Va ŭkrainskuju Umań pryjechali bolš za 35 tysiač pałomnikaŭ-chasidaŭ
U horad Umań, što znachodzicca ŭ Čarkaskaj vobłaści, na śviatkavańnie Roš ha-Šana, jaŭrejskaha Novaha hoda, užo pryjechali bolš za 35 tysiač chasidaŭ-pałomnikaŭ, paviedamlaje «Ukrainskaja praŭda». Jany tradycyjna štohod pryjazdžajuć z roznych krain śvietu, kab ušanavać pamiać rabi Nachmana, zasnavalnika bracłaŭskaha chasidyzmu, čyja mahiła znachodzicca ŭ hetym ukrainskim horadzie.
Pra najaŭnuju ciapier situacyju paviedamiŭ pradstaŭnik Dziaržaŭnaj pamiežnaj słužby Ukrainy pałkoŭnik Andrej Dziemčanka. Pavodle jaho słoŭ, asnoŭny prytok pałomnikaŭ adbyŭsia za apošnija piać dzion, choć prybyvać jany pačali jašče niekalki tydniaŭ tamu.
Chasidy aktyŭna pierasiakajuć miažu Ukrainy nie tolki z krainami ES, ale i praz Małdovu. Bolšaść ź ich ruchajecca arhanizavanymi hrupami.
Sioleta byli vypadki admovy va ŭjeździe z-za prablem z dakumientami abo tamu, što niekatorym asobam užo raniej zabaranili ŭjezd za parušeńni ŭkrainskaha zakanadaŭstva.
Užo ŭ samim horadzie pałomniki ŭziali ŭdzieł u masavaj malitvie Cikun a-Kłali, jakaja źjaŭlajecca važnaj častkaj śviatkavańnia. Na jaje sabralisia kala 10 tysiač čałaviek.
Śviata Roš ha-Šana ŭ 2025 hodzie doŭžycca z 22 pa 24 vieraśnia. Heta śviata, jakoje simvalizuje pačatak novaha hoda pa iŭdziejskim kalendary. Dla chasidaŭ hety čas duchoŭnaha abnaŭleńnia.
Raniej Ministerstva zamiežnych spraŭ Ukrainy zaklikała zamiežnych pałomnikaŭ uličvać, što ŭ krainie praciahvajecca poŭnamaštabnaja vajna, tamu dziaržava nie moža harantavać im poŭnaj biaśpieki padčas znachodžańnia. Ale chasidy ŭ svaich pałomnictvach zvyčajna nie zvažajuć na ciažkaści — u 2020 hodzie, padčas dziejańnia karanavirusnych abmiežavańniaŭ, jany praryvalisia na terytoryju Ukrainy praź biełaruskuju miažu.
Kamientary
To bok, jany viedajuć, što vajna i praz kaho.