U Polščy vykryli hrupoŭku, jakaja niezakonna vaziła mihrantaŭ praź Biełaruś
Pamiežnaja achova Polščy paviedamiła pra likvidacyju mižnarodnaj złačynnaj hrupoŭki, jakaja niezakonna vaziła mihrantaŭ z krain Blizkaha Uschodu ŭ Zachodniuju Jeŭropu praź Biełaruś. Apieracyja prajšła ŭ niekalkich krainach 13 lipienia. 10 čałaviek u Polščy i adnaho ŭ Vialikabrytanii zatrymali na padstavie niamieckaha ordara, a vobšuki prachodzili ŭ 22 miescach u Polščy, čatyroch u Litvie i dvuch u Niamieččynie.
Zatrymanym u Polščy ad 24 da 39 hadoŭ, usie jany ź Silezii — rehijona vakoł Urocłava na paŭdniovym zachadzie Polščy. Jany «majuć dačynieńnie da supolnaści silezskich futbolnych «psieŭdafanataŭ». Siarod zatrymanych — lidar hrupoŭki, jaki kantaktavaŭ z «zakazčykami» pracedury pieravozki mihrantaŭ. Praz futbolnych chulihanaŭ hrupoŭka ładziła łahistyku, vierbavała «kurjeraŭ», pierakładčykaŭ, pieravozčykaŭ i «buchhałtaraŭ».
Nad apieracyjaj pracavała stvoranaja ŭ lutym apieratyŭnaja hrupa z polskich pamiežnikaŭ i supracoŭnikaŭ inšych słužbaŭ, supracoŭnikaŭ roznych słužbaŭ Estonii, Finlandyi, Hiermanii, Łatvii i Litvy. Apieracyju kaardynavaŭ Jeŭrapoł.
Pracedura pieravozki mihrantaŭ u Hiermaniju ci Vialikabrytaniju vyhladała nastupnym čynam. Pa prybyćci ŭ Biełaruś jany sami abo z dapamohaj «hidaŭ» pierasiakali polska-biełaruskuju miažu, potym pieradavali svaju łakacyju lidaru hrupy — ich padbirali futbolnyja chulihany i na arandavanych mašynach advozili ŭ Hiermaniju. Złačyncy atrymlivali hrošy tolki paśla taho, jak źjaŭlałasia paćviardžeńnie vykananaj zamovy: naprykład, fota mihrantaŭ u punkcie pryznačeńnia.
Za pieravozku adnaho zamiežnika hrupoŭka atrymlivała 1-2 tysiačy jeŭra, kali dastaŭlała da Niamieččyny, a kali dastaŭlała ŭ Vialikabrytaniju, to mieła ažno 11-13 tysiač jeŭra. Ahułam hrupa zarabiła jak minimum 400 tysiač złotych — zvyš 83 tysiač jeŭra pa ciapierašnim kursie.
Jakija pakarańni pahražajuć zatrymanym, pakul nie paviedamlajecca.
Ciapier čytajuć
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ88
Kamientary