«Ciomnyja spravy robiacca za začynienymi dźviarami». Leanid Sudalenka piša ŭ listach pra sud nad im
«Homielskaja Viasna» apublikavała vytrymki ź listoŭ palitźniavolenaha pravaabaroncy «Viasny» Leanida Sudalenki da homielskaha aktyvista Vasila Palakova, dzie jon raspavioŭ, što adbyvajecca na zakrytym pracesie.
Nahadajem, u sudzie Centralnaha rajona h. Homiela 3 vieraśnia raspačaŭsia sud nad pravaabaroncam «Viasny» Leanidam Sudalenkam i vałanciorkami arhanizacyi Taćcianaj Łasicaj i Maryjaj Tarasienka. Usich ich vinavaciać u arhanizacyi i padrychtoŭcy dziejańniaŭ, što hruba parušajuć hramadski paradak (č. 1 art. 342 KK), navučańni i padrychtoŭcy asob dla ŭdziełu ŭ takich dziejańniach, a taksama ich finansavańni abo inšym materyjalnym zabieśpiačeńni (č. 2 art. 342 KK).
Sudździa Siarhiej Sałoŭski pa chadajnictvie prakuroraŭ Jaŭhiena Fartušniaka i Kiryła Vyšniakova vynies pastanovu, jakoj vyznačyŭ pravodzić sud nad «viasnoŭcami» ŭ zakrytym režymie na praciahu ŭsiaho raźbiralnictva.
Leanid Sudalenka piša, što abskardziŭ rašeńnie suda ab zakryćci pracesu:
«Ciomnyja spravy robiacca za začynienymi dźviarami, i z hetym nie paspračaješsia. Ja abskardziŭ tym nie mienš, patrabujučy publičnaści suda».
Palitźniavolenaj Taćcianie Łasicy ŭ pieršy dzień pracesu stała błaha:
«Sud byŭ da 13.00, potym Taćcianie vyklikali chutkuju i ŭsio. Paśla abiedu suda ŭžo nie było. Praciah u paniadziełak, kali Taćciana budzie ŭ normie».
Leanid na sudzie padaŭ užo 9 chadajnictvaŭ — usie byli adchilenyja:
«Padaŭ 9 chadajnictvaŭ, jakija sud paśladoŭna adchiliŭ. Dva ź ich — na paručycielstva. Admoŭlena».
Abvinavačvańnie pa spravie padtrymlivajuć try prakurory:
«U spravie až try prakurory z haradskoj prakuratury padtrymlivajuć abvinavačańnie i surjozna ličać, što pravaabarona ŭ krainie niezakonna!»
U sudzie dapytvajuć 61 śviedku:
«U mianie praciahvajucca sudy. Nudna, rucina. Vyjšaŭ, pahladzieŭ naleva, sieŭ u tralejbus… (tak Leanid apisvaje adkazy śviedak, u jakich šmat «vady», — zaŭv. red.) I tak 97% tamoŭ — ni pra što. Raźbirajuć sieryju pikietaŭ 2019 hoda Maryi Tarasienki suprać dekreta ab darmajedach. Jašče krychu i da vybaraŭ 10-ha hoda viernucca».
Prahnozy pa vyniku suda ŭ pravaabaroncy niesuciašalnyja:
«Ale vyrak užo čytajecca. Miarkujučy jak jon idzie, sudździa škaduje, što niama dzie razhulacca, a tak by daŭ bolej».
«Dziaŭčat (Łasicu i Tarasienka) ad pieršaj častki, dumaju, vyzvalać. Taćcianie jašče paŭhoda daviadziecca pasiadzieć. Pa Maryi — intryha. Pa druhoj častcy aryšt — minimalna. U mianie maksimalny termin — minus niekalki miesiacaŭ na dzicia. Značyć, dziembiel — viasna 23-ha. A tam pa situacyi».
Leanid płanuje padavać apielacyjnuju skarhu na prysud i nie hublaje nadziei na vyzvaleńnie:
«Zhodny na ŭsie 100%, što pytańnie vyzvaleńnia — pytańnie času. Chaciełasia by chutčej, ale, vidać, jość jašče zapas tryvałaści».
Ciapier čytajuć
Śviatłana Cichanoŭskaja zaviała treds. Što joj pišuć biełarusy?3
Kamientary