechniki. Pisaŭ muzyku, rabiŭ elektrahitary i draŭlanyja leśvicy. Paśla vybaraŭ, jak jon raspaviadaje, adzin z supracoŭnikaŭ zapościŭ u ich pracoŭny čat fota milicyjaniera Višnieŭskaha. Maksim pakinuŭ pad zdymkam niecenzurny kamientar. U vyniku ŭ krasaviku 2021-ha jaho sudzili pa art. 369 KK RB («Abraza pradstaŭnika ŭłady») i prysudzili da dvuch hadoŭ «chimii». 24 lipienia Šaŭlinski adpraviŭsia ŭ vypraŭlenčuju ŭstanovu adkrytaha typu №21 u Mazyry. Pracavaŭ u ŽEU, rabiŭ, žartuje, usio, što skažuć.

— Adzin dzień ja santechnik, druhi — elektryk, — koratka apisvaje svaje budni surazmoŭca i kaža: pra toje, što jon u śpisie pamiłavanych, daviedaŭsia ŭ čaćvier a 10 ranicy: — Staju ŭ padvale na taburetcy, ukručvaju lampačku — i tut zvanok sa śpiecadździeła: «Terminova pryjazdžaj u kantoru zvalniacca». — «Jak tak? — pierapytvaju. — Ja ž tolki ŭładkavaŭsia». A jany mnie: «Ty pamiłavany». Ad niečakanaści ja ledź nie hrymnuŭsia z taburetki.

Pa słovach Maksima, u bolšaści žyćciovych vypadkaŭ jon čałaviek nie nadta ŭdačlivy. To ŭ jamu, śmiajecca, upadzie, to varona jaho paznačyć, a tut raptam — džek-pot.

— Ja nie adrazu pavieryŭ, što ciapier ja svabodny čałaviek, — emacyjna apisvaje jon toje, što adbyvajecca. — Napeŭna, tolki kali padpisvaŭ abychodny list, da mianie dajšło.

Čamu z sotniaŭ palitviaźniaŭ u śpis pamiłavanych trapiŭ mienavita jon, Maksim nie viedaje. U papraŭčaj ustanovie, praciahvaje, jamu hetaha nichto nie rastłumačyŭ. Supracoŭniki, uspaminaje, sami byli ŭ šoku ad taho, što adbyvajecca. Nakolki zrazumieŭ Šaŭlinski — jon u ich pieršy, z kim takoje zdaryłasia.

— Mahčyma, heta praz toje, što heta maja pieršaja sudzimaść i ŭ mianie čaćviora niepaŭnaletnich dziaciej. Da taho ž, ja kampiensavaŭ maralnuju škodu milicyjantu. Suma pazovu była tysiača rubloŭ, — dzielicca zdahadkami surazmoŭca i reziumuje: — Kali ščyra, jakaja tut užo roźnica. Hałoŭnaje — ja jedu dadomu.

— Vy pisali prašeńnie ab pamiłavańni?

— U lipieni paśla apielacyi, kali rašeńnie pa majoj spravie zastałosia raniejšym, ja zapoŭniŭ ankietu na sajcie kruhłaha stała demakratyčnych sił, jakim kiruje Juryj Vaskrasienski, — uspaminaje Maksim. — Ukazaŭ, chto ja i pa jakim artykule asudžany. Adkaz atrymaŭ užo ŭ Mazyry. U zakaznym liście pakazvałasia, što ja ŭniesieny ŭ śpis na padaču prašeńnia ab pamiłavańni. Paśla hetaha administracyja VU stała źbirać dakumienty, kab adpravić maju spravu ŭ Minsk na razhlad. Adnym sa składnikaŭ spravy było prašeńnie na imia Alaksandra Łukašenki.

Kudy mienavita ŭ Minsk palacieli dakumienty, Maksim nie viedaje. Było heta, kaža, tydni dva tamu. Prašeńnie, uspaminaje, składaŭ u volnaj formie. U im apisaŭ situacyju, z-za jakoj trapiŭ pad artykuł, ukazaŭ, što takoje ź im adbyłosia ŭpieršyniu i što doma jaho čakajuć dzieci.

— Ja paprasiŭ dać mnie šaniec, — reziumuje aršaniec i tłumačyć, čamu pajšoŭ na taki krok: — Heta byŭ adziny šaniec ubačyć dziaciej raniej, čym praz dva hady. Naohuł u našaj ustanovie ŭžo bolš za 15 čałaviek, asudžanych pa «palityčnych» artykułach. Usie dobryja chłopcy. Usie spadziajucca, što budzie amnistyja.

— A pad čyjo daručalnictva vas vyzvalili?

— Ja tak razumieju, pad daručalnictva Vaskrasienskaha.

Pieršy čałaviek, jakomu palitviazień paviedamiŭ ab vyzvaleńni, stała mama. Ad naviny mama raspłakałasia.

— Siońnia (u čaćvier) u 17:40 ja vyjechaŭ z Mazyra ŭ Minsk, adtul — na Oršu. Dadomu dabiarusia da troch nočy. Dla dziaciej heta budzie siurpryz, — nie chavaje emocyj Maksim.

— A što dalej?

— Chaču abniać dziaciej, sustrecca z rodnymi, — pieraličvaje jon płany na najbližejšy čas. — U piatnicu mnie treba schadzić u milicyju, adznačycca, tam skažuć, što i jak. A dalej budu šukać pracu.

• 0
• 0
• 0
• 0
• 0
• 0
• 0
• 0