U Biełarusi ŭvodziać kryminalnuju adkaznaść za dziejnaść ad imia niezarehistravanych arhanizacyj

Heta vynikaje z zakona № 144-Z, jaki byŭ apublikavany siońnia na Nacyjanalnym pravavym internet-partale. Jon nabudzie moc praz 10 dzion paśla aficyjnaha apublikavańnia.

Kryminalny kodeks dapoŭnili jašče adnym artykułam 193-1 «Niezakonnaja arhanizacyja dziejnaści hramadskaha abjadnańnia, relihijnaj arhanizacyi abo fondu albo ŭdzieł u ich dziejnaści».

«Arhanizacyja dziejnaści albo ŭdzieł u dziejnaści palityčnaj partyi, inšaha hramadskaha abjadnańnia, relihijnaj arhanizacyi abo fondu, u dačynieńni da jakich rašeńnie ŭpaŭnavažanaha dziaržaŭnaha orhana ab ich likvidacyi ci prypynieńni ich dziejnaści, a roŭna arhanizacyja dziejnaści albo ŭdzieł u dziejnaści palityčnaj partyi, inšaha hramadskaha abjadnańnia, relihijnaj arhanizacyi abo fondu, jakija nie prajšli va ŭstanoŭlenym paradku dziaržaŭnuju rehistracyju, pry adsutnaści prykmiet złačynstva, praduhledžanaha artykułam 423-1 hetaha Kodeksa, — karajucca štrafam, abo aryštam, abo pazbaŭleńniem voli na termin da dvuch hadoŭ».

U artykule jość niekalki zaŭvah, jakija tłumačać, što aznačaje ŭdzieł u dziejnaści «palityčnaj partyi, inšaha hramadskaha abjadnańnia, relihijnaj arhanizacyi abo fondu», u jakim vypadku dziejnaść nie padpadaje pad dziejańnie novaha artykuła, a taksama ŭ jakich vypadkach možna paźbiehnuć kryminalnaj adkaznaści.

Akramia taho, pavodle novaha zakona, z Kodeksa ab administracyjnych pravaparušeńniach vyklučajecca artykuł 24.57 «Niezakonnyja arhanizacyja dziejnaści hramadskaha abjadnańnia, relihijnaj arhanizacyi abo fondu albo ŭdzieł u ich dziejnaści».

Ale artykuł 24.23 KaAP dapoŭnili novym punktam.

«Zbor, atrymańnie, vykarystańnie hrašovych srodkaŭ, inšaj majomaści, u tym liku majomasnych pravoŭ, a taksama vyklučnych pravoŭ u vyniki intelektualnaj dziejnaści, a roŭna vykanańnie rabot, akazańnie pasłuh dla met kampiensacyi vydatkaŭ, źviazanych z pryciahnieńniem asoby da adkaznaści za parušeńnie paradku arhanizacyi abo praviadzieńnia masavych mierapryjemstvaŭ, ciahnuć nakładańnie štrafu ŭ pamiery ad piaci da tryccaci bazavych vieličyń z kanfiskacyjaj pradmieta administracyjnaha pravaparušeńnia abo biez kanfiskacyi, a na jurydyčnuju asobu — da sta pracentaŭ ad sumy (koštu) pradmieta administracyjnaha pravaparušeńnia ź jaho kanfiskacyjaj abo biez kanfiskacyi».

Novy zakon nabudzie moc praz 10 dzion paśla jaho aficyjnaha apublikavańnia.

U biełaruskim zakanadaŭstvie da 2018 hoda isnavaŭ artykuł, jaki zabaraniaŭ dziejnaść ad imia niezarehistravanych arhanizacyj — 193-1, ale paśla jaho admianili. Zamiest kryminalnaj adkaznaści za ŭdzieł u niezarehistravanych arhanizacyjach uviali administracyjnuju: u miežach artykuła 23.88 KaAP (ciapier 24.57).

Ale na pačatku 2021 hoda ŭ Biełarusi źjaviŭsia artykuł 423-1 KK: «Nievykanańnie rašeńnia ab pryznańni arhanizacyi, dziejnaści indyvidualnaha pradpryjemstva ekstremisckimi, ab spynieńni dziejnaści i pradstaŭnictva zamiežnaj ci mižnarodnaj arhanizacyi i (ci) prypynieńnia ich dziejnaści.

Ciapier kryminalnaja adkaznaść budzie tyčycca ŭdziełu nie tolki ŭ arhanizacyjach, pryznanych ekstremisckimi, a ahułam va ŭsich, jakija dziaržava likvidavała ci nie zachacieła aficyjna rehistravać.

«Praktyka prymianieńnia znoŭ budzie maksimalna šyrokaj — na mierkavańnie śledčaha i prakuratury. Heta pravavy krok nazad, bo artykuł z takim źmiestam i raniej mocna krytykavali pravaabaroncy, tamu što jon maksimalna niekankretny. Što takoje dziejnaść ad imia niezarehistravanaj arhanizacyi? Farmalna, kali ty siabruješ ź niejkim pravaabaroncam, niejak jamu dapamahaŭ, tabie mohuć prypisać udzieł u dziejnaści struktury, da jakoj jon maje dačynieńnie»,

— vykazvaŭ aściarohi «Našaj Nivie» juryst Andrej Mačałaŭ paśla anansavańnia pryniaćcia źmienaŭ u zakanadaŭstvie. 

Za zbor hrošaj na štrafy buduć karać? Raźbirajemsia, što značać źmieny ŭ Kryminalnym i Administracyjnym kodeksach

• 0
• 0
• 0
• 0
• 0
• 0
• 0
• 0