U Homielskim dramatyčnym teatry — kadravyja čystki. Znoŭ praz «palityku»
Jak stała viadoma «Našaj Nivie», u Homielskim abłasnym dramteatry praz hramadzianskuju pazicyju zvolnili niekalkich supracoŭnikaŭ. Heta paćvierdzili sami supracoŭniki.
U pryvatnaści, zajavu na zvalnieńnie «pa ŭłasnym žadańni» napisała aktrysa Hanna Kavalkova.
Žančyna pracavała ŭ Homielskim dramteatry z 2000 hoda. Mieła ŭznaharody i hramaty ad Homielskaha abłvykankama. Apošnim časam była zadziejničanaja ŭ śpiektaklach «Punsovieńkaja kvietačka» Siarhiej Aksakava, «Čaroŭny son» pa Dastajeŭskim, «Mužčynam uvachod zabaronieny» Kaninhiem i inšych.
Taksama zvolnili kaściumierku Irynu Žukavu (Tarnaŭskuju). Pad pytańniem los zahadčyka litaraturnaj častkaj Uładzimira Stupinskaha.
Pryčyna zvalnieńniaŭ, jak kažuć sami eks-supracoŭniki, «u hramadzianskaj pazicyi». Skrynšoty ź ich staronak nie tak daŭno źjavilisia ŭ prapahandysckich telehram-kanałach. U jakaści «złačynstva» demanstravalisia reposty ź infarmacyjnych resursaŭ, što pryznanyja siońnia ekstremisckimi, avatarki ź bieł-čyrvona-biełym ściaham, padtrymka represavanych.
«Danosy stali zvyčajnaj źjavaj», — prakamientavali teatrały.
U vieraśni minułaha hoda na znak pratestu suprać hvałtu z Homielskaha teatra samastojna syšła aktrysa Ała Lenaja. U žniŭni 2020-ha jana i jašče šeść supracoŭnikaŭ zapisali videazvarot «My biełarusy. My suprać hvałtu».
Heta nie adziny vypadak teatralnaj začystki apošnim časam. Na dniach stała viadoma pra sychod z Respublikanskaha teatra biełaruskaj dramaturhii mastackaha kiraŭnika Alaksandra Harcujeva. Pa infarmacyi «Našaj Nivy», na hetym zvalnieńni ŭ teatry nie skončacca. U repiertuary RTBD na studzień i luty šmat admien.
Nie tak daŭno palityčnyja zvalnieńni zakranuli i Kołasaŭski teatr u Viciebsku: paśla pakazu premjery śpiektakla «Cil» pa pjesie dramaturha Hryhoryja Horyna, dzie sa sceny prahučała fraza «Žyvie Fłandryja!», tam nie praciahnuli kantrakty z dyrektaram Alaksandram Starych i jak minimum tryma akciorami: Anžalikaj Barkoŭskaj, Julijaj Krašeŭskaj i Arciomam Hierakom.
«My majem spravu z tatalnaj zabaronaj na refleksiju». Siarhiej Budkin — pra pazityŭnyja i niehatyŭnyja vyniki hoda ŭ kultury
Teatralnaja chvala salidarnaści. Jakija śpiektakli pra represii ŭ Biełarusi źjavilisia ŭ śviecie i dzie ich možna pahladzieć?
-
«Budzie śmiešna i baluča»: «Kupałaŭcy» prezientujuć zaŭtra novy śpiektakl. U hałoŭnych rolach — Manajeŭ, Biełachvościk, Harcujeva
-
«Rašeńnie pryjšło zvonku». Što adbyvajecca ŭ viciebskim teatry, dzie ŭ śpiektakli prahučała «Žyvie Fłandryja!» i pačałasia čarada zvalnieńniaŭ?
-
Kudy schadzić u teatr u afłajnie? Skłali z krytykam top śpiektaklaŭ, za jakija nie soramna
Ciapier čytajuć
«Biełarusy dastatkova mudryja, kab čakać». Sieviaryniec vystupiŭ u Vilni3
Kamientary