Biełaruskija ŭłady źbirajucca nabyvać Sputnik V pa canie Pfizer ci Moderna
Adpaviednuju vysnovu možna zrabić z zajavy Taćciany Runiec, staršyni Pastajannaj kamisii pa ekanomicy, biudžecie i finansach Savieta Respubliki.
Raspaviadajučy pra biełaruski biudžet na 2022 hod, Runiec adznačyła, što na finansavańnie śfiery achovy zdaroŭja pojdzie 8,4 miljarda rubloŭ. Ź ich 240 miljonaŭ płanujuć nakiravać na zakupku nie mienš jak 4 miljonaŭ doz vakcyny «Sputnik V». Vytvorčaść chočuć arhanizavać na bazie Biełmiedpreparataŭ.
Kali aryjentavacca na kurs Nacbanka, vychodzić, što ŭ biełaruski biudžet zakłali canu na dozu dvuchkampanientnaj vakcyny kala $23.
Što pakazalna, u Rasii raniej vyznačyli maksimalnuju adpusknuju canu na «Sputnik V» na ŭzroŭni 866 rasijskich rubloŭ 81 kapiejki. Z ulikam dastaŭki možna akruhlić da 900 rubloŭ, ale navat tak vychodzić 31 biełaruski rubiel ci $12, što ŭdvaja mienš za zakładzienuju biełaruskimi ŭładami canu.
Aproč taho, z ahučanym sienatarkaj biudžetam vychodzić, što Biełarusi było b tańniej nabyvać dvuchkampanientnuju vakcynu Pfizer-BioNTech (Comirnaty®), jakaja kaštuje $19.50. Prynamsi takaja cana zajaŭlenaja na pieršyja 100 miljonaŭ doz. Košt adnoj z najdaražejšych u śviecie dvuchkampanientnych vakcyn Moderna taksama nie vyhladaje dla Biełarusi niepadjomnym — jon varjujecca ŭ miežach $25-$37. Nie kažučy pra adnakampanientnuju vakcynu Johnson & Johnson — $10 za dozu ci dvuchkampanientnuju AstraZeneca, jakuju Jeŭropa ŭvohule nabyvała pa $2.15, a Vialikabrytanija i ZŠA — pa $3-4.
Treba adznačyć, što i Pfizer, i Moderna, i Johnson, i AstraZeneca ŭchvalenyja SAAZ i vakcynacyja imi ŭ mnohich krainach vyzvalaje ad nieabchodnaści mieć PŁR pry ŭjezdie ci ad karancina. U toj čas jak najaŭnaść biełaruskaha siertyfikata ab vakcynacyi «Sputnikam» pakul nie vyzvalaje navat ad nieabchodnaści mieć PŁR pry ŭjeździe ŭ Rasiju, nie kažučy pra inšyja krainy.
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary