Na pomniku 1000‑hodździa Bresta zrabili 75 arfahrafičnych pamyłak

U minułuju subotu Brest śviatkavaŭ svaje 990‑ia ŭhodki. Da hetaj daty byŭ adkryty pomnik, jaki čamuści nazyvajecca «1000‑hodździu Bresta».

Pomnik sapraŭdy hrandyjozny — tut i kniaź Uładzimir Vasilkavič, i vialiki kniaź Vitaŭt, i dziaržaŭny dziejač Mikałaj Radzivił Čorny, a taksama try zbornyja vobrazy — fihury Maci, Žaŭniera i Letapisca. Naviersie pomnika anioł‑abaronca trymaje kryž.

Abapał pomnika źmieščanyja 12 bronzavych došak, na jakich koratka napisanaja historyja horada. Vykananyja nadpisy pa‑biełarusku. Ich sens vielmi dobry — heta sapraŭdny himn lubimamu horadu. Adnak…

Litary «ŭ» tam niama ŭ pryncypie, heta značyć, usie 70 razoŭ, jakija pavinna być litara «u nieskładaovaje» tam staić «u doŭhaje».

A heta — hrubaja arfahrafičnaja pamyłka. Jość i inšyja moŭnyja niedachopy. Padrabiaznyja zdymki nadpisaŭ my pieradali kandydatu fiłałahičnych navuk Jurasiu Bušlakovu.

— Ja vykładaŭ na fiłfaku BDU, i za «u nieskładovaje» pavodle praviłaŭ znižajecca adznaka. U škole taksama heta ličycca za pamyłku. A na centralizavanym testavanni adymajecca ceły bał — bo heta paŭnavartasnaja arfahrafičnaja pamyłka. Toje samaje, što ŭ ruskaj movie napisać «š» zamiest «ŝ» — i skazać, što «u nas rysački nie było ŭ šryfcie». Aproč taho, na doškach jość i inšyja pamyłki. Napisana «Dniepra‑Buhski», a treba «Dniaproŭska‑Buhski», napisana «asvJačana», a treba «asvJečana», napisana «ab BierascJe», a słušna — «ab BierascI»…

Kali b student dapusciŭ stolki pamyłak, jon atrymaŭ by nul bałaŭ!..

Ci jašče. Letapisiec na pomniku trymaje ŭ rukach knihu, dzie paznačany arhanizatary ŭstalavańnia pomnika. Dyk voś, navat prozvišča staršyni harvykankama tam napisanaje z pamyłkaj: pa‑rusku zamiest «PałyšJenkov» značycca «PałyšInkov». Pierachryscili i skulptara — spadar AndrYjuk staŭ AndrEjukom.

U Bresckim abłvykankamie pra pamyłki viedajuć.

— Jašče za 15 chvilin da adkryćcia pomnika była sklikana narada z udziełam namiesnika ministra kultury spadara Ryłatki, — kaža Leanid Nieściarčuk, hałoŭny śpiecyjalist pa achovie historyka‑kulturnaj spadčyny Upraŭleńnia kultury abłvykankama. — Tam byŭ składzieny pratakoł, dzie zafiksavanyja ŭsie pamyłki i ŭkazana na nieabchodnaść terminova ich vypravić. Miarkuju, što takoje adbyłosia praź śpiešku —

prajekt pomnika zaćviardžali 11 razoŭ, tamu rabiłasia ŭsio ŭ apošni momant.

Hleb Łabadzienka, Źviazda

• 0
• 0
• 0
• 1
• 0
• 0
• 0
• 0