Šrajbman pra amnistyju: Važna, kab samyja viadomyja vorahi — palitviaźni — publična kajalisia i źviartalisia da jaho za vyratavańniem

Maštab sastupki nie toj. Dla sihnału ab tym, što Łukašenka hatovy handlavacca, treba było niešta kudy bolš surjoznaje, čym nastolki niaznačnaja kolkaść pamiłavanych na fonie novaha naboru palitviaźniaŭ i zakidu novych hrup mihrantaŭ pad polskuju i litoŭskuju miežy.

Ja nie hatovy ŭjavić, što Minsk nastolki naiŭny i nie razumieje, što taki sihnał asudžany zhubicca na fonie ŭsio jašče daminujučaj eskałacyi jak unutry krainy, tak i ŭ adnosinach z susiedziami.

U hetych pamiłavańniach ja baču, chutčej, unutranuju łohiku. Łukašenka časta paŭtaraje dumku ab tym, što bolšaść tych, chto byŭ adurmanieny ŭ 2020-m, zrazumieli, što jon mieŭ racyju, i adviarnulisia ad svaich telehram-lalkavodaŭ.

Jak časta byvaje z Łukašenkam, paŭtareńnie hetaha adarvanaha ad sacyjalnaj realnaści tezisa — sproba pierakanać u im samoha siabie. Jamu važna adyści ad traŭmy žniŭnia-2020, spakavać heta ŭ kamfortnuju karcinu śvietu, dzie abłudnyja adumalisia i paviarnulisia nazad da jaho, a ŭsio heta było prosta časovym pamutnieńniem.

Dla hetaha važna, kab samyja radykalnyja, viadomyja abo aktyŭnyja vorahi — palitviaźni — publična kajalisia i źviartalisia da jaho pa vyratavańnie. Heta žyvoje paćvierdžańnie jaho žadanaj karciny śviety.

Usio roŭna, jak vybivajucca hetyja raskajańni. Važna, kab ich było šmat, važna, kab jany mienavita pryznali vinu i źviarnulisia da jaho z prašeńniem usie, a nie jak u 2011 hodzie, kali častka palitzekaŭ adpuskali navat bieź ich prośby, prosta tamu što handlavalisia ź Jeŭropaj.

Ale mabyć, praces zboru prašeńniaŭ idzie tak sabie. Davodzicca matyvavać astatnich. A dla hetaha im treba nie tolki paharšać umovy ŭ SIZA i turmach, ale i pakazvać zvarotnyja prykłady, što voś ludzi vykanali ŭsie ŭmovy — i napierad, na svabodu, a vy praciahvajcie hnić tut, pakul nie adumajeciesia.

Ni Zachad, ni Minsk jašče nie saśpieli dla handlu. Davier źniščany, hulać u treci raz u adnu i tuju ž hulniu ŭsio jašče nie chočacca, i zamiest hetaha baki zaniatyja pavyšeńniem adzin dla adnaho cany varožych dziejańniaŭ. Minsk — praź mihrantaŭ, Zachad — praz sankcyi.

I pa całkam nadziejnych danych, u piatym pakiecie sankcyj ES buduć daloka nie tolki simvaličnyja abmiežavańni. Sa śniežnia Litva zusim surjozna rychtujecca da prypynieńnia tranzitu kaliju z-za sankcyj ZŠA.

Heta nie toj fon, na jakim Łukašenka zachoča nieadkładna prahnucca i paskoryć svaje pamiłavańni. Bo navat kali jon heta zrobić, kaliju heta nie dapamoža. Płanka dla skasavańnia sankcyj mocna padrasła za 10 hadoŭ.

• 0
• 0
• 0
• 0
• 0
• 0
• 0
• 0