«Patop biblejskich maštabaŭ». Pavodka ŭ indyjskim štacie Asam ŠMAT FOTA
Biesprecedentnyja daždžy i pavodki ŭ indyjskim štacie Asam zatapili vioski, źniščyli ŭradžaj i razburyli damy. Pa danych uładaŭ, paciarpieli 32 z 35 rajonaŭ štata, u vyniku čaho za apošni tydzień zahinuła nie mienš za 45 čałaviek. Bolš za 4,7 młn žycharoŭ štata zastalisia biez prytułku, piša BBC.
Praliŭnyja daždžy taksama abrynulisia na susiedni štat Miehchałaja, dzie za apošni tydzień achviarami stychii stali 18 čałaviek.
U Asamie ŭrad adkryŭ amal 1500 łahieraŭ dapamohi dla pieramieščanych asob, ale stychija mocna ŭskładniła ich pracu. Navat ratavalnyja łahiery znachodziacca ŭ vartym žalu stanie.
«U łahiery niama pitnoj vady. U majho syna žar, ale ja nie mahu advieści jaho da lekara», — kaža Chusna Biahum. Ciapier razam z dvuma dziećmi jana chavajecca ad niepahadzi ŭ pachilenym płastykavym namiocie.
«Ja nikoli raniej nie bačyła ničoha padobnaha. Nikoli ŭ žyćci takich pavodak nie bačyła», — kaža jana.
Pavodki rehularna nanosiać škodu miljonam ludziej, jakija žyvuć pablizu ŭradlivych bierahoŭ Brachmaputry, jakuju časta nazyvajuć ratavalnym kruham Asama. Ale ekśpierty śćviardžajuć, što źmiena klimatu, bieskantrolnaje budaŭnictva i chutkaja industryjalizacyja pavialičyli častatu ekstremalnych zjaŭ u nadvorji.
Sioleta Asam ciarpić ad pavodak užo druhi raz — u mai anałahičny razhuł stychii zabraŭ žyćci nie mienš jak 39 čałaviek. Pavodle źviestak departamienta nadvorja, u hetym miesiacy ŭ štacie ŭžo zarehistravanaja kolkaść apadkaŭ, na 109% vyšejšaja za siaredni ŭzrovień. I ŭ mnohich miescach pa ciačeńni Brachmaputry raka padniałasia vyšej za niebiaśpiečnuju adznaku.
Žychary i čynoŭniki ŭ razmovie z BBC nazyvajuć apošniuju pavodku «patopam biblejskich maštabaŭ», jaki źmianiŭ sacyjalnuju i ekanamičnuju strukturu dziaržavy.
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym6
Kamientary