«Duchoŭnyja skrepy» pa-turkmiensku. Zabaraniajecca trymacca ŭ publičnych miescach za ruki, a žančynam nanosić makijaž
Paśla niadaŭniaj źmieny ŭ Turkmienistanie prezidenta ŭłady surjozna ŭzialisia za źniešni vyhlad i pavodziny hramadzian. U turkmienskim horadzie Mary dziasiatki par byli zatrymanyja za toje, što trymalisia za ruki ŭ hramadskich miescach. Pra heta paviedamlaje «Radyjo Azatyk».
Palicyja abvinavaciła zatrymanych u parušeńni «tradycyjnych hramadskich asnoŭ». U adździaleńnie ich dastaŭlali ŭ kajdankach; tam zatrymanym žančynam, pa słovach adnoj ź ich, była pračytanaja lekcyja ab tym, što jany «parušyli prystojnaści, kali trymalisia za ruki z mužčynami».
Zatrymanych vyzvalili paśla taho, jak jany padpisali abiacańni ab tym, što nadalej nie buduć publična demanstravać svaje pačućci. Palicyjanty paabiacali im «surjoznyja prablemy» ŭ vypadku paŭtornych parušeńniaŭ.
Pry hetym, jak padkreślivaje «Radyjo Azatyk», aficyjna trymacca za ruki ŭ Turkmienistanie nie zabaroniena.
Kantrol za pavodzinami i źniešnim vyhladam žycharoŭ, asabliva žančyn, u Turkmienistanie značna ŭzmacniŭsia paśla prychodu da ŭłady Sierdara Bierdymuchamiedava. U sakaviku jon vyjhraŭ faktyčna biezalternatyŭnyja prezidenckija vybary i źmianiŭ na pasadzie svajho baćku, Hurbanhuły Bierdymuchamiedava.
Z krasavika ŭ krainie byli ŭviedzienyja zabarony na niekatoryja kaśmietyčnyja apieracyi, takija jak pavieličeńnie hrudziej i vusnaŭ ci tatuaž. Paviedamlałasia pra masavyja zatrymańni na vulicach žančyn z nakładnymi paznohciami i viejkami. Žančyn patrabavali ad ich pazbavicca, a taksama zapłacić bujnyja štrafy.
Supracoŭnic dziaržaŭnych pradpryjemstvaŭ pad pahrozaj zvalnieńnia zmušali pisać raśpiski ab admovie ad kaśmietyki. U škołach sa staršakłaśnicami pravodzilisia «tłumačalnyja hutarki» ab niedapuščalnaści manikiuru i piedykiuru. Dziasiatki ściuardes i pravadnic, jakija pracujuć na dziaržaŭnyja transpartnyja kampanii, byli zvolnienyja za hrudnyja impłantanty i pavieličeńnie vusnaŭ.
Jak padkreślivaje «Radyjo Azatyk», aficyjna ab uviadzieńni abmiežavańniaŭ u dačynieńni da źniešniaha vyhladu nie abjaŭlałasia; kiraŭniki admaŭlalisia pakazvać rabotnikam adpaviednyja narmatyŭnyja dakumienty.
Akramia hetaha, ułady zabaranili žančynam sadzicca na piaredniaje siadzieńnie ŭ aŭtamabili. Kiroŭcam taksama ciapier nie dazvalajecca padvozić žančyn, kali jany nie ich svajački — darožnaja palicyja stała spyniać mašyny, dzie znachodziacca žančyny, i patrabavać dokazaŭ svajackaj suviazi z kiroŭcam.
Krynicy, blizkija da ŭrada, taksama paviedamili «Radyjo Azatyk», što ŭłady razvažajuć adnosna ŭviadzieńnia zabarony dla žančyn na vyjezd za miažu. Tady pakinuć Turkmienistan jany zmohuć tolki ŭ vypadku nieabchodnaści lačeńnia za miažoj.
Žorstkija abmiežavańni na źniešni vyhlad žančyn u Turkmienistanie pieryjadyčna abjaŭlalisia i raniej, u časy prezidenctva Hurbanhuły Bierdymuchamiedava. Ale zvyčajna strohaha kantrolu za ich vykanańniem nie było.
Kamientary