«Trapiła ŭ śpis iudaŭ». Čempijonka Biełarusi pa konnym sporcie pra toje, jak admoviłasia padpisvać praŭładny list i źjechała ŭ Polšču
Volha Safronava — čempijonka Biełarusi pa konnym sporcie. Jana padpisała piśmo spartoŭcaŭ suprać hvałtu i nie trapiła na Alimpijadu. Čynoŭniki skazali, što ŭ jaje kania prablemy sa zdaroŭjem, choć niezaležnaje abśledavańnie za miažoj pakazała, što koń hatovy byŭ da spabornictvaŭ. Ciapier Volha žyvie ŭ Polščy i rychtujecca vystupać za inšuju krainu.
Pra dohlad koniej (u ich jość navat śpiecyjalny salaryj), niadopusk na Alimpijadu, honar być biełaruskaj i płany na vialiki sport dziaŭčyna raskazała ŭ intervju jutub-błohu «Maksimalna».
Niekalki cytat ź intervju.
Pra niadopusk na Alimpijadu, jakaja musiła stać pieršaj dla Volhi
«My znachodzilisia ŭ Ratamcy na vučebna-trenirovačnym zbory, i była finalnaja vieterynarnaja kamisija, na jakoj pavinny byli skazać, u jakoj formie znachodzicca koń. Na hetaj kamisii było zaklučeńnie, što moj koń kulhaje i nie budzie dapuščany.
Try daktary hladzieli, jak jana biehaje pa ćviordym hruncie (asfaltu), miakkim (piasku), rabili UHD. Choć kali ja pryjechała ŭ polskuju kliniku, zrabili jašče renthieny śpiny, šyi, patylicy, abśledavali kania bolš detalova, čym na vieterynarnaj kamisii ŭ Minsku, prablem nie znajšli.
Ja z hetym kaniom 10 hod, ja viedaju jaho. Byli sumnievy, što niešta na UHD nie tak, ja ž nie mahu bačyć, ale heta nie paćvierdziłasia».
Pra miesca ŭ rejtynhu najeźnic
«Tolki dźvie biełaruskija spartsmienki (ja i Hanna Karasiova) byli ŭ top-100 suśvietnaha rejtynhu da karanavirusa. U nas mała mahčymaściaŭ, u tym liku finansavych, vystupać u Jeŭropie. Składana pryvieźci koniej: tolki prachodžańnie miažy zajmaje 10 hadzin. Takoje vymotvańnie žyvioł nikoli nie pryviadzie da dobraha vyniku.
Ale ŭ našaj zonie, centralnajeŭrapiejskaj, dzie kala 26 krain, zaŭsiody Biełaruś, Rasija i Ukraina zajmali lidzirujučyja pazicyi.
Fiederacyja konnaha sportu Polščy zacikaŭlena ŭ supracy sa mnoj, bo da taho, jak zdaryŭsia karanavirus i ŭsie mieli roŭnyja mahčymaści vystupać, maja pazicyja ŭ suśvietnym rejtynhu była vyšejšaj za polskich spartsmienaŭ. Kab vystupać za Polšču, mnie nie treba prymać hramadzianstva hetaj krainy, tolki pamianiać spartovaje hramadzianstva, prynaležnaść da fiederacyi».
Pra bjuci-pracedury dla koniej
«Salaryj prahravaje myšcy. Možna vykarystoŭvać da treniroŭki, ale zvyčajna paśla — kania padsušvajuć i hrejuć.
Kožny dzień vyčesvaju koniej, časam navat nie adzin raz na dzień. Kupaju ich z šampuniem z ramonkam. Čystka nie tolki estetyčny efiekt maje — ty ščotkaj myšcy razahravaješ, heta jak masaž.
A 6-j ranicy ŭ koniej śniadanak: jany atrymlivajuć siena, miuśli. Paśla iduć na trenažor i hadzinu tam chodziać. Z 9-10 ranicy ŭ ich pačynajecca asnoŭnaja treniroŭka sa mnoj. A 13-j u ich abied. Paśla troch hadzin jany znoŭ iduć abo na trenažor, abo ŭ zahon špacyravać».
Pra dzień vybaraŭ
«Leta minułaha hoda całkam źmianiła majo staŭleńnie da žyćcia. Za ŭsio śviadomaje žyćcio nie było takoha śpiektra emocyj za taki karotki termin. My žyli niedaloka ad Steły. U noč 9-10 žniŭnia mnie padałosia, što ŭ Minsku śviatočny salut. A potym ty pačynaješ čuć kryki ludziej. I ŭ hety momant ciabie ahortvaje bol i strach. Noč ja praviała ŭ ślazach».
Pra sport i palityku
«U Biełarusi sport nie pa-za palitykaj. Ale spadziajusia, pastupova naš alimpijski ruch budzie mieć pieravahu nad palityčnymi pracesami.
Mnie prapanoŭvali padpisać praŭładny list spartsmienaŭ. Dali tekst, skazali: pračytaj, kali zhodna, padpišy. Ja pračytała i skazała: dziakuj, da pabačeńnia.
Ja trapiła ŭ śpis «Iudy Biełarusi» — śpis ludziej, jakich nielha brać na pracu ci rekamiendavana zvolnić. Paśla hetaha ŭ mianie sumnieńniaŭ nie ŭźnikała, što viartacca dadomu niebiaśpiečna».
Kamientary