«Heta byŭ asnoŭny łahistyčny kalidor». Jak ciapier «Biełaruśkalij» budzie pastaŭlać pradukcyju na ekspart?
Pačatak hoda dla «Biełaruśkaliju» nie zadaŭsia. Ź lutaha litoŭskaja čyhunka płanuje spynić pieravozku biełaruskich uhnajeńniaŭ. Ekspart usio? Raskazvajem, jakim moža być alternatyŭny maršrut pastavak.
Tranzit biełaruskich kalijnych uhnajeńniaŭ praź litoŭskuju čyhunku byŭ vyhadny abiedźvium krainam.
«Pieravałka prykładna kala 10 miljonaŭ ton kalijnych uhnajeńniaŭ — heta vielmi surjoznyja abjomy. I sprava ŭ tym, što Biełaruś źbirałasia ich pavysić: ź siońniašnich 12,5 miljonaŭ ton da 15 miljonaŭ u 2025 hodzie.
Mierkavałasia, što dadatkovyja abjomy pojduć praz kłajpiedski port, jak najbolš efiektyŭny łahistyčny kalidor», — kaža ekśpiert pa pytańniach paliŭna-enierhietyčnaha kompleksu i kalijnaha rynku Taćciana Manionak.
Kłajpiedski port byŭ asnoŭnym dla transparciroŭki biełaruskaha kaliju. Tamu Biełaruś budzie šukać sposaby abyści zabaronu. Jakim moža być vyjście?
«Pieršaje, što prychodzić na rozum, — mahčymaść pastavak praz rasijskija kampanii. Tym nie mienš niaprosta budzie stvaryć sumiesnaje pradpryjemstva, naprykład, z «Urałkalijem», bo efiekt roznych sankcyj moža ŭpłyvać na situacyju.
Ale siońnia davoli vysokija košty na kalijnyja ŭhnajeńni na suśvietnych rynkach, i tyja straty, jakija vidavočna budzie nieści Biełaruskaja kalijnaja kampanija, častkova buduć kampiensavanyja za košt bolš vyhadnaj kanjunktury».
Jość alternatyŭnyja maršruty pastavak. Asnoŭny — praz Rasiju.
«Biełaruskaja kalijnaja kampanija raniej jašče aprabiravała Paŭnočny marski šlach — pa im mahčymy pastaŭki ŭ Kitaj i Indyju. Bolš mahčymaściaŭ źjaviacca, napeŭna, viasnoj, bo zimoj składana pracavać pa hetym kalidory praz umovy nadvorja. Ale ŭ inšyja krainy z hetaha kalidora ładzić pastaŭki bolš składana», — tłumačyć ekśpiert.
Prablema jašče ŭ tym, što ŭ portach Leninhradskaj vobłaści nie chapaje mahutnaściaŭ. Pahladzieć na prykładzie naftapraduktaŭ. Biełaruś źbirałasia letaś pastavić praz porty Piciera kala 3,5 miljonaŭ ton naftapraduktaŭ, ale pastaviła tolki 1,8 miljona. Bo šukała bolš efiektyŭnyja maršruty.
«Biełaruski bok budzie šukać mahčymaść pieraaryjentavacca častkova na rynki inšych krain. Heta budzie zrabić składana, bo rynak śpiecyfičny. Dyj stracić tradycyjnych pakupnikoŭ dla Biełaruskaj kalijnaj kampanii vielmi baluča», — ličyć Taćciana Manionak.
Čytajcie taksama:
Šrajbman: Heta budzie samy mocny adnamomantny ekanamičny ŭdar z usiaho, što Zachad rabiŭ ź Minskam dahetul
Kolki stracić «Biełaruśkalij» ad sychodu Yara? Sprabujem padličyć
Ciapier čytajuć
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ2
Kamientary