U Pružanach znoŭ sudziać 65-hadovuju Alenu Hnaŭk. Joj pahražaje da šaści hadoŭ źniavoleńnia
Siońnia ŭ sudzie Pružanskaha rajona raspačaŭsia sud nad 65-hadovaj palitźniavolenaj aktyvistkaj Alenaj Hnaŭk. Asudžanuju pa «spravie karahodaŭ» ciapier sudziać pa dvuch artykułach Kryminalnaha kodeksa: art. 367 (paklop na Łukašenku) i art. 369-1 (dyskredytacyja Respubliki Biełaruś) za vosieńskija pasty ŭ Facebook i Instagram pra kurdskija siemji i stanovišča mihrantaŭ u Biełarusi. Ciapier žančynie pahražaje da šaści hadoŭ kałonii. Pad vartaj Alena ŭtrymlivajecca ŭžo piać miesiacaŭ, piša «Viasna».
Raniej Alenu Hnaŭk asudzili na 3 hady «chatniaj chimii» pavodle dvuch inšych artykułaŭ. U mai 2021 hoda jana atrymała dva hady «chatniaj chimii» ŭ miežach «karahodnaj spravy». A potym u vieraśni žančyna atrymała novy termin — jašče dva hady «chimii». Pavodle abvinavačańnia, Alena Hnaŭk padčas razhladu svajoj raniejšaj kryminalnaj spravy za ŭdzieł u «karahodzie pratestu» vymaviła frazu, dzie była abraza na adras Łukašenki. Sumarnaje pakarańnie — try hady abmiežavańnia voli biez nakiravańnia ŭ papraŭčuju ŭstanovu adkrytaha typu.
11 studzienia 2022 hoda Alenu zatrymali čarhovy raz i aryštavali na 15 sutak za parušeńnie režymu adbyvańnia «chatniaj chimii» ŭ suviazi z apošnim zatrymańniem u śniežni. U pružanskim IČU joj zabaranili pieradačy, čytać i pisać. U znak pratestu Alena abviaściła haładoŭku.
Z «sutak» piensijanierku nie vypuścili — suprać jaje zaviali dźvie kryminalnyja spravy pa art. 367 (paklop na Łukašenku) i art. 369-1 (dyskredytacyja Respubliki Biełaruś). Zhodna z materyjałami spravy, Hnaŭk 23 listapada 2021 hoda raźmiaściła ŭ Fejsbuku i Instahramie «iłžyvyja źviestki ab pravavym stanoviščy zamiežnych hramadzian u Respublicy Biełaruś, što było skiravanaje na pryčynieńnie istotnaj škody dziaržaŭnym intaresam». U pastach Alena raspaviadała pra kurdskija siemji i stanovišča mihrantaŭ u Biełarusi.
Na pačatku sakavika Alena była pieraviedzienaja z baranavickaha SIZA-6 u SIZA-1, adtul — u RNPC psichičnaha zdaroŭja ŭ Navinkach. Paśla jaje znoŭ pieraviali ŭ SIZA-6, pierad sudom — u Pružanski IČU.
Na pačatku maja Alena Hnaŭk abviaščała haładoŭku za kratami. Jana patrabavała, kab listy, jakija jana napisała, dachadzili adrasatam. Alena trymała haładoŭku bolš za tydzień i damahłasia taho, kab joj pačali addavać listy.
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami12
Kamientary